ក្រុមមន្ត្រីបាននិយាយថា យ៉ាងហោចណាស់អ្នកដំណើរ ៣២ នាក់បានស្លាប់និងជាច្រើននាក់ទៀតបានបាត់ខ្លួនកាលពីថ្ងៃអង្គារ បន្ទាប់ពីរថយន្តក្រុងដឹកអ្នកដំណើរមួយគ្រឿងបានធ្លាក់ពីលើផ្លូវហើយបានធ្លាក់ចូលប្រឡាយមួយនៅភាគកណ្តាលរដ្ឋ Madhya Pradesh ប្រទេសឥណ្ឌា។
មនុស្ស ៧ នាក់ត្រូវបានជួយសង្គ្រោះ។ ឧប្បត្តិហេតុនេះបានកើតឡើងនៅជិតភូមិប៉ាណា (Patna)ស្រុកស៊ីឌី (Sidhi) ចម្ងាយប្រហែល ៤៩៣ គីឡូម៉ែត្រភាគខាងកើតនៃបូប៉ាល់ដែលជារដ្ឋធានីនៃរដ្ឋ Madhya Pradesh ។
បើតាមមន្ត្រីបានឲ្យដឹងថារថយន្តក្រុងបន្ទាប់ពីបានធ្លាក់ចូលប្រឡាយហើយបានលិចទាំងស្រុង។ ក្រោយឧប្បត្តិហេតុនេះអាជ្ញាធរបានប្រញាប់ប្រញាល់បញ្ជូនក្រុមជួយសង្គ្រោះទៅកាន់កន្លែងកើតហេតុដើម្បីធ្វើការស្វែងរកអ្នកដែលបាត់ខ្លួន។
មន្ត្រីនៅការិយាល័យចៅក្រមស្រុកស៊ីឌីបាននិយាយថា “រហូតមកដល់ពេលនេះសាកសព ៣២ នាក់ត្រូវបានរកឃើញពីប្រឡាយ ហើយការស្វែងរកអ្នកដែលកំពុងបាត់ខ្លួន” ។ មនុស្ស ៧ នាក់ត្រូវបានជួយសង្គ្រោះហើយប្រតិបត្ដិការស្វែងរកកំពុងដំណើរការ។
នាយករដ្ឋមន្ត្រី Madhya Pradesh លោក Shivraj Singh Chouhan បានពណ៌នាឧប្បត្តិហេតុនេះថាជាសោកនាដកម្មបំផុត។ គ្រោះថ្នាក់ចរាចរណ៍ដែលបណ្តាលឱ្យស្លាប់ច្រើនតែកើតមានជាទូទៅនៅក្នុងប្រទេសឥណ្ឌាដែលភាគច្រើនបណ្តាលមកពីការផ្ទុកលើសទម្ងន់ស្ថានភាពមិនល្អនៃផ្លូវនិងការបើកបរមិនប្រុងប្រយ័ត្ន៕ ប្រភព៖ ស៊ីនហួ
