“ប្រសិនបើកូរ៉េខាងជើងបាញ់បង្ហោះកាំជ្រួច ប្រធានាធិបតីករ៉េខាងត្បូង Moon Jae-in និងត្រូវកោះប្រជុំក្រុមប្រឹក្សាសន្តិសុខជាតិ” Yonghap បានដកស្រង់សម្តីរបស់មន្ត្រីវិមានខៀវ ដែលនិយាយអំពីការប្រកាសរបស់មេដឹកនាំកូរ៉េខាងជើង Kim Jong-Un ក្នុងជំនួបកាលពីដើមសប្តាហ៍។ “ដូច្នេះទើបថ្ងៃនេះ ខ្ញុំបានសម្រេចចិត្តមិនឲ្យប្រធានាធិបតី Moon ប្រញាប់ភ្ញាក់ពីដំណេកទាំងព្រឹកព្រលឹមទៀត”។
ប្រធានាធិបតីកូរ៉េខាងត្បូង Moon Jae-in (ឆ្វេង) និងមេដឹកនាំកូរ៉េខាងជើង Kim Jong-Un
តាំងពីមុនមកកូរ៉េខាងជើង ច្រើនបាញ់សាកល្បងកាំជ្រួចនៅអំឡុងពេលពីម៉ោង ៤-៥ព្រឹក ។ ក្នុងជំនួបជាមួយបេសកជនពិសេសកូរ៉េខាងត្បូង កាលពីថ្ងៃ ៥មីនា មេដឹកនាំកូរ៉េខាងជើង ក៏បានសង្កត់ធ្ងន់ថា ប្រសិនបើមានបញ្ហាអ្វីកើតឡើង នោះលោកអាចដោះស្រាយបញ្ហាតាមរយៈទូរស័ព្ទផ្ទាល់ជាមួយលោក Moon តាមរយៈខ្សែទូរស័ព្ទ “ក្តៅ” ។
បេសកជនពិសេសកូរ៉េខាងត្បូង Chung Eui-yong នៅថ្ងៃម្សិលមិញនេះ ក៏បានបញ្ជូនពាក្យសម្តីរបស់លោក Kim Jong-Un ប្រាប់ទៅប្រធានាធិបតីអាមេរិក ក្នុងជំនួបដើម្បីពិភាក្សាជុំវិញបញ្ហារំសាយនុយក្លេអ៊ែរនៅឧបទ្វីបកូរ៉េ។ លោក Trump បានទទួលយកពាក្យអញ្ជើញនេះ ប៉ុន្តែពេលវេលានិងទីកន្លែងជួបនៅពុំទាន់បានកំណត់ គ្រាន់តែអះអាងថា នឹងពុំឲ្យហួសខែឧសភា ២០១៨នេះ៕ សូយន