សៀមរាប ៖ ការត្រួតពិនិត្យ និងទប់ស្កាត់រាល់ការហូរចូល នៃគ្រឿងញៀននៅតាមតំបន់ព្រំដែនប្រទេស គឺជាវិធានការដ៏មានប្រសិទ្ធភាពបំផុតដែលយុទ្ធសាស្ត្រនេះ មិនអាចកាត់ផ្តាច់បានពីវត្តមានរបស់ការិយាល័យ BLO ទាំង១៤កន្លែងនៅទូទាំងប្រទេសដែលបាននិងកំពុងដើរតួនាទីស្នូលក្នុងការសម្របសម្រួលទាំងក្របខ័ណ្ឌជាតិ និងអន្តរជាតិក្នុងការផ្លាស់ប្តូរព័ត៌មានឱ្យគ្នាទៅវិញទៅមកទាក់ទងទៅនឹងបទល្មើសគ្រឿងញៀន និងឈានទៅបង្ក្រាបទាន់ពេល នេះបើតាមការអះអាងពីលោកនាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ដែលជាអធិបតីភាពសិក្ខាសាលាពិគ្រោះយោបល់ថ្នាក់ជាតិ សម្រាប់ការិយាល័យទំនាក់ទំនងព្រំដែន BLO កាលពីថ្ងៃទី២៧ខែកុម្ភៈឆ្នាំ២០១៨នៅខេត្តសៀមរាប។
លោក នាយឧត្តមសេនីយ៍ មាស វិរិទ្ធ បានបញ្ជាក់ថា រាជរដ្ឋាភិបាលកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀន បានចាត់វិធានការគ្រប់បែបយ៉ាងតាមរយៈការ ដាក់ចេញនូវផែនការយុទ្ធនាការប្រឆាំងគ្រឿងញៀនខុសច្បាប់លើកទី១ និងលើកទី២ បានធ្វើការផ្សព្វផ្សាយអប់រំពីផលប៉ះពាល់និងគ្រោះថ្នាក់នៃគ្រឿងញៀនគ្របដណ្តប់ទៅលើក្រុមគោលដៅចំនួន ៩.៦៤០.០២១នាក់ និងធ្វើការបង្ក្រាបបទល្មើសបានចំនួន៨.១៧០ករណីចាប់ជនសង្ស័យបានចំនួន១៧.៧៩៥នាក់ (ស្រី១.៥៨៤នាក់) ដែលក្នុងនោះមានករណីធំៗ មួយ ចំនួនបង្រា្កបបានដោយការិយាល័យ BLO ។
នាយឧត្តមសេនីយ៍ បានលើកឡើងថា សិក្ខាសាលានេះ គឺដើម្បីពិភាក្សាគ្នាអំពីការអនុវត្តការងាររបស់ការិយាល័យទំនាក់ទំនងព្រំដែន BLO រយៈពេល១៦ឆ្នាំកន្លងមកនៅកម្ពុជា និងរិះរកនូវដំណោះស្រាយល្អៗសម្រាប់អនុវត្តបន្តទៅអនាគត ដោយរួមសហការជាមួយបណ្តាប្រទេសនានានៅក្នុងមហាអនុតំបន់ទន្លេមេគង្គប្រឆាំងគ្រឿងញៀន និងឧក្រិដ្ឋកម្មឆ្លងដែន ដោយឆ្នាំ២០១៧កន្លងទៅនេះ។ បណ្តាប្រទេសទាំងអស់នៅក្នុងតំបន់ និងលើសកលលោក នៅតែបន្តទទួលរងការគំរាមកំហែងពីនិន្នាការនៃការដាំដុះ ការផលិត ការចរាចរ និងការប្រើប្រាស់គ្រឿងញៀន ។ ដោយឡែក នៅកម្ពុជាយើងក៏មិនខុសពីបណ្តាប្រទេសទាំងនោះដែរ គឺនៅតែបន្តទទួលរងឥទ្ធិពលពីនិន្នាការនេះ៕ ដោយ៖បញ្ញាស័ក្តិ