នាយករដ្ឋមន្ត្រីប្រទេសស្លូវ៉ាគី លោក Robert Fico នឹងធ្វើការផ្តល់ប្រាក់រង្វាន់ចំនួន ១,២លានដុល្លារអាមេរិច ទៅដល់អ្នកទាំងឡាយណាដែលផ្តល់ព៌តមានពីការធ្វើឃាតលើអ្នកកាសែតស៊ើបអង្កេតម្នាក់ ឈ្មោះ Jan Kuciak។ នេះបើតាមការចេញផ្សាយរបស់សារព៌តមានអាមេរិច CNN នៅថ្ងៃនេះ។
អ្នកកាសែតខាងលើ វ័យ ២៧ ដែលធ្វើការឲ្យសារព៌តមាន (Aktuality.sk) និងគូដណ្តឹងរបស់លោក ឈ្មោះ Martina Kušnírová ត្រូវបានគេប្រទះឃើញស្លាប់ កាលពីថ្ងៃច័ន្ទដើមសប្តាហ៏នេះ ដោយមានស្នាមរបួសដោយគ្រាប់កាំភ្លើងនៅលើទ្រូង និងក្បាល។
ពួកគេទាំងពីរនាក់ ត្រូវបានបាញ់ស្លាប់នៅផ្ទះ ស្ថិតនៅតំបន់ Velka Maca ភាគខាងលិចប្រទេសស្លូវ៉ាគី។ ប៉ូលីសបញ្ជាក់ថា អ្នកទាំងពីរប្រហែលស្លាប់នៅចន្លោះ ថ្ងៃព្រហស្បតិ៍ និងអាទិត្យ។
រដ្ឋាភិបាលបានប្រកាសនៅថ្ងៃច័ន្ទដើមសប្តាហ៏ថា ប្រាក់រង្វាន់ទាំងនោះនឹងផ្តល់ឲ្យអ្នកណា ដែលផ្តល់ព័ត៌មានឈានដល់ការចាប់ខ្លួនឧក្រិដ្ឋជន ដើម្បីកាត់ទោសពីបទមនុស្សឃាត៕
