ខេត្តព្រះសីហនុ៖ ស្នងការដ្ឋាន នគរបាលខេត្តព្រះសីហនុ បានឲ្យដឹងថា នៅវេលាម៉ោងប្រមាណ១១ និង២៥នាទី ថ្ងៃទី២៦ ខែកុម្ភៈ ឆ្នាំ២០១៨ លើផ្លូវបេតុង ក្នុងតំបន់សេដ្ឋកិច្ចពិសេស ឃុំបិតត្រាំង ស្រុកព្រៃនប់ ខេត្តព្រះសីហនុ មានគ្រោះថ្នាក់ចរាចរណ៍មួយកើតឡើង រវាងរថយន្តបែនដឹកដី១គ្រឿងម៉ាក ASIA ពណ៌ខៀវ ពាក់ស្លាកលេខ ព្រះសីហនុ3A-0212 បានបុកបុរសម្នាក់ស្លាប់ភ្លាមៗនៅកន្លែងកើតហេតុ និងស្ត្រីម្នាក់ទៀតរងរបួសធ្ងន់។
សមត្ថកិច្ច ឲ្យដឹងថា ជនរងគ្រោះទាំងពីរខាងលើ មានលំនៅដ្ឋាននៅក្នុងមូលដ្ឋានឃុំបិតត្រាំង ស្រុកព្រៃនប់ ខេត្តព្រះសីហនុ។ ចំណែកអ្នកបើកបររថយន្ត សមត្ថកិច្ច បញ្ជាក់ថា នៅមិនទាន់ស្គាល់អត្តសញ្ញាណអ្នកបើកបរនៅឡើយទេ ហើយគ្រោះថ្នាក់នេះ មានទិសដៅពីលិចទៅកើតស្របគ្នា ដោយពេលជួបគ្រោះថ្នាក់ រថយន្តដឹកដី បានបើកបត់ឆ្វេង ត្រឡប់ថយក្រោយ ក៏បុកនឹងម៉ូតូ ១គ្រឿង ម៉ាកសេ១០០កូរ៉េ ពណ៌ខៀវ គ្មានផ្លាកលេខ អ្នកបើកបរឈ្មោះ នួន រ៉ាវី ភេទប្រុស អាយុ៥១ឆ្នាំ ដឹកប្រពន្ធឈ្មោះ អ៊ិន សារ៉ា ភេទ ស្រី អាយុ ២២ឆ្នាំ មានទីលំនៅភូមិគគីរ ឃុំបិតត្រាំង ស្រុកព្រៃនប់ ដែលមានទិសដៅស្របគ្នា។
គ្រោះថ្នាក់នេះ បានបណ្ដាលឲ្យឈ្មោះនួន រ៉ាវី អ្នកបើកបរម៉ូតូ ត្រូវរថយន្តកិនចំក្បាលស្លាប់ នៅនឹងកន្លែងកើតហេតុ និងភរិយាឈ្មោះ អ៊ិន សារ៉ា រងរបួសធ្ងន់បានបញ្ជូនទៅសង្គ្រោះនៅគ្លីនិកមិត្តភាព។
ភ្លាមៗនោះ អ្នកបើកបររថយន្ត ដឹកដីបង្កគ្រោះថ្នាក់ចរាចរណ៍ ក៏បានគេចខ្លួនបាត់ មុនពេលសមត្ថកិច្ច ចុះទៅដល់ទីកន្លែងកើតហេតុ។ យ៉ាងនេះក្តី សមត្ថកិច្ចកំពុងតាមស្វែងរកជនបង្កហេតុយកមកទទួលខុសត្រូវចំពោះមុខច្បាប់។
ចំណែករថយន្ត និង ម៉ូតូ ត្រូវសមត្ថកិច្ចបាននាំយកមករក្សាទុកនៅអធិការដ្ឋាននគរបាលស្រុកព្រៃនប់៕ ដោយ ៖ ប៊ួន ណារិទ្ធ
