ប្រធានាធិបតីកូរ៉េខាងត្បូង ម៉ូន ជេអ៊ីន នៅថ្ងៃសុក្រនេះ បានសំដែងការអបអរសាទរចំពោះការ ព្រមព្រៀងគ្នា ធ្វើកិច្ចប្រជុំកំពូលរវាងប្រធានាធិបតីអាមេរិច ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន និងបានហៅវាថាជាព្រឹត្តិការណ៏ប្រវត្តិសាស្ត្រសំរាប់សន្តិភាពនៅឧបទ្វីកូរ៉េ។ នេះបើតាមការចេញផ្សាយរបស់សារព៌តមានកូរ៉េខាងត្បូង Yonhap។
លោក ម៉ូន បានសំដែងការសាទរតាមរយៈអ្នកនាំពាក្យរបស់លោក ក្រោយពេល ត្រាំ ព្រមទទួលយកការជួបចរចារជាមួយនឹងលោក គីម ជុងអ៊ុន នៅក្នុងខែឧសភាខាងមុខ។
លោក ម៉ូនថ្លែងដូច្នេះថា “កិច្ចប្រជុំនៅខែមេសា ខាងមុខនឹងត្រូវកត់ត្រាជាព្រឹត្តិការណ៏ប្រវត្តិសាស្ត្រ ដែលទទួលស្គាល់សន្តិភាព។ ប្រសិនបើប្រធានាធិបតី ត្រាំ និង លោក គីម ជួបគ្នាស្របតាមកិច្ចប្រជុំកំពូលរវាងកូរ៉េទាំងពីរ ការលុបបំបាត់អាវុធនុយក្លេអ៊ែរទាំងស្រុងនឹងស្ថិតនៅលើផ្លូវដ៏ត្រឹមត្រូវ។ នៅឧបទ្វីបកូរ៉េ”
សូមបញ្ជាក់ថា ការសុំចរចាររបស់មេដឹកនាំកូរ៉េខាងជើង ជាមួយនឹងមេដឹកនាំអាមេរិច ទំនងជាការវិវឌ្ឍន៏ដ៏ខ្លាំងមួយ ក្រោយពេលមានភាពតានតឹងជាមួយគ្នារយៈពេលជាច្រើនខែ។
កាលពីដើមសប្តាហ៏នេះ គណៈប្រតិភូរបស់កូរ៉េខាងត្បូង បានជួបពិភាក្សាជាមួយនឹងលោក គីម ជុងអ៊ុន ក្រោយមកពួកគេបានធ្វើដំណើរមកអាមេរិចដើម្បីប្រាប់ពីលទ្ធផលនៃកិច្ចប្រជុំរបស់ពួកគេ។
ចំនែកលោក ដូណាល់ ត្រាំបានថ្លែងថា វាគឺជាការវិវឌ្ឍន៏ដ៏អស្ចារ្យ។ លោកពីមុនធ្លាប់និយាយថា គ្មានប្រយោជន៏ទេក្នុងការចរចារជាមួយកូរ៉េខាងជើង។
ទោះយ៉ាងណា លោកបញ្ជាក់ថា ទណ្ឌកម្មរបស់ប្រឆាំងកូរ៉េខាងជើងនឹងនៅតែមានដដែល រហូតដល់មានកិច្ចព្រមព្រៀងមួយកើតឡើង៕ សុភ័ក្រ្ត