អតីតអ្នកស៊ើបការជនជាតិរុស្សីម្នាក់ ឈ្មោះ Sergei Skripal និងកូនស្រីរបស់ខ្លួន ត្រូវបានគេបំពុល
ដោយសារធាតុគីមី នៅក្នុងប្រទេសអង់គ្លេស កាលពីចុងសប្តាហ៏កន្លងទៅនេះ។ នេះបើតាមការបញ្ជាក់របស់ប៉ូលីសអង់គ្លេស។
ប៉ូលីសបានប្រាប់អ្នកសារព៌តមានថា ពួកគេចាត់ទុកហេតុការណ៏ដែលកើតកាលពីថ្ងៃអាទិត្យ គឺជាការប៉ុនប៉ងធ្វើឃាតដោយប្រើសារធាតុគីមី។
លោក Sergei Skripal និងកូនស្រីឈ្មោះ Yulia អាយុ ៣៣ឆ្នាំ បានធ្លាក់ខ្លួនឈឺយ៉ាងធ្ងន់ ក្រោយពេលបានសន្លប់
បាត់បង់ស្មារតីនៅក្បែររបងផ្សារទំនើបមួយស្ថិតក្នុងទីក្រុង Salisbury ភាគខាងត្បូងប្រទេសអង់គ្លេស។ លោកគឺជាអតីតមន្ត្រីយោធារុស្សីដែលត្រូវកាត់ទោសដោយរុស្សី ពីបទស៊ើបការឲ្យប្រទេសអង់គ្លេស។
ប៉ូលីសម្នាក់ ដែលបានទៅដល់កន្លែងកើតហេតុមុនគេ ក៏ធ្លាក់ខ្លួនឈឺផងដែរដែរ និងកំពុងស្ថិតក្នុងស្ថានភាពធ្ងន់ធ្ងរនៅមន្ទីរពេទ្យ។
សូមបញ្ជាក់ថា លោក Sergei Skripal អាយុ ៦៦ឆ្នាំ បានរស់នៅក្នុងប្រទេសអង់គ្លេសចាប់តាំងពីលោកត្រូវបានដោះលែងពីការឃុំខ្លួននៅក្នុងប្រទេសរុស្សីក្នុងឆ្នាំ ២០១០។
គាត់ត្រូវបានតុលាការកាត់ទោសនៅក្នុងប្រទេសរុស្សី ពីបទស៊ើបការណ៏ឲ្យប្រទេសអង់គ្លេស មុនពេលគាត់ទទួលបានសិទ្ធិជ្រកកោនក្នុងប្រទេសអង់គ្លេស ក្រោយពេលមានការដោះដូរអ្នកស៊ើបការណ៏នៅក្នុងឆ្នាំ ២០១០ រវាងប្រទេសរុស្សី និងអាមេរិច៕ សុភ័ក្ត្រ
