កណ្ដាល ៖ រដ្ឋមន្ត្រីក្រសួងទេសចរណ៍ បានជំរុញលើកទឹកចិត្តឲ្យអាជ្ញាធរ ប្រជាពលរដ្ឋ ប្រតិបត្តិករទេសចរណ៍ អាជីវករទេសចរណ៍ និងដៃគូអភិវឌ្ឍន៍នានា ត្រូវចូលរួមអភិវឌ្ឍផលិតផលទេសចរណ៍តាមដងទន្លេ ដើម្បីទ្រទ្រង់ដល់ចក្ខុវិស័យនៃការអភិវឌ្ឍទន្លេតាមដងទន្លេ ប្រកបដោយការទទួលខុសត្រូវ។
ក្នុងសិក្ខាសាលាអបអរសាទរពិធីបុណ្យទន្លេលើកទី៤ ក្រោមប្រធានបទ ទន្លេនៃសន្ដិភាព មិត្តភាព និងនិរន្តរភាពទេសចរណ៍ និងពិធីចែកប័ណ្ណសរសើរ លិខិតសរសើរដល់ប្រតិបត្តិករទេសចរណ៍ខេត្តកណ្ដាល នាថ្ងៃទី៩ ខែមីនា ឆ្នាំ២០១៨ ។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួងរៀបចំពិធីបុណ្យទន្លេលើកទី៤បានលើកឡើងថា ប្រមុខដឹកនាំរាជរដ្ឋាភិបាល សម្ដេចតេជោ ហ៊ុន សែន បាននាំមកនូវសន្តិភាព ស្ថិរភាពនយោបាយ ភាពសម្បូរសប្បាយជូនប្រជាពលរដ្ឋខ្មែរ ពិសេសបានជំរុញឲ្យវិស័យទេសចរណ៍មានការរីកចម្រើនជាបន្តបន្ទាប់ តួយ៉ាងដូចជាក្រុងតាខ្មៅ នៃខេត្តកណ្តាលនេះជាដើម ក៏ជាគោលដៅទេសចរណ៍មួយដែលមានសក្តានុពល និងបង្ហាញលទ្ធភាពខ្ពស់ ក្នុងតភ្ជាប់ពីគោលដៅទេសចរណ៍នានាពីរាជធានីភ្នំពេញ ទាំងផ្លូវគោក និងផ្លូវទឹក។
លោករដ្ឋមន្ត្រីក៏បានណែនាំដល់រដ្ឋបាលខេត្តកណ្ដាល មន្ទីរទេសចរណ៍ខេត្តកណ្ដាល និងផ្នែកឯកជនក្នុងវិស័យទេសចរណ៍ រួមមាន៖១៖ ត្រូវយកចិត្តទុកដាក់លើការពង្រឹងលើការគ្រប់គ្រងឧស្សាហកម្មទេសចរណ៍ និងត្រូវពង្រឹងគុណភាពសេវាកម្មទេសចរណ៍ឱ្យបានកាន់តែល្អ និងបដិសណ្ឋារកិច្ចល្អ ដោយត្រូវអនុវត្តតាមច្បាប់ស្ដីពី ទេសចរណ៍ (ត្រូវស្នើសុំអាជ្ញាបណ្ណទេសចរណ៍ស្របតាមមាត្រា៣២ នៃច្បាប់ស្ដីពីទេសចរណ៍) និងស្ដង់ដារគុណភាពសេវាកម្មទេសចរណ៍ ទាំងថ្នាក់ជាតិ និងទាំងថ្នាក់អាស៊ាន ពិសេសគុណភាពម្ហូបអាហារនៅតាមភោជនីយដ្ឋាន និងម្ហូបអាហារនៅតាមដងផ្លូវ។២៖ អភិវឌ្ឍទេសចរណ៍ទីក្រុងតាមដងទន្លេ ដែលមានសក្ដានុពលទាក់ទាញទេសចរណ៍ ដោយផ្ដើមចេញពីការអភិវឌ្ឍទីក្រុងស្អាត ទន្លេសា្អត សេវាកម្មល្អ ដើម្បីចូលរួមទ្រទ្រង់ដល់ចក្ខុវិស័យនៃការអភិវឌ្ឍទន្លេតាមដងទន្លេ ប្រកបដោយការទទួលខុសត្រូវ។ ៣៖ ត្រូវយកចិត្តទុកដាក់អំពីភាពស្អាត អនាម័យរបស់បង្គន់សាធារណៈ ទាំងនៅតាមទីសាធារណៈ នៅក្នុងសណ្ឋាគារ ភោជនីយដ្ឋាន និងតាមសម្បទាទេសចរណ៍ផ្សេងៗទៀត។៤៖ អភិវឌ្ឍផលិតផលទេសចរណ៍តាមដងទន្លេ ដែលរួមមានសហគមន៍ទេសចរណ៍ កសិទេសចរណ៍ និងផ្ទះស្នាក់គំរូ៕ ដោយ ៖ បញ្ញាស័ក្តិ