ភ្នំពេញ ៖ តាមរយៈជំនួយរបស់ក្រសួងការបរទេស និងពាណិជ្ជកម្មនូវែលហ្សេឡង់ អង្គការមូលនិធិអាស៊ី និងអង្គការសីលការ បានសម្ពោធគម្រោងរយៈពេល ៣ ឆ្នាំ ដែលមានឈ្មោះថា «ការលើកកម្ពស់តម្លាភាព និងគណនេយ្យភាពនៃការគ្រប់គ្រងថវិកាថ្នាក់ក្រោមជាតិនៅកម្ពុជា»។
កម្មវិធីសម្ពោធគម្រោងនេះត្រូវបានធ្វើឡើងនៅក្រោមអធិបតីភាពរបស់ ឯកឧត្តម ង៉ាន់ ចំរើន រដ្ឋលេខាធិការ ក្រសួងមហាផ្ទៃ និងជាប្រធានលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ គ.ជ.អ.ប ។
គម្រោងរយៈពេលបីឆ្នាំនឹងជម្រុញការលើកទឹកចិត្តជាវិជ្ជមានដល់ក្រុមប្រឹក្សាថ្នាក់មូលដ្ឋាន ក្នុងការឆ្លើយតបទៅនឹងសេចក្តីត្រូវការរបស់ប្រជាពលរដ្ឋ និងជំរុញការចូលរួមពីសំណាក់ប្រជាពលរដ្ឋនៅក្នុងដំណើរការរៀបចំផែនការថវិកាអភិវឌ្ឍន៍មូលដ្ឋានឱ្យកាន់តែប្រសើរឡើង។ គម្រោងនេះ នឹង (១) ធ្វើការនៅឃុំចំនួន ២៤ ក្នុងស្រុកចំនួន ៨ ដែលស្ថិតនៅក្នុងខេត្តកំពង់ឆ្នាំង កំពង់ធំ កណ្តាល និងខេត្តត្បូងឃ្មុំ។ គំនិតផ្តួចផ្តើមគម្រោងនេះ នឹងកសាងសមត្ថភាពសមាជិកក្រុមប្រឹក្សាឃុំ ចំនួន ២២២ នាក់ និងសមាជិកក្រុមប្រឹក្សាស្រុកចំនួន ៤០នាក់ សម្របសម្រួលនិងរៀបចំវេទិកាជជែកពិភាក្សាចំនួន ៣១ដង នៅថ្នាក់ជាតិ និងថ្នាក់ក្រោមជាតិ និងធ្វើការជាមួយអ្នកភូមិចំនួន ៤ ម៉ឺននាក់។
លោក Taha Macpherson ឯកអគ្គរដ្ឋទូតនូវែលហ្សេឡង់ប្រចាំប្រទេសថៃ ឡាវ និងកម្ពុជា បានមានប្រសាសន៍ថា៖ «តម្លាភាព និងគណនេយ្យភាពហិរញ្ញវត្ថុសាធារណៈមានសារៈសំខាន់ណាស់ក្នុងការធានាថា ការសម្រេចចិត្តផ្នែកថវិកានឹងធ្វើឱ្យមានការផ្លាស់ប្តូរបែបវិជ្ជមានដល់ការរស់នៅរបស់ប្រជាជនកម្ពុជា។ ប្រទេសនូវែលហ្សេឡង់ រីករាយនឹងគាំទ្រដល់ក្រុមប្រឹក្សាថ្នាក់ក្រោមជាតិ និងប្រជាពលរដ្ឋ ដើម្បីកសាងសម្ថភាពរបស់ពួកគាត់នៅក្នុងដំណើរការរៀបចំថវិកាប្រកបដោយភាពត្រឹមត្រូវ។»
ឯកឧត្ដម ង៉ាន់ ចំរើន បានមានប្រសាសន៍ថា៖ «ការពង្រឹងប្រព័ន្ធគ្រប់គ្រងហិរញ្ញវត្ថុរដ្ឋបាលថ្នាក់ក្រោមជាតិ កិច្ចការងារដ៍ចាំបាច់ក្នុងកំណែទម្រង់អភិបាលកិច្ចរដ្ឋបាលថ្នាក់ក្រោមជាតិ នៅខណៈដែលថវិការបស់រដ្ឋបាលថ្នាក់ក្រោមជាតិត្រូវបានបង្កើនពីមួយឆ្នាំទៅមួយឆ្នាំ។
កិច្ចការនេះត្រូវបានអនុវត្តនៅក្នុងយន្តការគណនេយ្យភាពសង្គម ជាពិសេសតាមរយៈសមាសភាគទី១ ការលើកម្ពស់តម្លាភាព ភាពងាយទទួលបានព័ត៌មាននានា និងព័ត៌មានថវិកា និងសមាសភាគទី២ ការការត្រួតពិនិត្យ តាមដានដោយប្រជាពលរដ្ឋ។ អាស្រ័យហេតុនេះ គម្រោង«ការលើកកម្ពស់តម្លាភាព និងគណនេយ្យភាពនៃការគ្រប់គ្រងមូលនិធិថ្នាក់ក្រោមជាតិនៅកម្ពុជា» ដែលគាំទ្រដោយរាជរដ្ឋាភិបាលនូវែលហ្សេឡង់តាមរយៈ ក្រសួងការបរទេស និងពាណិជ្ជកម្ម មានសារៈសំខាន់ណាស់ក្នុងការចូលរួមចំណែកនៅក្នុងការចូលរួមអនុវត្តកំណែទម្រង់អភិបាលកិច្ចរដ្ឋបាលថ្នាក់ក្រោមជាតិ។»
លោកស្រី Meloney C. Lindberg តំណាងអង្គការមូលនិធិអាស៊ី ប្រចាំប្រទេសកម្ពុជា មានប្រសាសន៍ថា “យោងទៅតាមការសិក្សាស្ទង់មតិនៅក្នុងសហគមន៍គោលដៅរបស់យើង ៨៩.៧% នៃអ្នកចូលរួម យល់ថា ពួកគេចាំបាច់ចូលរួមនៅក្នុងកិច្ចប្រជុំផែនការវិនិយោគសហគមន៍របស់ពួកគេ ហើយ ៨៣.២% ចាប់អារម្មណ៍ និងចង់យល់ដឹងពីថាវិកាសម្រាប់អភិវឌ្ឈន៍នៅឆ្នាំ ២០២០។ នេះបញ្ជាក់ពីចំណាប់អារម្មណ៍របស់ប្រជាពលរដ្ឋក្នុងការយល់ដឹង និងចូលរួមក្នុងការរៀបចំផែនការធ្វើថវិកានៅសហគមនរបស់ពួកគេ និងផែនការវិនិយោគសហគមន៍”។
លោក ចាន់ តារា អភិបាលរងខេត្តកំពង់ធំ បានមានប្រសាសន៍ថា៖ «គម្រោងថវិកាថ្នាក់ក្រោមជាតិនេះមានសារៈសំខាន់ណាស់សម្រាប់ថ្នាក់ស្រុក។ នេះជាការចាំបាច់ក្នុងការពង្រឹង និងលើកកម្ពស់សមត្ថភាពមន្ត្រី ឬគណៈអភិបាលស្រុក ដើម្បីយល់ដឹងកាន់តែច្បាស់អំពីដំណើរការអភិវឌ្ឍថរិកា និងគៀងគរការចូលរួមពីប្រជាពលរដ្ឋ។»
គម្រោងនេះរំពឹងថានឹងជម្រុញឲ្យការយល់ដឹងរបស់ប្រជាពលរដ្ឋកាន់តែប្រសើរឡើង អំពីដំណើរការរៀបចំផែនការ និងផែនការថវិការបស់ក្រុមប្រឹក្សាឃុំ និងការបែងចែកមូលនិធិ ព្រមទាំងសិទ្ធិ និងការទទួលខុសត្រូវរបស់ពួកគេក្នុងការសម្រេចចិត្តនៅមូលដ្ឋាន ។
ដោយផ្អែកលើអាទិភាពដែលដែលបានបង្ហាញដោយប្រជាពលរដ្ឋ ក្រុមប្រឹក្សាឃុំ និងស្រុក នឹងត្រូវបានពង្រឹងបន្ថែមនូវសមត្ថភាព ក្នុងការសម្រេចចិត្តថវិកា។ ទម្រង់នៃការចូលរួមប្រកបដោយភាពច្នៃប្រឌិត និងអត្ថន័យក្នុងដំណើរការរៀបចំថវិកានឹងបង្កើនការពិភាក្សាអំពីអាទិភាពថវិកាមូលដ្ឋាន រវាងក្រុមប្រឹក្សាឃុំ និងប្រជាពលរដ្ឋ ។ ការរៀនសូត្ររបស់គម្រោងនឹងរួមចំណែកដល់គោលនយោបាយ និងគោលការណ៍ណែនាំថវិកាមូលដ្ឋាន ហើយដែលការរៀនសូត្រនឹងត្រូវបានចែករំលែកជាមួយភាគីអ្នកពាក់ព័ន្ធ៕
រក្សាសិទ្ធិដោយ៖CEN
