មជ្ឈដ្ឋានអ្នកវិភាគវាយតម្លៃថា ការដែលអាមេរិកបញ្ជូននាវាផ្ទុកយន្តហោះ USS Carl Vinson មកកាន់វៀតណាម ពុំគ្រាន់តែសំដៅបង្កើនចំណងមិត្តភាពរវាងក្រុងវ៉ាស៊ីនតោន និងហាណូយប៉ុណ្ណោះទេ ប៉ុន្តែវានៅបានបង្កប់សារ១ ដល់បណ្តាប្រទេសពាក់ព័ន្ធ។
នាវាផ្ទុកយន្តហោះ USS Carl Vinson របស់អាមេរិក
តាម CNN អាមេរិកចាត់ទុកដំណើរទស្សនកិច្ចអូសបន្លាយរយៈពេល៤ថ្ងៃ របស់នាវាផ្ទុកយន្តហោះ USS Carl Vinson និងកងនាវិក រួមមានដល់ទៅ៥០០០នាក់ មកកាន់វៀតណាមគឺជាឱកាសប្រវត្តិសាស្ត្រសំដៅបង្កើនចំណងមិត្តភាព ដែលកំពុងមានការលូតលាស់ល្អរវាងវៀតណាម និងអាមេរិក។
ប៉ុន្តែតាមអ្នកវិភាគនោះ ការបញ្ជូននាវាផ្ទុកយន្តហោះនេះ មកកាន់ប្រទេសវៀតណាម នៅមានបង្កប់អត្ថន័យផ្សេងទៀត។
តាំងពីយូរយារណាស់មកហើយ អាមេរិកបានបង្ហាញវត្តមានកងទ័ពជើងទឹកដ៏ខ្លាំងក្លារបស់ខ្លួននៅអាស៊ីអាគ្នេយ៍។ ក្នុងរជ្ជកាលនៃប្រធានាធិបតីអាមេរិកដូណាល់ត្រាំ និងប្រធានាធិបតីមុននោះ លោក Barack Obama ក្រុងវ៉ាស៊ីនតោន បានបង្ហាញជាបន្តបន្ទាប់នូវសកម្មភាពបញ្ជាក់ពី “សេរីភាពនាវាចរណ៍” ដោយបញ្ជូនយន្តហោះចូលជិតកោះទាំងឡាយនៅសមុទ្រចិនខាងត្បូង។
តាម CNN ដដែល នោះទំនាក់ទំនងយោធារវាងអាមដេរិកនិងវៀតណាមកាន់តែត្រូវបានបង្កើនគួរឲ្យកត់សម្គាល់ ចាប់តាំងពីឆ្នាំ ២០១៦ មក ក្រោយពេលដែលប្រធានាធិបតីអាមេរិកពេលនោះគឺលោក Barack Obama បានលុបចោលបទបញ្ជាហាមឃាត់លក់អាវុធរបស់អាមេរិកឲ្យវៀតណាម ដែលបទបញ្ជានេះត្រូវបានអនុវត្តរាប់សិបឆ្នាំកន្លងមកហើយ។
ក្នុងជំនាន់ប្រធានាធិបតីត្រាំ ថ្វីត្បិតតែអាមេរិកបានដកខ្លួនចេញពីសន្ធិសញ្ញាដៃគូពាណិជ្ជកម្មឆ្លងមហាសមុទ្រប៉ាស៊ីហ្វិក (TPP) តែប្រធានាធិបតីត្រាំនៅបន្តរក្សាចំណងទាក់ទងជិតស្និទ្ធជាមួយវៀតណាម។
នៅខែវិច្ឆិកា ២០១៧ ប្រធានាធិបតីត្រាំ បានមកទស្សនកិច្ចផ្លូវការនៅវៀតណាម ក្នុងក្របខណ្ឌនៃដំណើរទស្សនកិច្ចទ្វីបអាស៊ី ដើម្បីពង្រឹងស្មារតីរបស់សម្ព័ន្ធមិត្តរបស់អាមេរិកក្នុងតំបន់។ ក្រោយមកនៅខែមករាឆ្នាំ ២០១៨ រដ្ឋមន្ត្រីក្រសួងការពារជាតិអាមេរិក James Matti បានមកទស្សនកិច្ចនៅប្រទេសវៀតយណាម។
អ្នកជំនាញការ Kirby ឲ្យដឹងថា ដំណើរទស្សនកិច្ចរបស់ USS Carl Vinson លើកនេះ បានបញ្ជូនទៅនូវសារច្បាស់លាស់មួយ ៖ “ម្យ៉ាងអាមេរិកចាប់អារម្មណ៍យ៉ាងខ្លាំងដល់ចំណងទាក់ទងរវាងវ៉ាស៊ីនតោន និងហាណូយ។ ម្យ៉ាងទៀត អាមេរិកចង់ព្រមានទុកថា “យើងខ្ញុំតែងមានវត្តមានជានិច្ចនៅតំបន់ទ្វីបអាស៊ី-ប៉ាស៊ីហ្វិក”៕ សូយន
