មន្ត្រីការទូតជាន់ខ្ពស់របស់ប្រទេសកូរ៉េខាងត្បូង និងរុស្ស បានឯកភាពគ្នាបង្កើតកិច្ចសហប្រតិបត្តិការការទូត
ឆ្ពោះទៅដោះស្រាយបញ្ហានុយក្លេអ៊ែរកូរ៉េខាងជើង ដោយសន្តិវិធី។ នេះបើតាមសេចក្តីប្រកាសរបស់ក្រសួងការបរទេសកូរ៉េខាងត្បូង ដែលត្រូវចុះផ្សាយដោយសារព៌តមាន Yonhap។
ការប្តេជ្ញាចិត្តរបស់ប្រទេសទាំងពីរ ធ្វើឡើងនៅក្នុងជំនួបរវាងរដ្ឋមន្ត្រីការបរទេសកូរ៉េខាងត្បូង និងរុស្ស៊ីនៅទីក្រុងហ្សឺណែវ ប្រទេសស្វីស។
លោករដ្ឋមន្ត្រីការបរទេសកូរ៉េខាងត្បូង Kang Kyung-wha បានអះអាងបញ្ជាក់ថា កូរ៉េខាងត្បូងនឹងធ្វើការឲ្យជិតស្និទ្ធជាមួយនឹងប្រទេសមហាអំណាចទាំងអស់ ដើម្បីបន្តកិច្ចចរចារជុំវិញបញ្ហានុយក្លេអ៊ែរកូរ៉េខាងជើង និងដើម្បីបន្តការចរចាររវាងកូរ៉េទាំងពីរ។
ចំនែករដ្ឋមន្ត្រីការបរទេសរុស្សីវិញ ឈ្មោះ Sergey Lavrov បានថ្លែងបញ្ជាក់ពីការគាំទ្ររបស់ទីក្រុងមូស្កូ និងឆន្ទៈក្នុងការសហការជាមួយនឹងរដ្ឋាភិបាលក្រុងសេអ៊ូល ដើម្បីជំរុញទំនាក់ទំនងរវាងកូរ៉េទាំងពីរ និងកុំឲ្យមានមិនចុះសំរុងគ្នាទៀត។
សូមបញ្ជាក់ថា ស្ថានភាពនៅឧបទ្វីបកូរ៉េកំពុងមានភាពធូរស្រាលខ្លាំង ដែលមិនធ្លាប់មានក្នុងរយៈពេលប៉ុន្មានឆ្នាំចុងក្រោយនេះ ក្រោយពេលកូរ៉េបងប្អូនទាំងពីរ កំពុងបន្តកិច្ចចរចារ។
កូរ៉េខាងជើងក៏បានបង្ហាញឆន្ទៈក្នុងការចរចារជាមួយនឹងសហរដ្ឋអាមេរិចផងដែរ តែអាមេរិចបញ្ជាក់ថា ខ្លួនអាចចរចារជាមួយនឹងកូរ៉េខាងជើង ក្នុងករណីកូរ៉េខាងជើងយល់ព្រមលុបបំបាត់អាវុធនុយក្លេអ៊ែររបស់ខ្លួន៕ សុភ័ក្ត្រ
