ប៉ូលីសកាលពីយប់មិញ បានធ្វើការចាប់ខ្លួនយាយចាស់ម្នាក់អាយុ ៧៩ ឆ្នាំ នៅក្នុងស្រុក Wong Tai Sin នៃទីក្រុងហុងកុង បន្ទាប់ពីវីដេអូឡាយហ្វេប៊ុកមួយ បានបង្ហាញយាយនេះបានប្រើអំពើហិង្សាទះកំភ្លៀងគ្មានត្រាប្រណីដៃ និងគំរាមសម្លាប់នារីអ្នកបម្រើជនជាតិឥណ្ឌូនេស៊ីម្នាក់ បានរីករាលដាលនៅលើបណ្តាញសង្គម ។
វីដេអូបានបង្ហាញយាយចាស់នោះ បានវាយមកលើអ្នកបំរើរបស់គាត់យ៉ាងសន្ធាប់ នៅត្រង់មុខ និងមាត់ ខណៈនាងអាចត្រូវបានលឺនិយាយថាជាភាសាឥណ្ឌូនេស៊ីថា «ឱ ព្រះអើយ, ខ្ញុំកំពុងរងការដុំហើយ ។ ខ្ញុំមិនអាចទទួលការធ្វើបែបនេះមកលើរូបខ្ញុំឡើយ ។ ហើយនៅចំណុចមួយនោះ យាយចាស់នេះ ក៏បានឃើញយកម្រាមដៃចាក់ថ្ពាល់របស់នាងផងដែរ» ។
ទន្ទឹមនោះផងដែរ យាយចាស់នេះក៏ត្រូវបានលឺនិយាយខ្លាំងៗជាភាសាចិនថា៖ «អ្នកឯងអាក្រក់ណាស់ តើអ្នកឯងបាននិយាយស្អីខ្លះអំពីខ្ញុំ?» ។
ទោះយ៉ាងណា នៅពេលនេះ គេក៏ពុំទាន់ដឹងរឿងរ៉ាវច្បាស់លាស់ស្ថិតពីក្រោយ ដែលនាំឲ្យយាយម្នាក់នេះផ្ទុះកំហឹងយ៉ាងខ្លាំងឡើងញ័រសាច់ មកលើឈ្នួលរបស់ខ្លួនបែបនេះទេ ។
ក្រោយវីដេអូនេះបានរីលរាល ជាលទ្ធផល ម្ចាស់ផ្ទះអាយុ ៧៩ ឆ្នាំ រូបនេះដែលមានត្រកូលឈ្មោះ Pang ត្រូវបានចាប់ខ្លួនពីបទប្រើអំពើហិង្សា និងគំរាមសម្លាប់ ។
ទោះយ៉ាងណា យាយចាស់កំណាចរូបនេះ ត្រូវបានដោះលែងឲ្យនៅក្រៅឃុំ និងវិលត្រឡប់ទៅកាន់ប៉ុស្តិ៍ប៉ូលីសនៅសប្តាហ៍ក្រោយ, នេះបើតាមសេចក្តីរាយការណ៍របស់ Sing Tao Daily ។
Apple Daily រាយការណ៍ថា Pang សព្វថ្ងៃកំពុងនៅក្នុងផ្ទះមួយនៅ Grand View Garden ស្ថិតក្នុងតំបន់ Wong Tai Sin ហើយបានជួលស្ត្រីអ្នកបំរើជនជាតិឥណ្ឌូនេស៊ីអាយុ ៣៥ ឆ្នាំ ម្នាក់ កាលពីឆ្នាំមុន ។ នាងក៏មានកូនប្រុសម្នាក់ដែលរស់នៅ និងធ្វើការនៅចិនដីគោក និងវិលត្រឡប់ទៅកាន់ហុងកុងម្តងសប្តាហ៍ ដើម្បីសួរសុខទុក្ខនាង ៕ ចន្ទី