មេដឹកនាំជាន់ខ្ពស់បំផុតរបស់កូរ៉េខាងជើង គីម ជុងអ៊ុន បានពិភាក្សាពីការរៀបចំកិច្ចប្រជុំកំពូលជាមួយនឹងបេសកជនដែលបញ្ជូនមកដោយប្រធានាធិបតីកូរ៉េខាងត្បូង ម៉ូន ជេអ៊ីន។ នេះបើតាមការបញ្ជាក់របស់ភាគីទាំងពីរ នៅថ្ងៃអង្គារនេះ ហើយត្រូវបានចុះផ្សាយដោយភ្នាក់ងារសារព៌តមាន AFP។
នេះគឺជាការធ្វើដំណើរលើកដំបូងរបស់គណៈប្រតិភូជាន់ខ្ពស់កូរ៉េខាងត្បូង មកកាន់កូរ៉េខាងជើងក្នុងរយៈពេល ១០ឆ្នាំចុងក្រោយនេះ។ បច្ចុប្បន្នមេដឹកនាំកូរ៉េខាងត្បូង បានដើរតួជាមេអណ្តើកក្នុងសម្របសម្រួលឲ្យមានកិច្ចចរចាររវាង សហរដ្ឋអាមេរិច និងកូរ៉េខាងជើង ក្រោយពេលមានភាពតានតឹងជាមួយគ្នាអស់ជាច្រើនខែមក។
បើតាមការចេញផ្សាយរបស់សារព៌តមានរដ្ឋកូរ៉េខាងជើង KCNA បានឲ្យដឹងថា លោក គីម ជុងអ៊ុន បានស្វាគមន៏យ៉ាងកកក្តៅចំពោះគណៈប្រតិភូមកពីកូរ៉េខាងត្បូង ហើយមន្ត្រីជាន់ខ្ពស់កូរ៉េខាងត្បូងក៏មានជូនសំបុត្រមួយច្បាប់របស់ លោក ម៉ូន ជេអ៊ីន ដល់ លោក គីម ជុងអ៊ុងផងដែរ។
“បន្ទាប់ពី មន្ត្រីជាន់ខ្ពស់កូរ៉េខាងត្បូង បានថ្លែងប្រាប់ពីបំណងរបស់ប្រធានាធិបតីម៉ូន ជេអ៊ីន ក្នុងការបង្កើកឲ្យមានកិច្ចប្រជុំកំពូល លោក គីម ជុងអ៊ុនបានបញ្ជេញទស្សនៈវិញ និងបានសំដែងការយល់ព្រមយ៉ាងពេញចិត្តពេញថ្លើម”។ នេះបើតាម KCNA។
ប៉ុន្តែ ទីក្រុងសេអ៊ូល បាននិយាយថា មិនទាន់មានការព្រមព្រៀងក្នុងការបង្កើតឲ្យមានកិច្ចប្រជុំរវាង លោក គីម ជុងអ៊ុន និង ម៉ូន ជេអ៊ីននៅឡើយទេ។ មន្ត្រីជាន់ខ្ពស់កូរ៉េខាងត្បូង បានថ្លែងថា វាមិនមែនជាកិច្ចព្រមព្រៀងនោះទេ វាគ្រាន់តែជាកិច្ចពិភាក្សាប៉ុណ្ណោះ។
សូមបញ្ជាក់ផងដែរថា បន្ទាប់ពីចូលរួមកិច្ចប្រជុំជាមួយនឹងគណៈប្រតិភូកូរ៉េខាងជើងដែលមានរយៈពេល ៤ម៉ោងរួច លោក គីម ជុងអ៊ុន ក៏ទទួលទានអាហារពេលល្ងាចរួមគ្នាផងដែរ៕ សុភ័ក្ត្រ
