ភ្នំពេញ ៖ ដូចដែលប្រិយមិត្តបានដឹងហើយ នៅសល់តែប៉ុន្មានថ្ងៃទៀតប៉ុណ្ណោះ នោះបុណ្យចូលឆ្នាំចិន នឹងឈានចូលមកដល់ហើយ គឺត្រូវបានចាប់ផ្តើមនៅថ្ងៃទី១២ ១៣ ខែកុម្ភៈ ខាងមុខ។
ពិតណាស់ នៅក្នុងឱកាសនេះផងដែរ ឃើញថាជារៀងរាល់ឆ្នាំ គឺតែងមានបងប្អូនពលរដ្ឋខ្មែរកាត់ខ្សែស្រឡាយចិន បាននាំគ្នាសែន ឧទ្ទិសទៅដល់ដូនតាទាំង៧សន្ថាន ដែលបានចែកឋាន ដើម្បីសុំឲ្យដូនតាងាកមកឲ្យពរជ័យ រកស៊ីធូរធារ និងសេចក្តីសុខចម្រើននៅក្នុងគ្រួសារ។
ជាទម្លាប់ សម្រាប់ពិធីបុណ្យចូលឆ្នាំចិន នោះជនជាតិចិន មិនភ្លេចទេចំពោះការទិញជ្រូកខ្វៃ និង ទាខ្វៃ ដើម្បីយមកសែនដូនតា។
តែយ៉ាងណាមិញ អ្វីៗដែលយើងគ្រប់គ្នា មិនរំពឹងទុក និងពុំដែលនឹកគិតដល់ គឺបានឃើញហើយស្ទើរមិនគួរឲ្យជឿ ខណៈវីដេអូខ្លីមួយ ត្រូវបានចែករំលែកនៅលើបណ្តាញសង្គម Tik Tok បង្ហាញឲ្យឃើញពីសកម្មភាពធ្វើជ្រូកខ្វៃ ដែលមើលទៅហាក់គ្មានអនាម័យទាល់តែសោះ ដោយដាក់ជ្រូកនៅផ្ទាល់នឹងដី ដើម្បីផ្សំគ្រឿងតែម្តង។ ហើយលើសពីនេះ កម្មករប្រុសៗសូម្បីជក់បារីបង្ហុយពេញកន្លែងធ្វើ ដែលអាចជ្រុះកំទេចកន្ទុយបារីលាយឡំនឹងគ្រឿងក៏ថាបាន។
ទោះយ៉ាងណា សកម្មភាពនៃការផ្សំគ្រឿងជ្រូកខ្វៃដ៏គ្មានអនាម័យនេះ គេក៏ពុំដឹងច្បាស់ថា បានកើតឡើងទីកន្លែងណានោះទេ៕ រក្សាសិទ្ធិដោយ៖ លឹម ហុង
