ភ្នំពេញ៖ សហគមន៍កសិកម្មចំនួន១១ នៅរាជធានីភ្នំពេញ បាត់ដំបង និងខេត្តប៉ៃលិន បានរួមគ្នាចងជាសម្ព័ន្ធបង្កើតសហភាពសហព័ន្ធកសិកម្ម ដើម្បីពង្រឹងទីផ្សារបន្លែសុវត្ថិភាព និងការលើកកម្ពស់សេដ្ឋកិច្ចជនបទ។
លោក ស្រ៊ុន សុខុម អគ្គនាយករងនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការបង្កើតសហភាពសហគមន៍កសិកម្ម ជាកត្តាចាំបាច់និងមានសារសំខាន់សម្រាប់គោលដៅអភិ វឌ្ឍន៍វិស័យកសិកម្មនិងការលើកកម្ពស់សេដ្ឋកិច្ចជនបទ ក្នុងគោលបំណងប្រមូលផ្តុំកម្លាំងផលិត មធ្យោបាយផលិតនិងពង្រឹងសមត្ថភាពក្នុងខ្សែសង្វាត់ផលិតកម្ម កសិកម្ម កសិឧស្សាហកម្ម កសិពាណិជ្ជកម្ម និងសេវាកម្មដែលពាក់ព័ន្ធនឹងវិស័យកសិកម្ម។
លោកស្រ៊ុន សុខុម បានបញ្ជាក់ ពីគោលបំណងសំខាន់នៃការបង្កើតសហភាពសហគមន៍កសិកម្មនេះថា គឺផ្តោតសំខាន់លើបន្លែសុវត្ថិភាព ដែលមានសហគមន៍កសិកម្មដាំដុះបន្លែចូលរួម មកពី ខេត្តបាត់ដំបង ខេត្តប៉ៃលិន និងរាជធានីភ្នំពេញ។
សូមជម្រាបថា ការចងសម្ព័ន្ធគ្នានេះ បានធ្វើឡើងតាមរយៈការបើកមហាសន្និបាតកំណើតដំបូងសហភាពសហគមន៍កសិកម្ម នៅមន្ទីរកសិកម្មរុក្ខាប្រមាញ់និងនេសាទខេត្តបាត់ដំបង នៅថ្ងៃទី៨ ខែកុម្ភៈ ឆ្នាំ២០២១នេះ។ ខេត្តបាត់ដំបងនៃប្រទេសកម្ពុជា មានសក្តានុពលយ៉ាងធំលើវិស័យកសិកម្ម ក្រៅពីដំណាំស្រូវ មានដំណាំដំឡូងមី ពោត សណ្តែកសៀង និងដំណាំផ្សេងៗទៀត។
ប្រជាកសិករ បានធ្វើការដាំដុះដំណាំបន្លែ ជាផ្នែកមួយដ៏សំខាន់ដែលកសិករក្នុងសហគមន៍ បានចូលរួមដាំដុះយ៉ាងច្រើនផងដែរ ជាពិសេសគឺការចាប់ផ្តើមផ្លាស់ប្តូរផ្នត់គំនិតពីការដាំដុះបន្លែនៅតាមទីវាល មកដាំដុះបន្លែសុវត្ថិភាពក្នុងផ្ទះសំណាញ់ ព្រោះមិនត្រឹមតែលើកកម្ពស់គុណភាព សុវត្ថិភាពសម្រាប់អ្នកប្រើប្រាស់ក្នុងការហូបចុកប៉ុណ្ណោះទេ តែអ្នកដែលផលិតក៏អាចបញ្ជៀសបាននូវឥទ្ធិពលនៃការប្រើប្រាស់ថ្នាំគីមីបានមួយចំនួនធំផងដែរ ។
គួរបញ្ជាក់ថា ផលិតផលកសិកម្ម ដែលភ្ជាប់នឹងការអនុវត្តកសិកម្មល្អ GAP (Good Agriculture Practice) ជាកត្តាចម្បងដែលអ្នកផលិតត្រូវតែអនុវត្ត ដើម្បីទទួលបាននូវឱកាសពង្រីកទីផ្សារ និងការប្រកួតប្រជែងជាមួយផលិតផលនាំចូល ដែលស្របទៅនឹងយុទ្ធសាស្ត្ររបស់រាជរដ្ឋាភិបាលកម្ពុជា ដើម្បីលើកកម្ពស់ផលិតផលក្នុងស្រុកកាត់បន្ថយការនាំចូល៕ រក្សាសិទ្ធិដោយ៖CEN
