មហាអំណាចយោធាអាស៊ី ចិនបានប្រកាសនៅថ្ងៃច័ន្ទនេះថា ខ្លួនបានបង្កើនការចំណាយលើវិស័យការពារជាតិចំនួន ៨,១ភាគរយៈសំរាប់ឆ្នាំ ២០១៨នេះ ដើម្បីបង្កើនអនុភាពកំលាំងទ័ពរបស់ខ្លួន បន្ទាប់ពីមានការចំណាយតិចកាលពី ២ឆ្នាំមុន។
បើតាមរបាយការណ៏ថវិការរបស់ចិន បានឲ្យដឹងថា ទីក្រុងប៉េកាំងនឹងត្រូវចំណាយ ១,១១លានលានយ័ន (១៧៥ ពាន់លានដុល្លាអាមេរិច) លើវិស័យយោធា។
កាលពីឆ្នាំមុន ប្រទេសចិនបានចំណាយថវិការចំនួន ១៥១ពាន់លានដុល្លាលើវិស័យយោធា ដែលនេះគឺជាការចំណាយលើវិស័យការពារដ៍ច្រើនបំផុត ស្ថិតក្នុងចំណាត់ថ្នាក់លេខ ២ក្នុងពិភពលោក ប៉ុន្តែការចំណាយលើវិស័យយោធាចិននៅតិចជាង អាមេរិចរហូតដល់ ៤ដងឯនោះ ដោយអាមេរិក ចំណាយ ៦០៣ពាន់លានដុល្លារ។ នេះបើតាមវិទ្យាស្ថានអន្តរជាតិដើម្បីសិក្សាយុទ្ធសាស្ត្រ។
ការបង្កើនការចំណាយលើវិស័យការពារចិនដ៏ច្រើននេះនៅតែធ្វើឲ្យសេដ្ឋកិច្ចចិនមានដំណើរទៅមុខក្នុងរយៈពេលប៉ុន្មានឆ្នាំចុងក្រោយនេះ ដោយកាលពីឆ្នាំ ២០១៧ សេដ្ឋកិច្ចចិនមានកំណើន ៦,៩ភាគរយ ហើយនៅឆ្នាំ ២០១៨នេះ រដ្ឋាភិបាលចិននិយាយថា ខ្លួនមានគោដៅឲ្យសេដ្ឋកិច្ចមានកំណើនក្នុងរង្វង់ ៦,៥ភាគរយ៕ សុភ័ក្ត្រ
