តាកែវ៖ ថ្លែងនៅក្នុងពិធីប្រជុំផ្សព្វផ្សាយប្រកាសអន្តរក្រសួងរវាងក្រសួងមហាផ្ទៃ និង ក្រសួងការងារ និង បណ្តុះបណ្តាលវិជ្ជាជីវៈលេខ ៧១៩ប្រ.ក ស្តីពីការងារអធិការកិច្ចហត្ថពលកម្មបរទេសក្នុងព្រះរាជាណាចក្រកម្ពុជា និង សេចក្តីជូនដំណឹងលេខ ១៨៨សជណ.អអ ស្តីពីកាតព្វកិច្ចធ្វើប័ណ្ណ និងសៀវភៅការងារបរទេសរបស់ម្ចាស់សហគ្រាស គ្រិៈស្ថាន កាស៊ីណូ និង ជនបរទេសដែលមកវិនិយោគ ឫប្រកបមុខរបរណាមួយក្នុងព្រះរាជាណាចក្រកម្ពុជា” នាព្រឹកថ្ងៃទី ០៩ ខែមិនា ២០១៨ នៅស្នងការដ្ឋាននគរខេត្តតាកែវ។
លោក អ៊ុន វណ្ណា អភិបាលរងខេត្តតាកែវ បានធ្វើការជំរុញអោយអាជ្ញាធរ មានសមត្ថកិច្ច ជាពិសេសស្នងការរងទទួលផែនអន្តោប្រវេស៏ ត្រូវពិនិត្យឡើងវិញចំពោះជនបរទេសដែលចូលមកធ្វើការងារនៅក្នុងស្រុក ទាំងពួកគេមិនមានទិដ្ឋការ និងប័ណ្ណការងារច្បាស់លាស់ត្រឹមត្រូវតាមច្បាប់ចេញពីក្រុមហ៊ុន ។ ដូច្នេះនៅលើបញ្ហានេះ បន្ទាប់ពីប្រជុំផ្សព្វផ្សាយ និងប្រកាសនៅសេចក្តីជូនដំណឹងនេះទៅបណ្តាក្រុមហ៊ុន រួចហើយ គ្រប់សមត្ថកិច្ចជំនាញជាពិសេសសមត្ថកិច្ចនគរបាលត្រូវតែអនុវត្តទៅតាមច្បាប់ មិនត្រូវមានការយោគយល់អ្វីឡើយ ដើម្បីកុំអោយមានការប៉ះពាល់ទៅដល់ក្រុមហ៊ុនដ៏ទៃទៀតដែលពួកគាត់គោរពទៅតាមគោលការណែនាំរបស់រាជរដ្ឋាភិបាល ។
សូមបញ្ជាក់ផងដែរថា ចំពោះក្រុមហ៊ុន និងបណ្តាស្ថានប័នរោង ចក្រ ការស៊ីណូ ម៉ាស្សាផ្សេងៗដែលមាននៅក្នុងខេត្ត មានចំនួន ១៤២ មានបុគ្គលិកកំពុងបំរើការងារចំនួន ៤៧៥៨៤នាក់ ក្នុងនោះស្រី ៣៩៩២០នាក់ ដោយឡែកចំពោះបណ្តាស្ថាប័នដែលមានជនបរទេសកំពុងបម្រើការងារនោះគឺមានតែ ៣៤ស្ថាប័នតែប៉ុណ្ណោះ ។
ជុំវិញបញ្ហានេះដែលឯកឧត្តមឧត្តមសេនីយ៏ទោ សុខ សំណាង ស្នងការនគរបាលខេត្តតាកែវ បានលើកឡើងថា កន្លងមកម្ចាស់ ឬនាយកសហគ្រាស គ្រឹះស្ថាននិងជនបរទេសដែលមកវិនិយោគ ឬប្រកបមុខរបរណាមួយនៅក្នុងព្រះរាជាណាចក្រកម្ពុជាមួយចំនួន នៅពុំទាន់អនុវត្តកាតព្វកិច្ច និងបន្តគេចវះប្រើប្រាស់ពលករបរទេសដោយពុំបានបំពេញកាតព្វកិច្ចក្នុងការធ្វើប័ណ្ណ សៀវភៅការងារជនបរទេសអោយបានគ្រប់ៗគ្នា បើគិតមកដល់ចុងឆ្នាំ ២០១៧នេះ ។ អាស្រ័យហេតុនេះសូមម្ចាស់ ឬនាយកសហគ្រាស គ្រឹះស្ថាន ការដ្ឋានសំណង់ កាស៊ីណូ ក្លឹបកំសាន្តនានា ដែលកំពុងប្រើប្រាស់ពលករបរទេស និងជនបរទេសដែលខកខានមិនទាន់បានបំពេញកាតព្វកិច្ចធ្វើប័ណ្ណ សៀវភៅការងារជនបរទេសឆ្នាំ ២០១៧កន្លងមក ត្រូវរួសរាន់បំពេញបែបបទបង់អាករប័ណ្ណ សៀវភៅការងារ នេះជាបន្ទាន់ បន្ទាប់ពីស្តាប់ និងបានដឹងពីសេចក្តីជូនដំណឹងលេខ ១៨៨ សជណ.អអ ៕ តាកែវ
