ប្រទេសចិននៅថ្ងៃច័ន្ទនេះ បានធ្វើការព្រមានដល់កោះតៃវ៉ាន់ថា ខ្លួននឹងមិនអត់ឱនឲ្យជាដាច់ខាតនូវរាល់ផែនការចង់ផ្តាច់ខ្លួនរបស់តៃវ៉ាន់។ ការព្រមាននេះកើតឡើង ក្រោយពេលមានភាពតានតឹងរវាងចិន និងកោះតៃវ៉ាន់។
បើតាមរបាយការណ៏រដ្ឋាភិបាលចិនដែលអានដោយនាយករដ្ឋមន្ត្រីចិន Li Keqiang បានបញ្ជាក់ថា ទីក្រុងប៉េកាំងនៅតែបន្តប្រកាន់ភ្ជាប់នូវគោលនយោបាយចិនតែមួយ និងគាំទ្រដល់កំណើនសន្តិភាពនៃទំនាក់ទំនងរវាងចិន និងតៃវ៉ាន់ក្រោមកិច្ចព្រមព្រៀងឆ្នាំ ១៩៩២។
“ប៉េកាំងក៏នឹងធ្វើឲ្យរីកចម្រើនដល់ការរួបរួមរបស់ចិនផងដែរ។ ពួកយើងនឹងនៅតែរក្សាជំហរក្នុងការការពារអធិបតេយ្យភាពចិន និងបូរណភាពទឹកដី ហើយពួកយើងនឹងមិនអត់ឱនចំពោះផែនការផ្តាច់ខ្លួន ឬសកម្មភាពណាដែលធ្វើឲ្យតៃវ៉ាន់ឯករាជ្យឡើយ”។
ប្រទេសចិន នៅតែចាត់ទុកកោះតៃវ៉ាន់គឺជាទឹកដីរបស់ខ្លួន ហើយសង្ឃឹមថានឹងរួបរួមជាមួយចិនវិញនៅថ្ងៃអនាគត។ ប្រទេសចិន បានកាត់ផ្តាច់ទំនាក់ទំនងផ្លូវការជាមួយនឹងទីក្រុងតៃប៊ិ ក្រោយពេលប្រធានាធិបតីតៃវ៉ាន់ Tsai Ing-wen បដិសេធមិនទទួលកោះតៃវ៉ាន់ជាផ្នែកមួយរបស់ចិន។
កាលពីសប្តាហ៏មុន ប្រទេសចិនបានសំដែងការខឹងសម្បារយ៉ាងខ្លាំង ក្រោយពេលព្រឹទ្ធិសភាអាមេរិចបានអនុម័តច្បាប់ធ្វើដំណើរ ដើម្បីលើកទឹកចិត្តរបស់មានការធ្វើដំណើរទស្សនៈកិច្ចទៅមករវាង ទីក្រុងវ៉ាស៊ីនតោន និងទីក្រុងតៃប៊ិ ឲ្យបានគ្រប់កំរិត។
សូមបញ្ជាក់ថា អាមេរិចបានកាត់ផ្តាច់ទំនាក់ទំនងការទូតជាមួយនឹងតៃវ៉ាន់ ក្នុងឆ្នាំ ១៩៧៩ ដោយបានទទួលស្គាល់មេដឹកនាំកុម្មុនិស្តចិននៅទីក្រុងប៉េកាំងជារដ្ឋាភិបាលស្នូលនៃចិនតែមួយ៕ សុភ័ក្ត្រ