ភ្នំពេញ ៖ លោក ហេង រតនា អគ្គនាយកមជ្ឈមណ្ឌល សកម្មភាពកម្ចាត់មីនកម្ពុជា (ស៊ីម៉ាក់) បានថ្លែងថា អាមេរិកបានបន្តផ្តល់ជំនួយចំនួន៤លានដុល្លារដល់ស៊ីម៉ាក់ សម្រាប់រយៈពេល២ឆ្នាំ ចាប់គិតពីថ្ងៃទី១ ខែមីនា ឆ្នាំ២០១៨ ដល់ថ្ងៃទី២៨ ខែកុម្ភៈ ឆ្នាំ២០១៩ ដើម្បីស្រាវជ្រាវ និងបោសសំអាតកាកសំណល់ ពីសង្គ្រាមបណ្តាខេត្តខាងកើតនៃប្រទេស ជាពិសេសតំបន់គ្រាប់បែកចង្កោម។
លោក ហេង រតនា បានបញ្ជាក់យ៉ាងដូច្នេះថា នៅថ្ងៃទី៩ ខែមីនា ឆ្នាំ២០១៨ នៅទីបញ្ជាការស៊ីម៉ាក់ភ្នំពេញ ខ្ញុំបានទទួលស្វាគមន៍និងពិភាក្សាការងារជាមួយក្រុមមន្ត្រីអនុពន្ធ័យោធាអាមេរិកប្រចាំនៅកម្ពុជា និងក្រុមយោធាចារ្យអាមេរិកមកពីទីបញ្ជាការដ្ឋានអាស៊ីប៉ាស៊ីហ្វិក។ យើងបានពិភាក្សាគ្នាការពង្រឹងកិច្ចសហប្រតិបតិ្តការឡើងវិញ ហើយភាគីអាមេរិកមានចេតនាក្នុងការបង្កើនជំនួយលើការគាំទ្រស៊ីម៉ាក់ឱ្យផ្តល់ការហ្វឹកហ្វឺនជូនប្រទេសដែលកំពុងរងផលប៉ះពាល់ដោយសារសង្គ្រាម។ ក្នុងការពិភាក្សាគ្នានេះ ក៏បានផ្តោតជាពិសេសលើបញ្ហាគ្រាប់បែកជាអាវុធគីមីកាកសំណល់ពីសង្គ្រាមផងដែរ ដែលចាំបាច់ត្រូវបោសសំអាតហើយដែលគិតគូរជាសំខាន់លើមូលដ្ឋានសមត្ថភាពធនធានមនុស្ស សម្ភារៈ និងមធ្យាបាយផងដែរ។ ឆ្លៀតក្នុងឱកាសនេះ សូមបញ្ជាក់ផងដែរថា អង្គភាពស៊ីម៉ាក់បានទទួលព័ត៌មានជាផ្លូវការពីអង្គការNPAថា ស៊ីម៉ាក់និងNPA បានឈ្នះការដេញថ្លៃទទួលជំនួយពីក្រសួងការបរទេសសហរដ្ឋអាមេរិកដែលគំរោងរយៈពេល២ឆ្នាំ (១ មីនា២០១៨ដល់ ២៨ កុម្ភៈ ២០១៩) មានថវិកាសរុប៤លានដុល្លារសហរដ្ឋអាមេរិក ដោយគិតក្នុងឆ្នាំៗចំនួន២លានដុល្លារអាមេរិក។ ជាមួយជំនួយនេះស៊ីម៉ាក់ធ្វើការស្រាវជ្រាវនិងបោសសំអាតកាកសំណល់ពីសង្គ្រាមបណ្តាខេត្តខាងកើតនៃប្រទេសជាពិសេសតំបន់គ្រាប់បែកចង្កោម។
គួររំលឹកថា កាលពីថ្ងៃទី៦ ខែវិចិ្ឆកា ឆ្នាំ២០១៧ អង្គការ NPA ដែលជាអង្គការដៃគូជាមួយស៊ីម៉ាក់ បានផ្តល់ព័ត៌មានថា ស្ថានទូតអាមេរិក បានសម្រេចកាត់ផ្តាច់ជំនួយមនុស្សធម៌របស់ខ្លួនមកស៊ីម៉ាក់ ចាប់ពីដើមខែមករា ឆ្នាំ២០១៨តទៅ ដោយគ្មានការបញ្ជាក់ហេតុផលអ្វីច្បាស់លាស់ឡើយ។ ភ្លាមៗបន្ទាប់ពីប្រកាសផ្តាច់ជំនួយនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឆ្លើយតបភ្លាមៗថា រាជរដ្ឋាភិបាលកម្ពុជា ធានាគ្រប់យ៉ាងដោយឲ្យស៊ីម៉ាក់ បន្តសកម្មភាពរបស់ខ្លួន ដូចដើមមិនមានការដកថយឡើង។
បន្ទាប់ពីមានប្រតិកម្មឆ្លើយតបរបស់រាជរដ្ឋាភិបាលកម្ពុជា ចំពោះគម្រោងផ្តាច់ជំនួយនេះ ស្រាប់តែនៅថ្ងៃទី១៥ ខែវិច្ឆិកា ឆ្នាំ២០១៧ ស្ថានទូតសហរដ្ឋអាមេរិកប្រចាំកម្ពុជា បានផ្ញើលិខិតផ្លូវការមួយទៅកាន់ លោក ហេង រតនា ដើម្បីបញ្ជាក់ថា អាមេរិកនឹងបន្តផ្តល់ជំនួយ ក្នុងសកម្មភាពបោសសម្អាតគ្រាប់បែកខ្លួន ដែលទម្លាក់លើទឹកដីខ្មែរកាលពីអតីតកាល។ ការផ្តល់ជំនួយនេះធ្វើតាមលក្ខណៈដេញថ្លៃ។
ជាងនេះទៅទៀតនោះ កាលពីថ្ងៃទី១៣ ខែវិច្ឆិកា ឆ្នាំ២០១៧ មហាមិត្តរបស់កម្ពុជាគឺប្រទេសចិន ក៏បានប្រកាសជួយដល់កម្ពុជា ក្នុងសកម្មភាពបោសសំអាតគ្រាប់មីន និងយុទ្ធភណ្ឌមិនទាន់ផ្ទុះនៅកម្ពុជាឲ្យអស់ ដោយមិនរើសអើងថា ជារបស់អាមេរិក ឬប្រទេសដទៃនោះទេ។ ការប្រកាសផ្តល់ជំនួយនេះ ធ្វើឡើងនៅក្នុងជំនួបទ្វេភាគីរវាងនាយករដ្ឋមន្ត្រីនៃកម្ពុជា សម្តេចតេជោ ហ៊ុន សែន និងលោក លី កឺជាង នាយករដ្ឋមន្ត្រីចិន នៅទីក្រុងម៉ានីឡា ប្រទេសហ្វីលីពីន ដោយរដ្ឋាភិបាលចិន បានសន្យាថា នឹងជួយឱ្យអស់លទ្ធភាព ដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះនៅកម្ពុជា ឱ្យបានឆាប់រហ័ស។
សូមជម្រាបថា បើតាមរបាយកាណ៍របស់ស៊ីម៉ាក់ បានបង្ហាញថាចន្លោះឆ្នាំ១៩៦៣ ដល់ឆ្នាំ១៩៧៥ អាមេរិកបានទម្លាក់គ្រាប់បែកជាច្រើនប្រភេទលើដីខ្មែរ ក្នុងនោះមានគ្រាប់បែកគីមីផងដែរ។ គ្រាប់ដែលទម្លាក់មានទម្ងន់ប្រមាណ ២លាន៨សែនតោន៕ ដោយ៖បញ្ញាស័ក្តិ
