គ្រូគុនសាវលីញ បានគប់ម្ជុលទម្លុះកញ្ចក់ថ្លាឈ្វេង។
គ្រូគុនសាវលីញ ៣អង្គ ត្រូវបាននិមន្តឲ្យមកចូលរួមសម្តែងសមត្ថភាពក្បាច់គុននៅក្នុងកម្មវិធី The Super Slow Show ដែលផ្សាយបន្តផ្ទាល់លើបណ្តាញសង្គម Youtube នាថ្ងៃទី ២៦ កុម្ភៈ។
ក្នុងខ្សែវីដេអូនេះគ្រូគុន Bruce បានបកស្រាយថា “គប់ម្ជុលទម្លុះកញ្ចក់” គឺជាក្បាច់មួយក្នុងចំណោមក្បាច់ទាំង៧២ របស់ក្បាច់គុនសាវលីញ ហើយដើម្បីធ្វើបានបែបនេះ ទាមទារត្រូវហ្វឹកហាត់រយៈពេលជាង ១០ឆ្នាំឯណោះ។
បន្ទាប់មកគ្រូគុន Feng Fei ចាប់ផ្តើមសម្តែងស្នៀតនេះ។ ដើម្បីអ្នកទស្សនាអាចពិនិត្យឃើញចលនារបស់ម្ជុលអ្នកដឹកនាំកម្មវិធីបានកាន់ប៉េងប៉ោងពណ៌ក្រហមមួយដាក់នៅពីក្រោយកញ្ចក់។
គ្រូគុន Feng Fei បានឈរចម្ងាយពីផ្ទាំងកញ្ចក់ តែមិនដល់១ម៉ែត្រផង មុនពេលគប់ម្ជុលទៅកាន់ផ្ទាំងកញ្ចក់ ហើយប៉េងប៉ោងដែលនៅពីក្រោយកញ្ចក់បានផ្ទុះ។ អ្នកទស្សនាហាក់នៅពុំជឿរហូតដល់ពេលខ្សែវីដេអូបានពន្យឺតល្បឿនបង្ហាញយ៉ាងច្បាស់ថា ម្ជុលបានទម្លុះកញ្ចក់មុនពេលវាធ្វើឲ្យប៉េងប៉ោងផ្ទុះ។
អ្នកដឹកនាំកម្មវិធី Daniel Gruchy ក៏បានសាកល្បងធ្វើបែបនេះ តែពុំអាចទម្លុះកញ្ចក់បានឡើយ ហើយប៉េងប៉ោងក៏នៅដដែលដែរ៕ ចន្ទ្រា
