កំពង់ចាម ៖ ករណីគ្រោះថ្នាក់ចរាចរដ៏គួរឲ្យរន្ធត់នៅលើផ្លូវជាតិលេខ៦ស្ថិតចំណុច ភូមិបែកពាង ឃុំជាលា ស្រុកបាធាយ ខេត្តកំពង់ចាម រវាងរថយន្តម៉ាកហ៊ីយ៉ាន់ដាយបានបត់ត្រឡប់ក្រោយនៅទទឹងថ្នល់ ត្រូវបានរថយន្តក្រុងដឹកអ្នកដំណើរមួយគ្រឿង របស់ក្រុនហ៊ុនអូឡាំពិក ធ្វើដំណើរពីសៀមរាបទៅភ្នំពេញ ដែលមានអ្នកដំណើរជិះក្នុងរថយន្តចំនួន ១៩នាក់ បើកទៅបុកចំកណ្តាលរថយន្តហ៊ីយ៉ាន់ដាយ កាលពីវេលាម៉ោង១និង៣០នាទីរំលងអធ្រាត្រថ្ងៃទី២៧ ខែកុម្ភៈ ឆ្នាំ២០១៨ នៅចំណុចផ្លូវជាតិលេខ៦ ស្ថិតក្នុងភូមិបែកពាង ឃុំជាលា ស្រុកបាធាយ ខេត្តកំពង់ចាម។
ក្នុងឧប្បត្តិវហេតុនោះបណ្ដាលឲ្យសា្លប់អ្នកបើកបររថយន្តក្រុង១នាក់ ឈ្មោះកែវ សាវុធ អាយុ៣៧ឆ្នាំ នៅភូមិជ្រលង ឃុំប្រាសាទ ស្រុកកំពង់ត្របែក ខេត្តព្រៃវែង និងរបួសមនុស្សជាអ្នកដំណើរចំនួន១៩នាក់ ស្រី១០នាក់ ដែលរួមមាន ៖
ជនជាតិខ្មែររបួស៤នាក់ (ស្រី៣នាក់ ធ្ងន់៣ ស្រាល១) ជនជាតិថៃ៣នាក់ (ធ្ងន់១ ស្រាល២),ជនជាតិបារាំង ២នាក់ (ស្រី១ របួសស្រាល២),ជនជាតិអាឡឺម៉ង់៤នាក់ (ស្រី១ របួសស្រាល៤),ជនជាតិអ៊ីស្រាអែល២នាក់ របួសស្រាល,ជនជាតិអង់គ្លេស៣នាក់ (ធ្ងន់១ ស្រាល២),ជនជាតិចិន១នាក់ របួសធ្ងន់។ សរុបអ្នករបួសធ្ងន់៦ របួសស្រាល១៣ និងស្លាប់តៃកុងរថយន្តក្រុង១នាក់។
ប្រភពពីមន្ត្រីនគរបាលនៅកន្លែងកើតហេតុ បានឱ្យដឹងថា រថយន្តម៉ាកហ៊ីហាន់ដាយ ពាក់សា្លកលេខ ព្រះសីហនុ 3A-2983 បើកបរពីជើងទៅត្បូង រួចបត់ឆ្លងផ្លូវ បានបុកជាមួយនឹងរថយន្តក្រុងក្រុមហ៊ុនអូឡាំពិកដឹកអ្នកដំណើរ បើកបរពីត្បូងទៅជើងក្នុងទិសដៅស្របគ្នា។
ក្រោយពេលកើតហេតុ សមត្ថកិច្ចបានចុះធ្វើការវាស់វែង និងនាំយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលស្រុកបាធាយ រង់ចាំដោះស្រាយតាមនីតិវិធី។ ចំណែកជនរងគ្រោះត្រូវសមត្ថកិច្ចដឹកបញ្ជូនយកទៅព្យាបាលនៅមន្ទីរពេទ្យរាជធានីភ្នំពេញ និងបានប្រគល់សាកសពជូនក្រុមគ្រួសារ៕ ដោយ៖បញ្ញាស័ក្តិ