បាត់ដំបង ៖ រថយន្តក្រុង បុកជាមួយ រថយន្ត៥តោនដឹកត្រី បណ្តាលឲ្យ ស្លាប់ ៤នាក់ កាលពីថ្ងៃទី២៦ ខែកុម្ភៈ ឆ្នាំ២០១៨ វេលាម៉ោង ២ រំលងអធ្រាត្រនៅតាមបណ្ដោយ ផ្លូវជាតិលេខ៥ ត្រង់ចំណុចក្រុមទី១៦ ភូមិថ្នល់បត់ឃុំឫស្សីក្រាំង ស្រុកមោងឫស្សី ខេត្តបាត់ដំបង ។
សមត្ថកិច្ចមូលដ្ឋាន បានអោយដឹងនៅរសៀលថ្ងៃទី២៦ ខែកុម្ភៈ ឆ្នាំ២០១៨នេះថា៖ ករណីគ្រោះថ្នាក់ចរាចរណ៍នេះបង្កឡើងរវាងរថយន្ត និងរថយន្ត (ទិសដៅផ្ទុយគ្នា) រថយន្តក្រុងដឹកទំនិញក្រុមហ៊ុនវឌ្ឍនភាព ពណ៌ស្វាយ ពាក់ស្លាកលេខភ្នំពេញ 3C-8052 អ្នកបើកបរឈ្មោះ ថា វុទ្ធី ភេទប្រុស អាយុ២១ឆ្នាំ រស់នៅសង្កាត់ព្រៃវែង ខណ្ឌដង្កោ ធ្វើដំណើរទិសពីបាត់ដំបងទៅភ្នំពេញ មកដល់ចំនុចខាងលើ បានបុកជាមួយរថយន្ត១គ្រឿងម៉ាក ហ៊ីយ៉ាន់ ដាយពណ៌ស ពាក់ស្លាកលេខ ព្រះសីហនុ 3A-5811 ដឹកត្រីអ្នកបើកបរឈ្មោះ វ៉ិន ខេង អាយុ៣៦ឆ្នាំ រស់នៅភូមិ ទេពអរជូន ឃុំកោះខែល ស្រុកស្អាង ខេត្តកណ្តាល។
សមត្ថកិច្ចមូលដ្ឋានបានបន្តថា ជនរងគ្រោះដែលស្លាប់ទាំង៤នាក់រួមមាន៖ ទី១៖ ឈ្មោះ ថា វុទ្ធី អ្នកបើក បរថយន្តក្រុង (ស្លាប់)ទី២៖ ឈ្មោះ វ៉ិន ខេង អ្នកបើកបររថយន្ត ហ៊ីយ៉ាន់ដាយ (ស្លាប់)ទី៣៖ ឈ្មោះ គង មករា ភេទប្រុស អាយុ២៥ឆ្នាំ រស់នៅភូមិព្រែកតាឌួងឃុំព្រែកថ្មី ស្រុកកោះធំ ខេត្កកណ្តាល អ្នករួមដំណើរជាមួយរថយន្តដឹកត្រី (ស្លាប់)ទី៤៖ ឈ្មោះ ក្តាម ភេទប្រុស អាយុ២៨ឆ្នាំ រស់ភូមិព្រែកតាឌួង ឃុំព្រែកថ្មី ស្រុកកោះធំ ខេត្តកណ្តាលអ្នករួមដំណើរ ជាមួយរថយន្តដឹកត្រី(ស្លាប់)។
សមត្ថកិច្ចបានឱ្យដឹងថា៖មូលហេតុដែលបណ្តាលឲ្យមានគ្រោះថ្នាក់ចរាចរណ៍ខាងលើនេះ សមត្ថកិច្ចប្រាប់ថា មកពីរថយន្តក្រុងបើករេចង្កូត ចូលចំណែកផ្លូវខាងស្តាំដៃរបស់រថយន្តដឹកត្រី។ សពជនរងគ្រោះត្រូវបានក្រុមគ្រួសារ យកធ្វើបុណ្យតាមប្រពៃណី។ បច្ចុប្បន្ន រថយន្តទាំង២គ្រឿង ត្រូវនគរបាលចរាចរណ៍ផ្លូវគោក អូសយកទៅរក្សាទុកនៅការិយាល័យចរាចរណ៍ខេត្ត រង់ចាំធ្វើការដោះស្រាយតាមច្បាប់នៅពេលក្រោយ។
ក្រោយពេលកើតហេតុសមត្ថកិច្ចទាំងពីរអង្គភាព បានចុះជួយអន្តរាគមន៍ដើម្បីសម្រួលចរាចរណ៍ នៅលើកំណាត់ផ្លូវព្រមទាំងបានប្រើប្រាស់រថយន្តដើម្បីទាញអោយរថយន្តទាំងពីរ ហែកចេញពីគ្នាក្នុងការយកសពចេញ៕ ដោយ៖បញ្ញាស័ក្តិ
