ភ្នំពេញ : សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារ ចុះមូលដ្ឋានខេត្តព្រៃវែង និងខេត្តបាត់ដំបង បានបញ្ជាក់ថា កម្ពុជាមិនអនុញ្ញាតឱ្យប្រទេសណាមួយជ្រៀតជ្រែកចូលកិច្ចការផ្ទៃក្នុងកម្ពុជា ឬយកកម្ពុជាធ្វើជាឈ្នាន់ដើម្បីបំផ្លាញប្រទេសណាមួយឡើយ។
ការបញ្ជាក់នេះ ក្នុងកិច្ចប្រជុំបូកសរុបសកម្មភាពការងារគណៈកម្មាធិការគណបក្សខេត្តព្រៃវែង ឆ្នាំ២០២០ និងទិសដៅភារកិច្ចឆ្នាំ២០២១ និងការផ្សព្វផ្សាយរបាយការណ៍ ស្ដីពីសភាពការណ៍ទូទៅ និងការងារគណបក្សឆ្នាំ២០២០ និងទិសដៅភារកិច្ចឆ្នាំ២០២១ របស់គណៈកម្មាធិការកណ្ដាល នៅព្រឹកថ្ងៃទី១៤ ខែកុម្ភៈ ឆ្នាំ២០២១នេះ នៅទីស្នាក់ការគណបក្សខេត្តព្រៃវែង។
សម្តេចក្រឡាហោមបញ្ជាក់យ៉ាងដូច្នេះថា “កម្ពុជាយើងធ្លាប់ជាប្រទេស ដែលទទួលរងគ្រោះដោយសារសង្គ្រាមត្រជាក់រវាងមហាអំណាច រហូតធ្វើឱ្យប្រទេសជាតិធ្លាក់ចូលក្នុងសង្គ្រាមស៊ីវិលដ៏រ៉ាំរ៉ៃ របបប្រល័យពូជសាសន៍ ដែលបានបំផ្លិចបំផ្លាញសង្គមជាតិស្ទើររលាយទាំងស្រុង ទម្រាំទទួលបានសន្តិភាព ស្ថិរភាព និងការអភិវឌ្ឍ ដូចបច្ចុប្បន្ន។ ផ្អែកលើមេរៀនបទពិសោធន៍នេះ រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា បានធ្វើការដឹកនាំ គ្រប់គ្រងប្រទេសប្រកបដោយភាពបត់បែន ប្រកាន់ជំហរអព្យាក្រឹត និងមិនជ្រៀតជ្រែកចូលកិច្ចការផ្ទៃក្នុងរបស់ប្រទេសដទៃទៀត ហើយក៏មិនអនុញ្ញាតឱ្យប្រទេសណាមួយជ្រៀតជ្រែកចូលកិច្ចការផ្ទៃក្នុងកម្ពុជា ឬយកកម្ពុជាធ្វើជាឈ្នាន់ដើម្បីបំផ្លាញប្រទេសណាមួយឡើយ។ ”
យោងតាមរបាយការណ៍កម្មភាពការងារគណៈកម្មាធិការគណបក្សខេត្តព្រៃវែង បានឲ្យដឹងថា ក្រោមការដឹកនាំរបស់សម្តេចក្រឡាហោម ស ខេង ក្រុមការងារគណបក្សចុះមូលដ្ឋានជួយខេត្តព្រៃវែងគ្រប់ថ្នាក់ បានរួមសហការជាមួយគណៈកម្មាធិការគណបក្សខេត្ត ដោយមានជាជួយឧបត្ថម្ភជាសម្ភារ ថវិកាពីបណ្តាសប្បុរសជន អាជីវករ ពាណិជ្ជករ ដែលមានការជឿជាក់លើការដឹកនាំរបស់គណបក្សប្រជាជនកម្ពុជា តែងបានសហការជាមួយគណបក្សមូលដ្ឋាន ចុះជួបនឹងប្រជាពលរដ្ឋតាមខ្នងផ្ទះ ដើម្បី អប់រំ អំពីការចូលរួមអនុវត្តវិធានការណ៍នានា ដើម្បីទប់ស្កាត់ជំងឺរាតត្បាតកូវីដ-១៩ កុំឲ្យមានការឆ្លងរាលដាលចូលក្នុងសហគមន៍ ការចូលរួមជួយប្រជាជនដែលរងគ្រោះដោយជំនន់ទឹកភ្លៀង និងបានចូលរួមស្តាប់មតិ យោបល់ការថ្នាំងថ្នាក់ ក៏ដូចជាសំណូមពរនានាពីគាត់ដើម្បីដោះស្រាយ ឬ រាយការណ៍ជូនថា្នក់លើ ហើយបានណែនាំឲ្យពួកគាត់ចូលរួមការពារ សន្តិភាព ស្ថិរភាពនៅតាមមូលដ្ឋាន ទប់ស្កាត់រាល់ឧបាយកលក៏ពិសពុលរប់ក្រុមឧទ្ទាមប្រឆាំងជ្រុលនិយម ដែលនៅតែមានគោលបំណងផ្តួលរំលំរាជរដ្ឋាភិបាលស្រប់ច្បាប់ តាមរយៈបដិវត្តន៍ពណ៌ ព្រមទាំងណែនាំ អប់រំ ដល់គ្រប់សមជិកគណបក្សទាំងអស់ ត្រូវតែគោរពច្បាប់របស់ព្រះរាជណាចក្រកម្ពុជា៕ រក្សាសិទ្ធិដោយ: ចេស្តារ