តាកែវៈ ស្បែកក្រពើខុសច្បាប់ ទម្ងន់ជិត៤តោន ដែលលួចនាំចូលពីប្រទេសវៀតណាម បម្រុងនឹងដឹកជញ្ជូនទៅរាជធានីភ្នំពេញ បន្តទៅកសិដ្ឋានចិញ្ចឹមក្រពើ កែវ ថាយ ត្រូវបានបង្ក្រាបជាក់ស្តែង។
ស្បែកក្រពើខុសច្បាប់ទម្ងន់ ៣៩០០គីឡូក្រាម លួចនាំចូលនូវស្បែកក្រពើ ពីប្រទេសវៀតណាម តាមស្រុកកោះអណ្ដែត ត្រូវបានមន្ត្រីកងរាជអាវុធហត្ថខេត្តតាកែវ ដឹកនាំដោយ លោកវេរសេនីយឯក ង៉ែត ចាន់ធី មេបញ្ជាការរងរាជអាវុធហត្ថខេត្ត បានចុះបង្ក្រាប កាលវេលាម៉ោង៣:៣០នាទី ថ្ងៃទី៣ ខែមីនា ឆ្នាំ២០១៨ នៅចំណុចភូមិសំរោង ឃុំរមេញ ស្រុកកោះអណ្ដែត ខេត្តតាកែវ ហើយ ត្រូវបានដឹកមករក្សាទុកជាបណ្តោះអាសន្ននៅទីបញ្ជាការដ្ឋានកងរាជអាវុធហត្ថខេត្ត ដោយមានការសម្របសម្រួលនីតិវិធី ពី លោក ផាន់ សុភ័ក្រ ព្រះរាជអាជ្ញារង អមអយ្យការសាលដំបូងខេត្ត ដើម្បីប្រគល់ស្បែកក្រពើទាំងនេះជូនខណ្ឌរដ្ឋបាលជលផលខេត្ត ចាត់ការបន្តទៅតាមនីតិវិធីច្បាប់ ។
សូមបញ្ជាក់ដែរថា ស្បែកក្រពើនេះ បម្រុងនឹងដឹកជញ្ជូនទៅរាជធានីភ្នំពេញ បន្តទៅកសិដ្ឋានចិញ្ចឹមក្រពើ កែវ ថាយ ស្ថិតនៅភូមិឡទឹកត្រី សង្កាត់កំពង់ឆ្នាំង ខេត្តកំពង់ឆ្នាំង ដើម្បីនាំចេញទៅលក់បន្តនៅប្រទេសថៃ ដែលឈ្មួញនៅប្រទេសថៃ បានបញ្ជាទិញស្បែកក្រពើ ពីប្រទេសកម្ពុជា ចំនួន៣៩០០គីឡូក្រាម គិតជាទឹកប្រាក់២៤.០០០ដុល្លារ ប៉ុន្តែកសិដ្ឋាននេះ មានមិនគ្រប់ទើបលួចនាំយកស្បែកក្រពើពីប្រទេសវៀតណាមដោយខុសច្បាប់ ដើម្បីបង្គ្រប់យកឲ្យម៉ូយនៅប្រទេសថៃ៕ ដោយ៖បញ្ញាស័ក្តិ
