ភ្នំពេញ ៖ រថយន្តកូរ៉េឃ្លុបដឹកធ្ងន់ពេកបណ្ដាលឲ្យស្រុតផ្លូវ ជាប់កង់ក្រោយទៅមុខលែងរួច ស្ទះពេញផ្លូវ ផ្អើលដល់សមត្ថកិច្ចមកជួយសម្រួលចរាចរណ៍ ដើម្បីបញ្ជៀសការកកស្ទះ។
ហេតុការណ៍ស្រុតផ្លូវនេះ បានកើតឡើងនៅវេលាម៉ោង១និង៤០នាទីរសៀលថ្ងៃទី៩ខែកុម្ភៈឆ្នំ២០២១ ដែលស្ថិតតាមបណ្ដោយផ្លូវ៣៣៦កែង២៦១ ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
យោងតាមប្រភពពីសមត្ថកិច្ចបានប្រាប់ភ្នាក់ងារអង្គភាពCENឲ្យដឹងថា មុនកើតហេតុ រថយន្តកូរ៉េពណ៌សលាយក្រហមពាក់ផ្លាកលេខភ្នំពេញ 3B-6276 ដឹកស្រាបៀចំនួន៩០០កេះ ពីឃ្លាំងនៅឬស្សីកែវឆ្ពោះទៅខេត្តតាកែវ ដោយឆ្លងកាត់ផ្លូវ៣៣៦ មកដល់ចំណុចកើតហេតុគ្រាន់តែស្ទះចរាចរណ៍យូរបន្តិច ក៏មានការស្រុតកង់ក្រោយខាង់ស្ដាំ ទៅមុខលែងរួច តៃកុងក៏បានខលហៅក្រុមការងារគាត់យករថយន្តមកអូស ដោយរថយន្តដឹកធ្ងន់ពេកពេលប្រឹងរើនិងអូសនោះ ធ្វើឲ្យរថយន្តបង្ករឹតតែស្រុតជ្រៅទៅៗ ទើបតៃកុងទំនាក់ទំនងទៅតំណាងរថយន្តយករថយន្តផ្សេងមួយទៀតមកសាងទំនិញ។
ក្រោយកើតហេតុ សមត្ថកិច្ចបានឲ្យតំណាងខាងរថយន្តបង្កខាងលើ អូសរថយន្តចូលខាង រួចចូលខ្លួនដោះស្រាយជាមួយសង្កាត់ដើម្បីវាយតម្លៃ ទំហំនៃការខូចខាតផ្លូវដែលជាសម្បត្តិរបស់រដ្ឋ ទៅតាមនីតិវិធីច្បាប់៕ រក្សាសិទ្ធិដោយ៖ សារឿន