ក្នុងជំនួបជាមួយលោក សាយ សំអាល់ រដ្ឋមន្ត្រីក្រសួងបរិស្ថាន នៅក្នុងសិក្ខាសាលាជាន់ខ្ពស់ ស្តីពីនិរន្តរភាពទីក្រុង នៅក្រោមក្របខ័ណ្ឌកិច្ចប្រជុំកំពូលរបស់រដ្ឋមន្ត្រីបរិស្ថានអាស៊ីបូព៌ា នៅថ្ងៃទី៨ ខែមីនា ឆ្នាំ២០១៨ នាខេត្តសៀមរាប លោកយ៉ាស៊ូ តាកាហាស៊ី អនុរដ្ឋមន្ត្រីទទួលបន្ទុកការងារបរិស្ថាន ពិភពលោក នៃក្រសួងបរិស្ថានជប៉ុន បានបញ្ជាក់ថារាជរដ្ឋាភិបាលជប៉ុន ត្រៀមខ្លួនជាស្រេច ដើម្បី ពង្រឹងកិច្ចសហប្រតិបត្តិការជាមួយកម្ពុជាលើវិស័យបរិស្ថាន តាមរយៈទីភ្នាក់ងារអភិវឌ្ឍន៍អន្តរជាតិរបស់ខ្លួន JICA។
លោក យ៉ាស៊ូ តាកាហាស៊ី បានបញ្ជាក់ថា កន្លងមក ជប៉ុនបានផ្នែកស្តារ និងកសាងហេដ្ឋារចនាសម្ព័ន្ធនិងការចូលរួម ផ្នែកការកាត់បន្ថយការលំបាកប្រជាពលរដ្ឋ ផ្នែកសេដ្ឋកិច្ច លើលកម្ពស់សុខភាព ក៏ដូចជាការផ្គត់ផ្គង់ទឹកស្អាតនៅរាជធានីភ្នំពេញផងដែរ។ ជប៉ុនគ្រោងនឹងសម្របសម្រួលលសហប្រតិបត្តិការបរិស្ថាន ក្នុងប្រធាន បទមួយចំនួន ដូចជា ប្រព្រឹត្តិកម្មសំណល់ ការប្រើប្រាសសំណល់ឡើងវិញ ការប្រែប្រួលអាកាសធាតុ ជីវៈចម្រុះ និងនិរន្តរភាពទីក្រុង។
នៅក្នុងជំនួប លោក សាយ សំអាល់ បានថ្លែងអំណរគុណដល់រាជរដ្ឋាភិបាលជប៉ុន ក្នុងការជួយអភិវឌ្ឍន៍ប្រទេសកម្ពុជា។ លោករដ្ឋមន្ត្រី បញ្ជាក់ថា កម្ពុជាត្រៀមខ្លួនជាស្រេចក្នុងការពង្រឹងកិច្ចសហប្រតិបត្តិការលើវិស័យបរិស្ថានជាមួយជប៉ុនដើម្បីសម្រេចបានការអភិវឌ្ឍប្រកបដោយចីរភាព។
សូមបញ្ជាក់ថា កម្ពុជាធ្វើជាម្ចាស់នៅខេត្តសៀមរាប រយៈពេល៣ថ្ងៃចាប់ពីថ្ងៃទី៨ ដល់ថ្ងៃទី១០ ខែមីនាឆ្នាំ២០១៨ សិក្ខាសាលាជាន់ខ្ពស់ ស្តីពីនិរន្តរភាពទីក្រុង នៅក្រោមក្របខ័ណ្ឌកិច្ចប្រជុំកំពូលរបស់រដ្ឋមន្ត្រី បរិស្ថានអាស៊ីបូព៌ា ដែលជាឱកាសដ៏ពិសេសមួយ សម្រាប់មន្ត្រីជាន់ខ្ពស់ថ្នាក់ជាតិរបស់ស្ថាប័នរដ្ឋាភិបាល ទទួលបន្ទុកលើវិស័យ បរិស្ថាន និងតំណាងស្ថាប័នថ្នាក់ក្រោមជាតិ ក៏ដូចជាភាគីពាក់ព័ន្ធសំខាន់ៗដែលអញ្ជើញមកពី សហគមន៍ អភិវឌ្ឍអន្តរជាតិ ស្ថាប័នសិក្សា និងវិស័យឯកជន ផ្លាស់ប្តូរព័ត៌មាន និងពិភាក្សាគ្នាអំពីបញ្ហា និងគំនិតថ្មីៗ ដើម្បីសម្រេចបានការអភិវឌ្ឍទីក្រុងប្រកបដោយនិរន្តរភាព៕ ដោយ ៖ បញ្ញាស័ក្តិ