ក្រុមអ្នកស្រាវជ្រាវបានចេញផ្សាយជាសាធារណៈ កាលពីថ្ងៃអង្គារ នូវវីដេអូមួយបង្ហាញពីការសម្លាប់រង្គាលទៅលើស្ត្រីទាសករផ្លូវភេទជនជាតិកូរ៉េជាច្រើននាក់ ដោយទាហានជប៉ុន ក្នុងអំឡុងសង្គ្រាមលោកលើកទី២ ។
វីដេអូឃ្លីប ១៩ វិនាទី ថតនៅថ្ងៃទី១៣ ឆ្នាំ១៩៤៤ បានបង្ហាញភស្តុតាងយ៉ាងជាក់ស្តែង ដែលពួកទាហានជប៉ុន បានបាញ់ និងសម្លាប់នារីកូរ៉េអស់ចំនួន ៣០ នាក់ ដែលបង្ខំឲ្យធ្វើជាទាសករផ្លូវភេទ «ក្នុងនាមជាស្រីកំដរកាមតណ្ហា» ស្ថិតក្នុងទីក្រុង Tengchong ភាគខាងលិចនៃប្រទេសចិន ជិតព្រំប្រទល់ប្រទេសភូមា ។
ឃ្លីបខ្លីនេះត្រូវបានថតដោយកម្លាំងសម្ព័ន្ធមិត្តនៃប្រទេសចិន និងសហរដ្ឋអាមេរិក ហើយត្រូវបានរក្សាទុកនៅក្នុងរដ្ឋបាលកំណត់ត្រារបស់អាមេរិក ។ ក្រុមអ្នកស្រាវជ្រាវកូរ៉េខាងត្បូង បានរកឃើញវីដេអូនេះ និងចេញផ្សាយជាសាធារណៈ ក្នុងអំឡុងពេលសន្និសីទអន្តរជាតិស្តីពីទាសករផ្លូវភេទសង្គ្រាម នៅក្នុងទីក្រុងសេអ៊ួល កាលពីថ្ងៃអង្គារ៍, នេះបើយោងតាម Korea Herald ។
វីដេអូភស្តុតាងបង្កភាពតក់ស្លុតដល់អ្នកទស្សនានេះ បានបង្ហាញឲ្យឃើញនារីរងគ្រោះទាំងនោះដេករដូករណែល ក្នុងស្ថានភាពអាក្រាតស្ទើរគ្មានសម្លៀកបំពាក់ ដែលត្រូវបានបោះបង់ចោលក្រោយពេលសម្លាប់ ខណៈទាហានចិនម្នាក់ត្រូវបានឃើញទំនងជាកំពុងរៀបចំកប់ពួកគេផងដែរ ។
ក្រុមអ្នកស្រាវជ្រាវបានបន្តរកឃើញបន្ថែមស្ត្រីជាទាសករផ្លូវភេទ កើនឡើងរហូតដល់ ៨០ នាក់ នៅក្នុងទីក្រុង Tengchong នៅពេលដែលកងកម្លាំងសម្ព័ន្ធនេះ បានដង្ហើមយកទីក្រុងនេះបានវិញ ពីការកាន់កាប់របស់ជប៉ុន ។ ខណៈដែល ២៣ នាក់ ក្នុងចំណោមនោះ ត្រូវបានចាប់ជាអ្នកទោសដោយកងកម្លាំងអាមេរិក-ចិន ក៏នៅមានអ្នកសេសសល់ផ្សេងទៀតត្រូវបានជឿថា ត្រូវបានសម្លាប់ដោយទាហានជប៉ុន ។
លោក Kang Sung-hyun សាស្ត្រាចារ្យនៅសកលវិទ្យាល័យ Sungkonghoe ក្នុងទីក្រុងសេអ៊ួល បាននិយាយថា៖ «វីដេអូនេះបង្ហាញពីស្ថានភាពជាក់ស្តែង ដែលស្រី្តទាសករផ្លូវភេទទាំងនោះ បានប្រឈមមុខនៅចុងបញ្ចប់នៃសង្គ្រាមនាពេលនោះ ហើយរដ្ឋាភិបាលជប៉ុនបានព្យាយាមបដិសេធសម្លាប់ស្ត្រីទាំងនោះ ដោយកងទ័ពរបស់ខ្លួនឡើយ» ។
រដ្ឋាភិបាលក្រុងសេអ៊ួល បាននិយាយក្នុងសេចក្តីថ្លែងការណ៍ថា ពួកគេសង្ឃឹមថា ការស្រាវជ្រាវនេះនឹងបង្ខំឲ្យជប៉ុនសុំទោសចំពោះបទឧក្រិដ្ឋពេលសង្គ្រាមរបស់ខ្លួន ក្រែងលោប្រវត្តិសាស្ត្រមួយនេះវិលវិញម្តងទៀត ។ ការជំរុញឲ្យសុំទោសបន្ទាន់បែបនេះ គឺជាភាពច្បាស់លាស់មួយ ព្រោះអតីតស្ត្រីទេសករផ្លូវភេទ ដែលត្រូវបានប៉ាន់ប្រមាណមានចំនួន ២០០,០០០ នាក់ ក្នុងសង្គ្រាមលោកលើកទី២ មកទល់ពេលនេះ ពួកគេមានវ័យចាស់ជរាទៅហើយ និងអាចលាចាកលោក មុនពេលទទួលបានភាពយុត្តិធម៌នេះ ៕ ចន្ទី