ជប៉ុនបន្តអំពាវនាវចំពោះសំណើរផ្តួចផ្តើមសម្រាប់ការផលិតយន្តហោះប្រយុទ្ធជំនាន់ថ្មីក្នុងស្រុក ដោយផ្អែកតាមគំរូយន្តហោះប្រយុទ្ធមានស្រាប់នៅលោកខាងលិច ហើយបង្ហាញពីបំណងចង់សហប្រតិបត្តិការជាមួយអង់គ្លេសនិងអាមេរិក ដើម្បីអនុវត្តគ្រោងការណ៍នេះ។
នៅឆ្នាំ ២០១៦ ជប៉ុនបានចំណាយ ៣៥០ លានដុល្លារ ដើម្បីផលិតយន្តហោះ សម្រាប់ពិសោធន៍ ATD-X (X-2) ខុសប្លែកពីលើកមុនសំណើរសុំព័ត៌មាន (RFI) នៅលើកទី ៣នេះ គេបានបញ្ជូនឲ្យតែក្រុមហ៊ុននៅអាមេរិក និងអង់គ្លេសប៉ុណ្ណោះ។
“ជប៉ុន” សង្ឃឹមថា នឹងទទួលបានចម្លើយជាក់លាក់លើផ្នែកស្ថាបត្យកម្មផ្អែកតាមគំរូយន្តហោះមានស្រាប់។ ទម្រង់យន្តហោះប្រយុទ្ធដែលមានស្រាប់បច្ចុប្បន្នត្រូវបានជប៉ុនប្រើប្រាស់នោះរួមមាន ៖ F-35 របស់ក្រុមហ៊ុន Lockheed Martin Corp ឬ F/A-18E/F Super Hornet (Boeing) និង Eurofighter Typhoon របស់ទ្វីបអឺរ៉ុប។
យន្តហោះប្រយុទ្ធក្នុងស្រុករបស់ជប៉ុនថ្មីបំផុតនោះគឺប្រភេទ F-2 ដែលជាផលិតផលបានមកពីកិច្ចសហប្រតិបត្តិការរវាង Mitsubishi (MHI) និង Lockheed Martin ផ្អែកលើគំរូនៃយន្តហោះប្រយុទ្ធពហុមុខងាររបស់អាមេរិក។ នៅលើកនេះ MHI ក៏មានគំរោងចូលរួមក្នុងគ្រោងការណ៍ F-3នេះដែរ។
យន្តហោះផលិតក្នុងប្រទេសជប៉ុន F-2
ការផលិតយន្តហោះប្រយុទ្ធក្នុងស្រុកដោយយកលំនាំតាមគំរូរមានស្រាប់របស់បរទេស អាចធ្វើឲ្យជប៉ុនសន្សំសំចៃបានខ្លះ ប៉ុន្តែវាក៏ត្រូវមានការកាត់ចោលមុខងារទំនើបខ្លះ ជាអាទិ៍គំរោងយន្តហោះបំបាំងកាយ។
តាម Reuters ដែលដកស្រង់សម្តីអ្នកនាំពាក្យ Boeing ឲ្យដឹងថា ៖ “Boeing ក៏កំពុងចាប់អារម្មណ៍យ៉ាងខ្លាំងក្នុងកិច្ចសហប្រតិបត្តិការជាមួយរដ្ឋាភិបាលអាមេរិកនិងជប៉ុន ដើម្បីផ្តល់កំណើតឲ្យកម្មវិធីយន្តហោះប្រយុទ្ធថ្មីក្នុងវិស័យឧស្សាហកម្ម។ ក្រុងតូក្យូក៏នឹងជំរុញឲ្យមានកិច្ចចរចាបឋមជាមួយនឹងអាមេរិកដើម្បីរៀបចំត្រៀមបំរុងថវិកាបន្ថែមសម្រាប់ F-3 សម្រាប់ផែនការបំពាក់យុទ្ធភ័ណ្ឌការពារជាតិរយៈពេល៥ឆ្នាំ ចាប់ពីខែសីហា ឆ្នាំ ២០១៩មក ៕ សូយន