ប្រព័ន្ធផ្សព្វផ្សាយក្នុងស្រុកចិន បានរាយការណ៍ឲ្យដឹងថា បុរសម្នាក់ដែលមានជំងឺបេះដូង បានគិតឃើញនូវវិធីតែគត់នេះ «បាចលុយចោល» ដើម្បីទទួលការចាប់អារម្មណ៍ពីអ្នកដំណើរ ដើម្បីមកជួយសង្គ្រោះគាត់ ។
ហេតុការណ៍គួរឲ្យភ្ញាក់ផ្អើលនេះ បានកើតឡើងកាលពីថ្ងៃទី២៤ ខែកុម្ភៈ ស្ថិតនៅខាងក្រៅស្ថានីយ៍រថភ្លើងមួយកន្លែង ក្នុងទីក្រុង Shijiazhuang ខេត្ត Hebei ភាគខាងជើងនៃប្រទេសចិន ។
បុរសម្នាក់នោះដែលមានឈ្មោះថា Li បានកំពុងប្រញាប់រូសរាន់ទៅទិញសំបុត្ររថភ្លើង ដើម្បីធ្វើដំណើរទៅមើលម្តាយរបស់គាត់ ដែលកំពុងឈឺនៅឯផ្ទះស្ថិតក្នុង Qinguangdao ។ ប៉ុន្តែ ជាអកុសល នៅពេលនោះ គាត់ស្រាប់តែមានអារម្មណ៍ឈឺចុកណែនក្នុងទ្រូងយ៉ាងខ្លាំងតែម្តង, នេះបើយោងតាម Hebei Youth Daily ។
Li ដែលពីមុន បានធ្វើការវះកាត់បេះដូង ពុំអាចយកយកថ្នាំលេបសង្គ្រោះបន្ទាន់បានទេ និងសូម្បីតែហៅរកគេជួយ ពុំបានផងនោះ ខណៈអាការឈឺចុកចាប់កំពុងធ្ងន់ធ្ងរបំផុត ។ ហើយភ្លាមៗនោះ គាត់ក៏ដាក់គូទអង្គុយលើ និងក្អកធ្លាក់ឈាមទៀតផង ។
ទោះយ៉ាងណា ជំនួសឲ្យការដេកដួលនៅលើដីដោយគ្មានការជួយសង្គ្រោះ គាត់បានចាប់ផ្តើមគិតឃើញភ្លាមៗ ដោយដកក្រដាសប្រាក់ប្រភេទ ១០០ យ៉ន់ ដើម្បីទាក់ទាញអ្នកដំណើរមានសន្តានចិត្តល្អ ។
សំណាងណាស់ មន្ត្រីប៉ូលីសម្នាក់ឈ្មោះ Lin Xiangsen បានកត់សម្គាល់ និងក៏ប្រញាប់ប្រញាល់មកជួយ ។
Lin និយាយថា៖ «ដំបូង ខ្ញុំបានគិតថា គាត់ប្រហែលជាស្រវឹង ។ ប៉ុន្តែ នៅពេលបានមកដល់ជិត ខ្ញុំបានដឹងថា អ្វីៗកំពុងតែធ្ងន់ធ្ងរសម្រាប់បុរសម្នាក់នោះ» ។
បុគ្គលិកសង្គ្រោះបន្ទាន់ ត្រូវបានហៅមកកាន់កន្លែងកើតហេតុ ហើយពួកគេក៏ប្រញាប់បញ្ជូន Le ទៅសង្គ្រោះនៅឯមន្ទីរពេទ្យភ្លាមៗផងដែរ ។ គ្រូពេទ្យបាននិយាយថា សម្ពាធឈាមរបស់អ្នកជំងឺ បានត្រឡប់ទៅរកកម្រិតធម្មតាវិញហើយ ៕ ចន្ទី
