ស្ត្រីម្នាក់បានជួបបទពិសោធន៍ជីវិតដ៏ស្លុតរន្ធត់បំផុត នៅពេលដែលនាង ត្រូវទើរនៅលើកញ្ចក់ក្បាលរថយន្តតូច១គ្រឿង និងធ្លាក់ទៅដី ខណៈនាងដើរឆ្លងកាត់ផ្លូវ ។ ហេតុការណ៍ដ៏សាហាវនេះ បានកើតឡើង នៅពេលអ្នកបើកបរម្នាក់ បានបើករថយន្តបុកនាង នៅចំនុចផ្លូវ Ubi Road 1 កាលពីថ្ងៃទី៤ មីនា ។
ការប៉ះទង្គិចដ៏ខ្លាំង បានបណ្តាលឲ្យស្ត្រីក្រីក្រនោះ ត្រូវផ្លោងឡើងទៅទើរនឹងកញ្ចក់រថយន្តបង្កមួយរំពេច មុនពេលធ្លាក់ចុះទៅនឹងដី បន្ទាប់រថយន្តបានឈប់ងក់ ។
ទោះយ៉ាងណា ស្ត្រីនោះ ពុំបង្ហាញឲ្យឃើញស្ថិតក្នុងសភាពរងរបួសធ្ងន់ធ្ងរនោះទេ ដោយនាងបានងើបអង្គុយយ៉ាងស្វាហាប់ ប៉ុន្តែ ហាក់ដូចជាឃើញយកដៃស្ទាបអង្អែលរបួសនៅជើងរបស់នាង ។
ដោយសារតែនាង ពុំអាចងើបឈរបាន ភ្លាមៗនោះ អ្នកបើកបរក៏បានចុះពីរថយន្ត និងប្រញាប់ប្រញាល់ជួយលើកនាង និងឲ្យអង្គុយនៅក្នុងកៅអីខាងក្រោយ ដោយគាត់ពិនិត្យមើលយ៉ាងយកចិត្តទុកដាក់បំផុត មុនពេលបើកបរដឹកនាង ទៅកាន់មន្ទីរពេទ្យ ។
នេះជាទង្វើទទួលខុសដ៏គួរឲ្យសរសើរមួយ ចំពោះអ្នកបើកបររូបនេះ ដែលគាត់ពុំមានចេតនាបើករថយន្តរត់គេចខ្លួន ដើម្បីជៀសផុតពីសំណង ៕
