នាប្រទេសថៃកំពុងមានការរាលដាលរូបភាពរបស់បងប្អូនត្រកូលស៊ីណាវ៉ាត្រា កំពុងស្ថិតក្នុងគ្លីនិកធ្មេញនៅឌូបៃ UAE ។
លោកថាក់ស៊ីន និងអ្នកស្រីយីងឡាក់ ក្នុងគ្លីនិកធ្មេញ នៅឌូបៃ FACEBOOK PEARL DENTAL CLINIC
រូបភាពរបស់លោកថាក់ស៊ីន និងអ្នកស្រីយីងឡាក់ ត្រូវបានគេមើលឃើញក្នុងគណនីហ្វេសបុក ក្នុងគ្លីនិក Pearl Dental Clinic – Best Dental Dubai ។ អតីតនាយករដ្ឋមន្ត្រីទាំង២នាក់នេះ បានថតរូបជាមួយនឹងវេជ្ជបណ្ឌិត Salahudeen Aboobacker ក្នុងគ្លីនិកនេះ។
គេពុំទាន់ដឹងច្បាស់ថា រូបថតនេះត្រូវបានថតនៅពេលណា តែត្រូវបានបង្ហោះលើគណនីហ្វេសបុករបស់គ្លីនិកនេះកាលពីថ្ងៃ ២ កុម្ភៈ ២០១៨ ជាមួយនឹងពាក្យពេចន៍សរសេរថា ៖ “Dr. Salah with his prominent client the former prime minister of Thailand Mr Thaksin Shinawatra, together with his lovely sister Yingluck” (វេជ្ជបណ្ឌិតស្វាគមន៍ជាមួយភ្ញៀវកិក្តិយសអតីតនាយករដ្ឋមន្ត្រីថៃថាក់ស៊ីន ស៊ីណាវ៉ាត្រា និងប្អូនស្រីយីងឡាក់ ជាទីស្រឡាញ់របស់គាត់)។
ថ្វីត្បិតរូបភាពត្រូវបានថតតាំងពីដើមខែកុម្ភៈក្តី ប៉ុន្តែវាទើបទទួលបានចំណាប់អារម្មណ៍ ដោយមនុស្សជាច្រើនបានជឿថា៖ រូបថតនេះត្រូវបានថតនៅពេលលោកថាក់ស៊ីន និងអ្នកស្រីយីងឡាក់ ទៅពិនិត្យធ្មេញនៅឌូបៃ ជប៉ុន ចិន (រួមមានហុងកុង) និងសិង្ហបុរី។
នៅក្នុងដំណើរនេះលោកថាក់ស៊ីន និងអ្នកស្រីយីងឡាក់ បានជួបជាមួយសមាជិកគណបក្សភឿថៃ ដើម្បីក្តាប់សភាពការណ៍ប្រទេសថៃ ហើយ(ចង្អុលដឹកនាំ) ការត្រៀមបម្រុងចូលរួមបោះឆ្នោតសកលប្រព្រឹត្តនៅខែមករា ២០១៩។
តាមប្រព័ន្ធសារព័ត៌មានថៃ លោកថាក់ស៊ីនមានភូមិគ្រឹះនៅឌូបៃ និងឡុងដុង ប្រទេសអង់គ្លេស។ អ្នកស្រីយីងឡាក់ ក្រោយពីភៀសខ្លួនចេញពីប្រទេសថៃ កាលខែសីហា ២០១៧ ក៏ត្រូវបានគេជឿថា កំពុងស្នាក់នៅប្រទេសអង់គ្លេស។ ប៉ុន្តែក្រុងឡុងពុំបញ្ជាក់ពីព័ត៌មាននេះទេ៕ សូយន
