ក្រុមហ៊ុនផ្សារមូលបត្រកម្ពុជា (ផ.ម.ក) នឹងមានរៀបចំកម្មវិធីប្រកួតជួញដូរភាគហ៊ុនជាលើកទីប្រាំ ដែលនឹងប្រព្រឹត្តទៅចាប់ពីថ្ងៃទី ២២ ខែមីនា ឆ្នាំ ២០២១ ដល់ថ្ងៃទី ១៧ ខែមិថុនា ឆ្នាំ ២០២១។
ការប្រកួតមានគោលដៅលើកទឹកចិត្តសាធារណជន ក៏ដូចជាវិនិយោគិន ឱ្យចូលរួមស្វែងយល់ពីទីផ្សារមូលបត្រឱ្យកាន់តែ ទូលំទូលាយ និងចូលរួម វិនិយោគឱ្យកាន់តែសកម្ម ដើម្បីធ្វើឱ្យទីផ្សារមួយនេះកាន់តែមានប្រយោជន៍ សម្រាប់សហគ្រាសក្នុងស្រុក និងវិនិយោគិននានា។
សូមបញ្ជាក់ថា ក្នុងអំឡុងពេលប្រកួត អ្នកចុះឈ្មោះចូលរួមជោគជ័យទាំងអស់នឹងធ្វើការជួញដូរជាមួយកម្រៃជើងសារក្នុង អត្រាទាបជាងធម្មតា (០,២៥% ) និងមិនមានកម្រៃជើងសារ អប្បបរមា។
ជ័យលាភីកំពូលចំនួនបីរូប ដែលបានជួញដូរទទួលបានអត្រាចំណេញជាភាគរយច្រើនជាងគេ នឹងទទួលបានរង្វាន់ជាទឹកប្រាក់ចំនួន ៨ .000.000 រៀល, ៥.000.000 រៀល, និង ៣.000.000 រៀល រួមជាមួយនឹងពានរង្វាន់ជ័យលាភីពី ផ.ម.ក.។ ក្រៅពីនេះ ផ.ម.ក.នឹងផ្តល់ជូនជារង្វាន់លើកទឹកចិត្តដល់បេក្ខជនជ័យលាភីទទួលចំណាត់ថ្នាក់ ទី៤ ដល់ ទី៦ ក្នុងម្នាក់ៗ ចំនូន១.០០០.០០០រៀល ផងដែរ។ ពានរង្វាន់វិនិយោគិនសកម្មនឹងត្រូវផ្តល់ជូនចំពោះវិនិយោគិន ដែលបានជួញដូរក្នុងទំហំទឹកប្រាក់ច្រើនជាងគេ ធៀបនឹងទុនដើមគ្រា ដែលនឹងទទួលបានរង្វាន់ជាទឹកប្រាក់ចំនួន ៤.០០០.០០០ រៀល។
លើសពីនេះ ជ័យលាភីទាំង៧រូប នឹងក្លាយជាអតិថិជនVIP របស់គ្រប់ក្រុមហ៊ុនមូលបត្រ និងទទួលបានកម្រៃជើងសារពិសេស រហូតដំណាច់ឆ្នាំ ២០២៣។ ការចុះឈ្មោះចូលរួមប្រកួតនឹងចាប់ផ្តើមពីថ្ងៃនេះ រហូតដល់ ថ្ងៃទី ១៧ ខែមីនា ឆ្នាំ២០២១ តាមរយៈ bit.do/csxcompetition៕ រក្សាសិទ្ធិដោយ៖ CEN
