ខេត្តមណ្ឌលគិរី៖ រដ្ឋបាលសាលាខេត្តមណ្ឌលគិរី បានចេញមុខផ្តល់បទសម្ភាសបំភ្លឺ ជូនដល់ក្រុមអ្នកសារព័ត៌មានប្រចាំខេត្តនេះ ជុំវិញភាពមិនប្រក្រតី នៃសកម្មភាពចូលទៅរានកាប់ព្រៃឈើ នៅក្នុងតំបន់ព្រៃខៀវយ៉ាងអនាធិបតេយ្យក្នុងមូលដ្ឋានខេត្តមណ្ឌលគិរីនាពេលកន្លងមក។
នាយករងរដ្ឋបាលសាលាខេត្តមណ្ឌលគិរី លោក សុក សេរ៉ា បានបំភ្លឺដល់ក្រុមអ្នកយកព័ត៌មាន ប្រចាំខេត្តមណ្ឌលគិរី ចុងសប្តាហ៍កន្លងមកនេះថា «បញ្ហាព្រៃខៀវនោះ គឺបានកើតមានតាំងពីឆ្នាំ២០១២ ដែលអាជ្ញាធរខេត្តមណ្ឌលគិរី បានចុះទប់ស្កាត់ និងបង្ក្រាបច្រើនសាររហូតរាប់មិនអស់…ហើយគ្រប់ពេល នៃការចុះបង្ក្រាបក្រុមការងារ តែងមានកំណត់ហេតុនិងរបាយការណ៍ផ្តល់ជូនទៅឲ្យក្រសួងពាក់ព័ន្ឋជាច្រើន»។
លោក សេរ៉ា បន្តថា «បទល្មើសព្រៃឈើនៅតំបន់ព្រៃខៀវនេះ គឺរដ្ឋបាលខេត្តបានជួបប្រទះបញ្ហាប្រឈមជាច្រើន ដែលនាំជាផលវិបាកក្នុងការអនុវត្តន៍ច្បាប់ ចំពោះប្រជាជន ដែលបានចូលទៅកាប់ទន្ទ្រានព្រៃយកដីនៅតំបន់ខាងលើ ព្រោះថា នៅពេលកម្លាំងចម្រុះចុះទៅពួកគាត់បានរត់គេចខ្លួនចេញអស់ពីទីតាំងកាប់រានព្រៃ ប៉ុន្តែនៅពេលកម្លាំងជំនាញដកចេញមកវិញ ពួកគាត់ក៏នាំគ្នាចូលទៅកាប់ព្រៃតំបន់នោះជាបន្តទៀត គឺក្នុង១យប់ គាត់កាប់ពាយព្រៃតែម្តង។ លោកថា បទល្មើសនេះរដ្ឋបាលខេត្ត ក៏សម្រេចដាក់កម្លាំងយាមល្បាត នៅតំបន់ព្រៃខៀវ ប៉ុន្តែបានជួបការលំបាកដោយសារបញ្ហាសុខភាព និងជីវភាព របស់មន្ត្រីជំនាញទាំងនោះ រួចក្រោយមកក៏សម្រេចចិត្តដកកម្លាំងចេញវិញ។ ដល់ពេលចឹងទៅ ប្រជាជនចេះតែចូលទៅកាន់រានព្រៃក្នុងតំបន់នេះជាបន្តបន្ទាប់មកទៀត»។
លោក សុក សេរ៉ា ឲ្យដឹងដូច្នេះ រួចបន្ថែមថា«ក្រោយមកនៅឆ្នាំ២០១៥ ក៏មានលិខិតរបស់ឈ្មោះ កែវ វុទ្ឋី ដែលបានពីក្រសួងកសិកម្ម បន្ទាប់ពីនោះស្រាប់តែមានមនុស្សកាន់តែច្រើនឡើងបានទៅរស់នៅទីតាំងខាងលើ។ការចូលទៅតាំងទីលំនៅថ្មី របស់ពួកគាត់ ខាងខេត្តក៏ទទួលបានពាក្យបណ្តឹងពីប្រជាពលរដ្ឋថា កែវ វុទ្ឋី បានយកលុយពីប្រជាពលរដ្ឋ ខេត្តក៏មានវិធានការ រហូតដល់ចាប់ខ្លួនមនុស្សពីរនាក់ ម្នាក់ឈ្មោះ កែវ វុទ្ឋី នឹងម្នាក់ទៀតឈ្មោះលោកភ្លេចឈ្មោះ។ លោកថា ក្រោយចាប់ខ្លួនកែវ វុទ្ឋី នឹងបក្ខពួកហើយ ដោយមិនបានដឹងពីនិតិវីធី របស់តុលាការយ៉ាងណានោះទេក៏មានការដោះលែងវិញ។ ហើយក្នុងករណីនេះ រដ្ឋបាលខេត្ត ក៏បានស្នើឲ្យតុលាការធ្វើពាក្យបណ្តឹងមួយទៀត ដាក់ទៅកាន់សាលាឧទ្ឋរណ៍ ហើយក៏បានចេញដីកាមួយទៀតតាមចាប់ឈ្មោះ កែវ វុទ្ធី។ ប៉ុន្តែសព្វថ្ងៃនេះមិនដឹងថា កែវ វុទ្ឋី នោះនៅទីណាទេ»។
លោក សុក សេរ៉ា ឲ្យដឹងបន្តទៀតថា «ចំពោះការឃើញមានដុតហុយផ្សែងនោះ រឿងនេះ គឺការកាប់ឆ្ការពីមុនមកចាស់ទេ តែកាលពីសមត្ថកិច្ចចូលទៅគេមិនទាន់ហ៊ានប្រមូលដុតទេ វានៅជាឈើចាស់ៗខ្លះ ថ្មីខ្លះ ហើយមួយរយៈនេះ ដោយខេត្តជាប់រវល់កិច្ចការងារជាច្រើនមិនបានចុះទៅជាប់ ក៏មានសកម្មភាពប្រមូលដុត ក៏ឃើញវាលធំមែន តែវាមិនមែនកាប់ឥឡូវទេ គឺកាប់យូរហើយ»។
ចំណែករឿងដែលគេនិយាយថា មន្ត្រីសាលាខេត្តមានជាប់ពាក់ព័ន្ធការទទួលសំណូកលុយកាក់ពីប្រជាពលរដ្ឋ ជាថ្នូរឲ្យចូលទៅតំបន់ព្រៃខៀវនោះ ត្រូវបាន លោក សុក សេរ៉ា ថ្លែងថា« យើងនឹងហៅអ្នកនិយាយនោះមកសួរនាំ ស្រាវជ្រាវថា តើប្រភពនេះ បានមកពីណា ហើយយកទៅឲ្យអ្នកណា?ហើយយើងនឹងធ្វើនីតិវិធីតាមច្បាប់»។
ថ្លែងបំភ្លឺនៅចំពោះមុខអ្នកយកព័ត៌មានរយៈពេល ៣០នាទី លោកនាយករងរដ្ឋបាលខេត្តមណ្ឌលគិរី បានលើកពីបញ្ហាដ៏ស្មុគស្មាញជាច្រើន ដែលរដ្ឋបាលខេត្តមណ្ឌលគិរី បានជួបប្រទះអំឡុងពេលចុះអនុវត្តន៍ការងារក្នុងតំបន់ព្រៃខៀវ ដែលមានប្រជាពលរដ្ឋរហូតដល់ទៅចំនួន ៤ក្រុមធំៗ ដែលសុទ្ឋតែមានភ្ជាប់លិខិតឯកសារពីក្រសួងផង ពីរដ្ឋសភាពផងថា ខ្លួនមានច្បាប់ត្រឹមត្រូវ លើការកាន់កាប់ដីដោយស្របច្បាប់ក្នុងតំបន់ព្រៃខៀវ នាខេត្តមណ្ឌលគិរី។ ប៉ុន្តែជាការជាក់ស្តែងប្រជាពលរដ្ឋបានយល់ច្រលំពីការពិត ដែលពួកគាត់ គិតថា ខ្លួនអាចមានសិទ្ធគ្រប់គ្រងដីព្រៃទាំងនោះ ខណៈលិខិតមួយចំនួនដែលចេញដោយក្រសួង ឬមិនបានបញ្ជាក់ឈ្មោះក្រសួងផងនោះ គឺទុកលទ្ធភាពឲ្យខេត្តជាអ្នករៀបចំនឹងត្រួតពិនិត្យលើភាពស្របច្បាប់ លើការចេញប័ណ្ណកម្មសិទ្ឋជូនពួកគាត់។ ហើយបញ្ហានេះ រដ្ឋបាលខេត្ត បានតម្រូវឲ្យប្រជាពលរដ្ឋពួកគាត់ត្រូវផ្អាកសកម្មភាពកាប់ព្រៃឈើ នៅតំបន់ព្រៃខៀវជាបន្ត ប៉ុន្តែបែរជាពួកគាត់យល់ថា ក្រសួងចេញសេចក្តីសម្រេចឲ្យពួកគាត់ មានសិទ្ធគ្រប់គ្រងដីហើយ តែអាជ្ញាធរខេត្តមិនព្រមអនុញ្ញាតឲ្យពួកគាត់ចូលទៅគ្រប់គ្រងដី ដែលបានកាប់រានហើយនោះទៅវិញ។
ក្នុងសេចក្តីបំភ្លឺដដែលបានឲ្យដឹងទៀតថា មានលិខិតចំនួន ៣ មកពីលើ(ក្រសួងដែនដីចំនួនពីរច្បាប់)ដែលសម្រេចធ្វើប័ណ្ណជូនពួកគាត់ ដោយមានចំនួន ៤ក្រុម ក្នុងនោះក្រុមទី១ មានអ្នកតំណាងឈ្មោះ កែវ វុទ្ឋី ក្រុមទី២ មានអ្នកតំណាងឈ្មោះ សេន ស្លេះ មានលិខិតពីក្រសួងដែនដី នគររូបណីយកម្ម នឹងសំណង់។ ដោយឡែកមានលិខិតមួយទៀត ដែលរដ្ឋសភាបានចេញមកឲ្យផ្តល់កម្មសិទ្ធិដល់គ្រួសារជាច្រើន ដែលនេះជាក្រុមទី៣ (មិនទាន់មានឈ្មោះអ្នកតំណាង) និងក្រុមទី៤ បានសុំតាមរយៈអភិបាលខេត្តក្រចេះ ដោយស្នើរសុំមកអភិបាលខេត្តមណ្ឌលគិរី ឲ្យជួយផ្តល់ដីជូនពួកគាត់(ក្រុមនេះក៏មិនមានឈ្មោះអ្នកតំណាងដែរ)។
លោក សុក សេវ៉ា ឲ្យដឹងទៀតថា ចំពោះក្រុមប្រជាពលរដ្ឋទាំង ៤ក្រុម ខាងលើ ដែលអាចមានចំនួនប្រជាពលរដ្ឋរហូតដល់រាប់រយគ្រួសារនេះ គឺសុទ្ធតែមានឯកសារស្នើរសុំកាន់កាប់ដីលើចំណុចតែមួយដូចគ្នា ដែលនេះជាបញ្ហាដ៏សំខាន់ចំពោះរដ្ឋបាលខេត្តមណ្ឌលគិរី ពិបាកសម្រេចថាតើត្រូវប្រគល់ចំពោះក្រុមណាមួយត្បិតដីដែលពួកគាត់កំពុង ស្នើរប័ណ្ណកម្មសិទ្ធិ គឺជាដី របស់រដ្ឋគ្រប់គ្រង៕ ដោយ ៖ សមុទ្រឈើ
