កណ្តាល ៖ ដើម្បីអបអរសាទរពិធីបុណ្យទន្លេលើកទី៤ នៅខេត្តកណ្តាល លោក ថោង ខុន រដ្ឋមន្ត្រីក្រសួងទេសចរណ៍ និងលោក ម៉ៅ ភិរុណ អភិបាលខេត្តកណ្តាល បានដឹកនាំសកម្មភាពដាំដើមឈើនៅក្នុងសួនអាពាណ៍ពិពាណ៍ តាមមាត់ទន្លេបាសាក់ ក្រុងតាខ្មៅ ដើម្បីបំផុសស្មារតីស្រលាញ់ដើមឈើ និងក្រើនរំឭកឱ្យចូលរួមដាំដើមឈើ សំដៅបង្កើនសោភ័ណភាពដ៏ស្រស់បំព្រងក្នុងទីក្រុង និងភូមិដ្ឋានប្រជាពលរដ្ឋ។
សកម្មភាពខាងលើនេះត្រូវបានធ្វើឡើងនាព្រឹកថ្ងៃទី៩ ខែមីនា ឆ្នាំ២០១៨ ពោលស្របនឹងការចាប់ផ្ដើមពិធីបុណ្យទន្លេលើកទី៤ ដែលមានការចូលរួមពីមន្ត្រីរាជការពាក់ព័ន្ធ ប្រជាពលរដ្ឋ សិស្សានុសិស្សផងដែរ។
លោក ម៉ៅ ភិរុណ បានថ្លែងថា ការដាំដើមឈើនៅពេលនេះជាការឆ្លុះបញ្ចាំងឱ្យឃើញនូវការយកចិត្តទុកដាក់របស់ប្រមុខរាជរដ្ឋាភិបាល ដែលបានជំរុញការអភិវឌ្ឍតំបន់បៃតងនៅតាមបណ្តាក្រុងនីមួយៗ និងលើកទឹកចិត្តឱ្យមានយុទ្ធនាការដាំដើមឈើឡើងគ្រប់ទីកន្លែង ក្រោមពាក្យស្លោក ដាំដើមឈើផ្តើមចេញពីអ្នក ឬ ទេសចរម្នាក់ ដើមឈើមួយដើម និងគូស្រករថ្មីចូលរួមដាំដើមឈើ២ដើមទុកជាអនុស្សាវរីយ៍។
លោករដ្ឋមន្ត្រី ថោង ខុន បានបញ្ជាក់យ៉ាងថា យុទ្ធនាការខាងលើនេះធ្វើឡើងក្នុងគោលបំណងជំរុញសកម្មភាពដាំដើមឈើ ឱ្យក្លាយជាផលិតផលទេសចរណ៍ថ្មីមួយប្រកបដោយការទាក់ទាញ សម្រាប់ភ្ញៀវទេសចរអន្តរជាតិដែលចង់ទទួលបានបទពិសោធន៍ថ្មីៗ ព្រមទាំងជំរុញចលនាក្នុងស្រុក ជាពិសេសការធ្វើដំណើរកម្សាន្តរបស់យុវជន សិស្ស និស្សិត មន្ត្រីរាជការ និងប្រជាពលរដ្ឋទូទៅ។
លោករដ្ឋមន្ត្រីបានបន្តថា ការដាក់ចេញនូវយុទ្ធនាការនេះក៏នឹងរួមចំណែកបង្កើនឧត្តមភាពប្រកួតប្រជែង ក្នុងការអភិវឌ្ឍវិស័យទេសចរណ៍នៅកម្ពុជា។ ជាក់ស្តែង នៅឆ្នាំ២០១៧ កន្លងទៅ ចំនួនទេសចរអន្តរជាតិដែលមកទស្សនាកម្ពុជាមានចំនួនជាង ៥,៦លាននាក់ កើនឡើង ១១,៦% ធៀបនឹងឆ្នាំ២០១៦។ តាមការព្យាករណ៍ នៅឆ្នាំ២០២០ កម្ពុជាអាចនឹងទទួលភ្ញៀវទេសចរអន្តរជាតិជាង ៧លាននាក់។
លោកបានបញ្ជាក់ទៀតថា ការរីកចម្រើននៃវិស័យទេសចរណ៍គឺពិតជាបានរួមចំណែកយ៉ាងខ្លាំងក្នុងការអភិវឌ្ឍសេដ្ឋកិច្ចសង្គម និងលើកកម្ពស់ជីវភាពរបស់ប្រជាពលរដ្ឋ ពិសេសចូលរួមដល់ការសម្រេចនូវយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលអាណត្តិទី៥ ដើម្បីកំណើនការងារ ប្រសិទ្ធភាព និងសមធម៌៕ ដោយ៖បញ្ញាស័ក្តិ
