ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកម្ពុជា និងជាអនុប្រធានគណបក្សប្រជាជនកម្ពុជា បានអះអាងថា នៅក្នុងអាណត្តិទី៦ នៃការបោះឆ្នោតជ្រើសតាំងតំណាងរាស្ត្រក្នុងខែកក្កដាខាងមុខនេះ គណបក្សប្រជាជនកម្ពុជានឹងបញ្ចូលស្ត្រីឲ្យបានច្រើននៅក្នុងបេក្ខភាពតំណាងរាស្ត្រជាស្ត្រី ដើម្បីចូលរួមអនុវត្តន៍នូវគោលយោបាយយេនឌ័រ ហើយថា ស្ត្រីខ្លួនឯងក៏ត្រូវតែជួយខ្លួនឯងផងដែរ តាមរយៈការពង្រឹងនូវសមត្ថភាព ចំណេះជំនាញឲ្យបានខ្ពស់បូករួមជាមួយនិងការចូលរួមគាំទ្រពីស្ត្រីជួយស្ត្រីគ្នាឯងផងដែរ ។
ក្នុងពិធីសំណេះសំណាលអបអរសាទរទិវាអន្តរជាតិនារី ៨មីនា ខួបលើកទី១០៧ ក្រោម ប្រធានបទ ស្ត្រីរួមគ្នារក្សាសន្តិភាពដើម្បីអភិវឌ្ឍន៍ជាតិ នៅព្រឹកថ្ងៃទី៩ ខែមីនា ឆ្នាំ២០១៨នេះ នាទីស្តីក្រសួងមហាផ្ទៃ សម្តេចក្រឡាហោម ស ខេង បានលើកឡើងថា ក្នុងក្របខណ្ឌគណបក្សប្រជាជន ការជ្រើសរើសបេក្ខភាពតំណាងរាស្ត្រនេះ គឺត្រូវបានជ្រើសរើសពីគណបក្សខេត្ត និងក្រុមការងារខេត្ត ដើម្បីយកមកជ្រើសរើសនៅគណបក្សប្រជាជនថ្នាក់កណ្តាល ។
សម្តេចក្រឡាហោម ថា ការជ្រើសរើសបែបនេះ នឹងផ្តល់លទ្ធភាពឲ្យគណបក្សបញ្ចូលស្ត្រីឲ្យបានច្រើននៅក្នុងបេក្ខភាពតំណាងរាស្ត្រជាស្ត្រី សម្រាប់ការប្រកួតប្រជែងការបោះឆ្នោតជ្រើសតាំងតំណាងរាស្ត្រ នីតិកាលទី៦ ខាងមុខនេះ ។
សម្តេចក្រឡាហោម ស ខេង បានលើកឡើងជាឧទាហរណ៍ថា ការលើកកម្ពស់ស្ត្រីឲ្យបានច្រើននេះ គឺបើយើងសម្លឹងមើលបណ្តាប្រទេសលើពិភពលោកនោះ គឺមានតែប្រទេសស៊ុយអែតតែមួយគត់ ដែលបានអនុវត្តន៍បានល្អជាងគេពាក់ព័ន្ធនឹងបញ្ហានេះ ។ ក្នុងនោះ ជាគោលការណ៍នៃយន្តការតែងតាំងសមាសភាពរដ្ឋាភិបាលនោះ គឺស្ត្រី៥០ភាគរយ និងបុរស៥០ភាគរយ ៕ ដោយ៖បញ្ញាស័ក្តិ
