រាជធានីភ្នំពេញ ៖ ម្ចាស់ហាងនំប៉័ងបាយ៉ង់មានជ័យ មានទីតាំងនៅទល់មុខ បន្ទាយទាហានភូមិភាគពិសេស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មានចិត្តបុណ្យសទ្ធាជ្រះថ្លា បានជាវព្រះពុទ្ធប្បដិមាចំនួន ៥ព្រះអង្គកសាងអំពីថ្មភក់ ដែលមានតម្លៃរាប់ម៉ឺនដុល្លារ យកតាមលំនាំក្បួនខ្នាតរង្វាស់ប្រវែងជ័យភូមិខ្មែរយកទៅតម្កល់ទុកក្នុងស្រុកកំណើតវត្តពោធិគិរីវង្សា ត្រូវបានអភិសេកជាផ្លូវការរួចហើយ ដើម្បីបើកឱ្យពុទ្ធបរិស័ទទីជិតឆ្ងាយគោរពបូជាតាមទំនៀមទម្លាប់ នៃព្រះពុទ្ធសាសនាខ្មែរ។
ពិធីអភិសេកព្រះពុទ្ធប្បដិមានេះ ធ្វើឡើងនៅ វត្តពោធិគិរីវង្សា ហៅ វត្តពោធិរោង ភូមិពោធិរោង ឃុំព្រះបាទ ជាន់ជុំ ស្រុកគិរីវង់ ខេត្តតាកែវ នារសៀលថ្ងៃទី២៨ ខែកុម្ភៈ ឆ្នាំ២០១៨ ដែលមានការចូលរួមពីអ្នកកសាងធំ លោក ឈន អ៊ាន និងភរិយាលោកស្រី គឹម ចាន់ថន ក្រោមការរៀបចំពី ព្រះចៅអធិការ វត្តពោធិគិរីវង្សាព្រះនាម សាំង សារីម ធម្មធរអនុគណ ស្រុកគិរីវង់ ព្រមទាំងពុទ្ធបរិស័ទចំណុះជើងវត្តទីជិតឆ្ងាយយ៉ាងច្រើនកុះករ។
អភិសេក គឺជាការស្រោចទឹកក្លស់ទឹកស័ង្ខ(លើព្រះសិរ្ស៍លោកអ្នកមានបុញ្ញាភិនីហារ)សន្មតឱ្យឡើងពេញទីជាក្សត្រយ៍ទ្រង់រាជ្យ(ម.ព.មុទ្ធាភិសេកផង)។ការប្រោះព្រំបាចសាចគ្រឿងគន្ធពិដោរថ្វាយពរថ្វាយជ័យ ចំពោះព្រះពុទ្ធរូបដែលកសាងថ្មីក៍ហៅអភិសេកដែរ។ អភិសេកព្រះធ្វើតាមដំណើររឿងកាលដែលព្រះសក្យមុនីគោតមទ្រង់បានត្រាស់ជាព្រះពុទ្ធរួចស្រេចហើយក្នុងវេលាភ្លាមៗនោះពួកទេវតានាំគ្នាមកប្រោះព្រំបាចសាចគ្រឿងពិដោរទិព្វថ្វាយពរសព្ទសាធុការថា «ព្រះពុទ្ធឈ្នះមារហើយ ! មារមានចិត្តបាបចាញ់ព្រះអង្គហើយ !។
អ្នកកសាងព្រះពុទ្ធប្បដិមា លោក ឈន អ៊ាន និងអ្នកស្រី គឹម ចាន់ថន រស់នៅ រាជធានីភ្នំពេញ បានចំណាយថវិកាផ្ទាល់ខ្លួនអស់ជាងប្រាំម៉ឺនដុល្លារអាមេរិក ដើម្បីជាវព្រះពុទ្ធប្បដិមាចំនួន ៥ព្រះអង្គខាងលើនេះ។ លោកនិងភរិយាបានជួលជាងចម្លាក់ដ៏ចំណានចេញពីសាលាភូមិន្ទវិចិត្រសិល្បៈ កសាងព្រះពុទ្ធរូប ព្រះពុម្ពគំរូ ទម្ងន់ ៥០តោនឡើងនៅ ភ្នំសន្ទុក ខេត្តកំពង់ធំ ក្នុងឆ្នាំ២០១៥។ ព្រះពុទ្ធប្បដិមាអង្គធំជាងគេទ្រង់សមាធិមួយព្រះអង្គ។ ភូមិសមុទ្រគឺព្រះពុទ្ធ ប្បដិមាទ្រង់ផ្ចាញ់មារចំនួនពីរព្រះអង្គនិងព្រះពុទ្ធប្បដិមាទ្រង់បិណ្ឌបាត្រចំនួនពីរព្រះអង្គ។
ស្ថិតក្នុងទឹកមុខញញឹមរួសរាយរាក់ទាក់ លោក ឈន អ៊ាន ដែលមានភរិយានៅក្បែរខ្លួន ក្នុងវត្តពោធិគិរីវង្សា នៃថ្ងៃ អភិសេកព្រះពុទ្ធប្បដិមាប្រាំព្រះអង្គបានលើកឡើងថា លោកមានគោលបំណងកសាងព្រះពុទ្ធប្បដិមាដាក់នៅក្នុង វត្តនេះជាកន្លែងស្រុកកំណើតដែលលោកធ្លាប់រស់នៅតាំងពីតូចៗទោះជាលោកនិងក្រុមគ្រួសាររកស៊ីមានបានយ៉ាង ណាក៍ដោយក៍មិនភ្លេចស្រុកកំណើតខ្លួន។
លោកបានបញ្ជាក់អំពីការកសាងព្រះពុទ្ធប្បដិមាទាំងប្រាំព្រះអង្គថា«នៅក្នុងព្រះពុទ្ធប្បដិមាចំនួនប្រាំព្រះអង្គនេះទីមួយតំណាងឱ្យនិងដាក់ឈ្មោះលោកឪពុកអ្នកម្តាយបង្កើត។ទីពីរតំណាងឱ្យនិងដាក់ឈ្មោះលោកឪពុកអ្នកម្តាយក្មេក។ទីបីតំណាងឱ្យនិងដាក់ឈ្មោះក្រុមគ្រួសារកូនចៅរបស់ខ្ញុំនិងទីប្រាំតំណាងឱ្យប្អូនៗព្រមទាំងញាតិសន្តាន។
ព្រះចៅអធិការ វត្តពោធិគិរីវង្សា ព្រះនាម សាំង សារីម ធម្មធរអនុគណ ស្រុកគិរីវង់ មានសង្ឃដីកា អំពីអភិសេកព្រះពុទ្ធប្បដិមាខាងលើថាមានព្រះសង្ឃនមស្សការព្រះរតនត្រ័យ។បទុមថ្វាយផ្កាព្រះសង្ឃធ្វើកិច្ចពុទ្ធាភិសេក (សរសើរគុណព្រះពុទ្ធ) មានសូត្រ ធម៌ពាហុំ ជយន្តោ ជាដើម។ល។ ការសូត្រធម៌ ពុទ្ធាភិសេក ស្រែកជ័យឃោសនិងថ្វាយផ្កាចំពោះព្រះពុទ្ធរូបរីឯពុទ្ធបរិស័ទនមស្សការព្រះរតនត្រ័យសមាទានសីល និងនិមន្តព្រះសង្ឃចម្រើនព្រះបរិត្ត។
ធម្មធរអនុគណ ស្រុកគិរីវង់ មានសង្ឃដីកាបន្តទៀតថា អាត្មាភាពមានសេចក្តីសោមនស្សរីករាយយ៉ាងខ្លាំងចំពោះការទទួលបានព្រះពុទ្ធរូបនេះដែលតាំងពីដើមមកពុំមានសប្បុរសជនណាយកមកតម្កល់ទុកក្នុងវត្តនេះទេទើបតែលើកទីមួយហើយដែលបានបងប្រុស ឈន អ៊ាន និងបងស្រី គឹម ចាន់ថន ជាវព្រះពុទ្ធប្បដិមាដ៏ធំ និងមានតម្លៃច្រើនម៉ឺនដុល្លារ មកតម្កល់ទុកក្នុងវត្តនេះ។ រីឯអានិសង្ស នៃអ្នកកសាងព្រះពុទ្ធប្បដិមានេះ រមែងមានតេជៈច្រើន មានកម្លាំងខ្លាំងខ្លា មានបញ្ញាវៀងវៃ និង ឆាប់រួចទុក្ខទាំងពួង។
ពុទ្ធបរិស័ទចំណុះជើងវត្តពោធិគិរីវង្សាសប្បាយរីករាយនិងទទួលយកសមិទ្ធផលថ្មីល្អឯកពុំធ្លាប់មានពីមុនកន្លងមក។ ពួកគាត់នាំគ្នាចូលរួមអបអរសាទរ និងជូនពរម្ចាស់ទានធំ គឺលោក ឈន អ៊ាន និងភរិយាលោកស្រី គឹម ចាន់ថន ដែលបានកសាងព្រះពុទ្ធប្បដិមាខាងលើយកតាមលំនាំព្រះពុម្ពផ្លូវការ របស់ក្រសួងធម្មការនិងសាសនា។
គួរបញ្ជាក់ថា លោក ឈន អ៊ាន និងអ្នកស្រី គឹម ចាន់ថន ធ្លាប់បានបរិច្ចាគ ធនធានផ្ទាល់ខ្លួន ចំនួនជាងមួយម៉ឺន ដុល្លារនាំចាស់ៗរស់នៅឯស្រុកកំណើតចំនួនបួនភូមិទាំងចាស់ទាំងក្មេងចំនួន២៥០នាក់ទៅកម្សាន្តនៅអង្គរវត្តកាល ពីដើមឆ្នាំ២០១៧ដែលធ្វើឱ្យពួកគាត់មួយចំនួនរំភើបអរសប្បាយស្រក់ទឹកភ្នែកនៅមុខអង្គរវត្តខេត្តសៀមរាប។ កន្លង មកពុទ្ធបរិស័ទខ្មែរយើងតែងតែកសាងព្រះពុទ្ធប្បដិមាអំពីបេតុងដែលពុំសូវជាប់បានយូរអង្វែរដូចថ្មភក់ទេ៕ ដែន សីមា
