ខេត្តព្រះសីហនុ ៖ ទីបញ្ជាការជួរមុខគណៈកម្មាធិការជាតិសន្តិសុខលម្ហសមុទ្រ បានរៀបចំពិធីបើកវគ្គបណ្តុះបណ្តាលស្តីពី លក្ខណៈជីវសាស្ត្រ វិធីសាស្ត្រជួយសង្គ្រោះ បច្ចេកទេសដាក់ស្លាកសម្គាល់ និងការអភិរក្សអណ្តើកសមុទ្រ។
វគ្គបណ្ដុះបណ្ដាលនេះរៀបចំកាលពីព្រឹកថ្ងៃអង្គារ ទី២៧ ខែកុម្ភៈ ឆ្នាំ២០១៨ ក្រោមវត្តមាន ឯកឧត្តម ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ ដោយមានការអញ្ជើញចូលរួមពី ឯកឧត្តម មេបញ្ជាការរង ឯកឧត្តម អនុប្រធាននាយកដ្ឋាន កម្លាំងទីបញ្ជាការជួរមុខ និងមន្ត្រីស្ថាប័នគន្លឹះមួយចំនួនទៀត។ វគ្គបណ្តុះបណ្តាលនេះ ចូលរួមសហការ ដោយអង្គការសម្ព័ន្ធសត្វព្រៃ និងធម្មជាតិ ប្រចាំប្រទេសកម្ពុជា មានរយៈពេល ២ថ្ងៃ ចាប់ពីថ្ងៃទី២៧ ដល់ ទី២៨ ខែកុម្ភៈ ឆ្នាំ២០១៨។ វគ្គបណ្ដុះបណ្ដាលនេះ ក្នុងគោលបំណងរួមសហការគ្នា ដើម្បីអភិរក្សធនធានធម្មជាតិផ្សេងៗក្នុងបាតសមុទ្រ ជាពិសេសសត្វអណ្តើកសមុទ្រ អោយបានគង់វង្ស៕ ដែន សីមា