ភ្នំពេញ៖ ប្រធានតំណាង UNFPA បានសម្តែងការកោតសរសើរ ក្នុងការជម្រុញបង្កើតផែនការយុទ្ធសាស្រ្តសុខាភិបាល២០១៦-២០២០ ក៏ដូចជាគំនិតផ្តួចផ្តើមផែនទីបង្ហាញផ្លូវ ស្តីពីការកាត់បន្ថយអត្រាមរណភាពមាតា កុមារនិងទារក ក៏ដូចជាគោលនយោបាយសុខាភិបាលផ្សេងៗទៀត។
នាថ្ងៃច័ន្ទ ថ្ងៃទី២៦ ខែកុម្ភៈ ឆ្នាំ២០១៨ នាទីស្តីការក្រសួងសុខាភិបាល លោក សាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល បានអនុញ្ញាតឱ្យលោកស្រី Lene K. Christiansen ប្រធានតំណាងអង្គការ UNFPA (UNFPA) Representative ចូលជួបសម្តែងការគួរសម ពិភាក្សាការងារ និងជម្រាបលា ក្នុងខណៈពេលដែលលោកស្រីបានបញ្ចប់បេសកម្ម ជាប្រធានតំណាង UNFPA នៅកម្ពុជា ដោយចូលនិវត្តន៌។
លោកស្រីប្រធានតំណាងអង្គការ UNFPA បានថ្លែងអំណរគុណ លោក រដ្ឋមន្រ្តីក្រសួងសុខាភិបាល ដែលតែងតែគាំទ្រ និងសហការជាមួយអង្គការ UNFPA ក្នុងការអនុវត្តកម្មវិធីសុខភាពបន្តពូជ សុខភាពមាតា និងកម្មវិធីពន្យារកំណើត ជាពិសេសការចូលរួមចំណែកថវិកាជាតិក្នុងការទិញមធ្យោបាយពន្យាកំណើត។ លើសពីនេះលោកស្រីប្រធានតំណាង UNFPA បានសម្តែងការកោតសរសើរចំពោះភាពជាអ្នកដឹកនាំរបស់ លោក រដ្ឋមន្រ្តី ក្នុងការជម្រុញបង្កើតផែនការយុទ្ធសាស្រ្តសុខាភិបាល២០១៦-២០២០ ក៏ដូចជាគំនិតផ្តួចផ្តើមផែនទីបង្ហាញផ្លូវ ស្តីពីការកាត់បន្ថយអត្រាមរណភាពមាតា កុមារនិងទារក ក៏ដូចជាគោលនយោបាយសុខាភិបាលផ្សេងៗទៀត។ លោកស្រីប្រធានតំណាងក៏បានអះអាងបញ្ជាក់ផងដែរថា អង្គការ UNFPA នៅតែបន្តជួយដល់វិស័យសុខាភិបាលកម្ពុជា ព្រមាំងត្រៀមរួចជាស្រេចក្នុងការផ្តល់ការគាំទ្រដល់ក្រសួងសុខាភិបាល និងក្រសួងផែនការ ក្នុងការរៀបចំការអង្កេតប្រជាសាស្រ្តសុខភាពនៅកម្ពុជាឆ្នាំ២០២០ ហើយនិងមានការពិគ្រោះយោបល់លើការអភិវឌ្ឍផែនការកម្មវិធីរបស់អង្គការនាពេលខាងមុខនេះផងដែរ ដើម្បីបន្តគាំទ្រដល់ក្រសួងសុខាភិបាលជាបន្តទៀត។
លោក រដ្ឋមន្រ្តីក្រសួងសុខាភិបាល បានថ្លែងអំណរគុណយ៉ាងជ្រាលជ្រៅជូនចំពោះលោកស្រី Lene K. Christiansen និងអង្គការ UNFPAដែលតែងតែផ្តល់ការគាំទ្រដល់វិស័យសុខាភិបាលកម្ពុជា ហើយអង្គការ UNFPA បានចូលរួមចំណែកយ៉ាងធំធេងក្នុងការធ្វើឱ្យបានសម្រេចគោលដៅអភិវឌ្ឍន៍សហសវត្សរ៍ ជាពិសេសគោលដៅទី៤និងទី៥។ លោក រដ្ឋមន្រ្តី ក៏បានគូសបញ្ជាក់បន្ថែមថា ក្រសួងសុខាភិបាលមានកិច្ចសហការល្អជាមួយអង្គការ UNFPA ព្រមទាំងមន្រ្តីជើងចាស់របស់អង្គការ ហើយមន្រ្តីទាំងនោះតែងតែសហការគាំទ្រក្រសួងសុខាភិបាល៕ ដោយ ៖ បញ្ញាស័ក្តិ
