ភ្នំពេញ៖ ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល និងលោក ឃួង ស្រេង អភិបាលនៃគណៈអភិបាលរាជធានីភ្នំពេញ នៅវេលាម៉ោង១០និង៣០នាទីយប់ថ្ងៃទី៩មីនា២០១៨នេះបានអញ្ជើញ ក្នុងពិធីតភ្ជាប់ពីស្ថានីយ៍រាជាយស្ម័យយានពីអាកាសយានដ្ឋានអន្តរជាតិភ្នំពេញចូលរាជធានីភ្នំពេញ ។
មន្ត្រីរដ្ឋបាលរាជធានីភ្នំពេញបានអោយដឹងថា គម្រោងស្ថាបនាពង្រីកផ្លូវ ដាក់លូ និងរៀបចំផ្លូវរថភ្លើងចូលក្នុងអាកាសយានដ្ឋានអន្តរជាតិភ្នំពេញ ធ្វើឡើងនៅលើផ្លូវតាំងកសាង តភ្ជាប់ពីផ្លូវរថភ្លើងក្បែរវត្តតាំងកសាងចូលក្នុងអាកាសយានដ្ឋានអន្តរជាតិភ្នំពេញ ស្ថិតនៅសង្កាត់កាកាបទី២ ខណ្ឌពោធិ៍សែនជ័យ។
លោកទេសរដ្ឋមន្ត្រី បានថ្លែងថា គម្រោងខ្សែរថភ្លើងថ្មីនេះ នឹងបម្រើការដឹកជញ្ជូនសាធារណៈពីស្ថានីយ៍រាជាយស្ម័យយានដល់អាកាសយានដ្ឋានអន្តរជាតិភ្នំពេញ។
គួរបញ្ជាក់ផងដែរថា ផ្លូវរថភ្លើងដែលតភ្ជាប់នាយប់នេះមានប្រវែងជាង១៥០០ម៉ែត្រ ដោយតភ្ជាប់ពីអាកាសយានដ្ឋានអន្តរជាតិភ្នំពេញទៅកំណាត់ផ្លូវរថភ្លើង ដែលនៅជាប់នឹងវត្តតាំងកសាង បន្តចូលទៅក្នុងរាជធានីភ្នំពេញ។ លោកបន្ថែមថា ការស្ថាបនាផ្លូវរថភ្លើងទាំងយប់ទាំងថ្ងៃ ដើម្បីបានបើកឲ្យប្រើប្រាស់នៅពិធីបុណ្យចូលឆ្នាំខ្មែរខាងមុខនេះ។ លោករដ្ឋមន្ត្រីបានចោទជាសំណួរថាមានបងប្អូនខ្លះបានសួរថាហេតុអ្វីជាដាក់រថភ្លើងនៅកណ្តាលផ្លូវរថយន្ត? លោកបានបញ្ជាក់ថា មិនមានបញ្ហានោះទេ បងប្អូនអាចបើករថយន្តនិងម៉ូតូបានជាធម្មតា ហើយសូមមានការប្រុងប្រយ័ត្ននៅពេលមានរថភ្លើងឆ្លងកាត់ម្តងៗ ហើយនៅពេលនេះរថភ្លើងបាននិងកំពុងសាងសង់នៅប្រទេសម៉ិកស៊ីកូចំនួន៣គ្រឿង ដែលក្នុងមួយគ្រឿងៗអាចជិះនិងអង្គុយបានចំនួន៥៦នាក់ ប៉ុន្តែបើឈរបានចំនួនជាង១០០នាក់ក្នុងមួយទូ។ ចំណែកនៅក្នុងព្រលានយន្តហោះ ក៏មានបន្ទប់រង់ចាំសម្រាប់ភ្ញៀវដែលជិះរថភ្លើង ហើយការធ្វើដំណើរចេញព្រលានយន្តហោះចូលទៅទីក្រុងភ្នំពេញ ក្នុងរយៈពេល២៥នាទី ។
លោកបន្តថា “ការស្ថាបនាត្រូវប្រើរយៈពេលយូរបន្តិចដោយជាប់ពាក់ព័ន្ធជាមួយបង្គោលភ្លើង បណ្តាញលូជាដើមយើងគឺធ្វើ យើងអត់ថាទេ នៅក្នុងសង្គមយើង មានអ្នកថា មានអ្នកធ្វើ មានអ្នកឈរមើល មានអ្នកតិទៀន ប៉ុន្តែរាជរដ្ឋាភិបាលអត់មានគំនិតថាទេ គឺមានគំនិតធ្វើយ៉ាងពិតប្រាកដ គឺផ្លូវរថភ្លើងចាប់ពីថ្ងៃទី១៤ខែមករា ហើយគ្រោងនឹងបញ្ចប់ក្នុងខែមេសា គឺធ្វើលឿនណាស់ ហើយអ្នកខ្លះមិនជឿថាយើងអាចធ្វើបានផង ហើយក្បាលរថភ្លើងនឹងមកដល់ស្រុកខ្មែរនាពេលឆាប់ៗនេះ”៕ ដោយ៖កូឡាប
