ភ្នំពេញ ៖ ដើម្បីបង្កើនប្រសិទ្ធភាពនៃការទប់ស្កាត់ និងលុបបំបាត់ករណីល្មើសច្បាប់ស្តីពីចរាចរណ៍ផ្លូវគោក ចំពោះរថយន្តដឹកជញ្ជូនទំនិញ និងអ្នកដំណើរ អគ្គស្នងការនគរបាលជាតិ បានធ្វើការណែនាំដល់ស្នងការដ្ឋាននគរបាល រាជធានី ខេត្ត ទាំងអស់ ធ្វើកិច្ចសហការឲ្យបានល្អប្រសើរជាមួយមន្ទីរសាធារណការនិងដឹកជញ្ជូន និងអង្គភាពពាក់ព័ន្ធ ដើម្បីឲ្យនគរបាលគ្រប់រាជធានីខេត្ត បំពេញភារកិច្ចរបស់ខ្លួនឲ្យបានម៉ឺងម៉ាត់ ចំពោះការត្រួតពិនិត្យយានយន្តខុសលក្ខណៈបច្ចេទេស និងត្រូវផាកពិន័យយានយន្តទាំងនោះ ស្របតាមច្បាប់ដែលបានកំណត់ ដើម្បីឲ្យម្ចាស់រាងចាល ដោយក្នុងនោះប្រាក់ដែលប្រមូលបានពីការពិន័យ ត្រូវធ្វើការបែងចែក និងបង់ចូលថវិការដ្ឋ តាមបទបដ្ឋានដែលបានកំណត់ និងត្រូវធ្វើការបែងចែកប្រាក់រង្វាន់លើកទឹកចិត្តចំនួន៧០% ដល់មន្ត្រីចុះអនុវត្តផ្ទាល់។
ក្នុងសេចក្តីជូនដំណឹងរបស់នាយឧត្តមសេនីយ៍ នេត សាវឿន អគ្គស្នងការនគរបាលជាតិ ការងារសំខាន់ដែលតម្រូវឲ្យ នគរបាលអនុវត្តន៍នោះរួមមាន៖ ១. ទន្ទឹមនឹងការត្រួតពិនិត្យការតទ្រុងលើសកំណត់ ត្រូវធ្វើការត្រួតពិនិត្យអំពីលក្ខណៈបច្ចេកទេស រួមមានភ្លើង ចង្កួត ហ្វ្រាំង កង់ ការថែមភ្លៅ ការដឹកជញ្ជូនសំពីងសំពោង ឬលើសកម្រិតកំណត់ និងលិខិតស្នាមពាក់ព័ន្ធ ដូចជាវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត លិខិតអាជីវកម្មដឹកជញ្ជូន ប័ណ្ណសម្គាល់យានយន្ត និងប័ណ្ណបើកបរ។ ២. ត្រូវចាត់វិធានការម៉ឺងម៉ាត់តាមច្បាប់ក្នុងការកាត់ទ្រុងរថយន្តដែលបានតទ្រុងលើសប្រវែង ដែលច្បាប់កណត់ ការដោះភ្លៅដែលបន្ថែមខុសបច្ចេកទេស និងការដឹកជញ្ជូនសំពីងសំពោង ឬលើសកម្រិតកំណត់។
៣. ត្រូវធ្វើការពិន័យគ្រប់ករណីតាមអនុក្រឹត្យលេខ ៤៤ អនក្រ បក ចុះថ្ងៃទី២១ ខែមីនា ឆ្នាំ២០១៧ ស្តីពីការពិន័យអន្តរការណ៍ចំពោះអំពើល្មើស នឹងច្បាប់ស្តីពីចរាចរណ៍ផ្លូវគោក។ ប្រាក់ដែលប្រមូលបានពីការពិន័យ ត្រូវធ្វើការបែងចែក និងបង់ចូលថវិការដ្ឋតាមបទបដ្ឋានដែលបានកំណត់ ក្នុងនោះត្រូវធ្វើការបែងចែកប្រាក់រង្វាន់លើកទឹកចិត្តចំនួន៧០% ដល់មន្ត្រីចុះអនុវត្តផ្ទាល់ពីគ្រប់អង្គភាពនៅតាមគោលដៅ ឲ្យបានឆាប់និងប្រកបដោយតម្លាភាព៕ ដោយ៖បញ្ញាស័ក្តិ