តាមក្យូដូ នៅថ្ងៃ៧ មីនា នេះដោយផ្អែកលើប្រភពច្បាស់ការណ៍មួយចំនួនឲ្យដឹងថា ជប៉ុនមានគម្រោងសហការណ៍ជាមួយអាមេរិក និងកូរ៉េខាងត្បូង ជំរុញឲ្យមានសកម្មភាពត្រួតពិនិត្យបណ្តាមូលដ្ឋាននុយក្លេអ៊ែររបស់កូរ៉េខាងជើង មានមូលដ្ឋានដើម្បីបញ្ជាក់លើបំណងរំសាយនុយក្លេអ៊ែររបស់ក្រុងព្យុងយ៉ាង។
វាលសាកល្បងនុយក្លេអ៊ែរ Ponggye-ri
ប្រភពដដែលឲ្យដឹងថា ជប៉ុនចង់ជំរុញឲ្យកូរ៉េខាងជើង អនុញ្ញាតដល់ភ្នាក់ងាររបស់ស្ថាប័នថាមពលប៉ារមាណូអន្តរជាតិ (IAEA) បានទៅពិនិត្យមើលមូលដ្ឋានប្រទេសនេះ សំខាន់នៅមូលដ្ឋាន Yongbyon ដែលមានចម្ងាយប្រមាណ១០០គីឡូម៉ែត្រ ភាគខាងជើងក្រុងព្យុងយ៉ាង។ ការអំពាវនាវខាងលើនេះ ស្តែងបង្ហាញឲ្យឃើញការពុំពេញចិត្តរបស់ជប៉ុនចំពោះការសន្យាត្រឹមតែផ្អាកករណីសាកល្បងនុយក្លេអ៊ែរ និងកាំជ្រួចរបស់កូរ៉េខាងជើង។ IAEA ពុំបានពិនិត្យមើលផ្ទាល់បណ្តាមូលដ្ឋាននុយក្លេអ៊ែររបស់កូរ៉េខាងជើង តាំងពីអំឡុងពេលស្ថាប័នឃ្លាំមើលនុយក្លេអ៊ែរចំណុះអង្គការសហប្រជាជាតិនេះ ត្រូវបានបណ្តេញចេញពីកូរ៉េខាងជើងកាលពីឆ្នាំ ២០០៩។
ផែនការខាងលើរបស់ជប៉ុន ត្រូវបានលើកឡើងបន្ទាប់ពីកូរ៉េខាងត្បូង ប្រកាសកាលពីថ្ងៃ ៦ មីនាថា ក្រុងសេអ៊ូល បានឯកភាពជាមួយកូរ៉េខាងជើងអំពីការរៀបចំសន្និសីទកំពូលដំបូងរវាងកូរ៉េទាំង២ នៅអំឡុងខែមេសា ក៏ដូចជាការដែលក្រុងព្យុងយ៉ាងបង្ហាញពីបំណងត្រៀមចាប់ផ្តើមចរចាជាមួយអាមេរិក៕ ចន្ទ្រា