ខេត្តព្រះសីហនុ៖ សាខាសម្ព័ន្ធអ្នកសារព័ត៌មានកម្ពុជា ខេត្តព្រះសីហនុ បាននាំយកអំណោយជូនលោកគ្រូបង្រៀនម្នាក់ ឈ្មោះ ចាន់ ធឿង បង្រៀននៅសាលាបឋមសិក្សាចំការកៅស៊ូ ឃ្លាំងលើក្រុងព្រះសីហនុ ដែលកំពុងតែមានជំងឺមហារីកធ្ងន់ធ្ងរ ហើយគ្រួសារខ្វះលទ្ធភាពឬមិនមានថវិកាព្យាបាល។
ដើម្បីចូលរួមរំលែកការខ្វះខាតនេះ លោក ឈុន សារុំ សាខាសម្ព័ន្ធអ្នកសារព័ត៌មានកម្ពុជា ខេត្តព្រះសីហនុ កាលពីរសៀលថ្ងៃទី៩ ខែមីនា ឆ្នាំ២០១៨ បាននាំយកគ្រឿងឧបភោគបរិភោគមួយចំនួន និងមូលនិធិ របស់សម្ព័ន្ធអ្នកសារព័ត៌មានកម្ពុជា ចំនួន ៦០ម៉ឺនរៀល និងថវិកា លោកផ្ទាល់ចំនួន ១០០ដុល្លារសហរដ្ឋអាមេរិក យកទៅជូនគ្រូបង្រៀន នៅសាលាបឋមសិក្សាចំការកៅស៊ូឃ្លាំងលើ ក្រុងព្រះសីហនុ ដែលកំពុងមានជំងឺមហារីកធ្ងន់ធ្ងរ។
លោក ឈុន សារុំ បញ្ជាក់ថា ថ្វីត្បិតតែចំនួនថវិកាមូលនិធិសម្ព័ន្ធ ក៏ដូចជាថវិកាសប្បរសជន ដែលផ្តល់ជូនគ្រួសារ លោកគ្រូកំពុងមានជំងឺធ្ងន់នេះ មានចំនួនតិចតួចបែបណាក្តី ក៏ប៉ុន្តែ អាចជាការចូលរួមចែករំលែកការខ្វះខាត ជូនគ្រួសារមន្ត្រីរាជការពេលមានជំងឺ និងជាការបង្ហាញពីទឹកចិត្តអាណិតអាសូរ ក្នុងមានពលរដ្ឋខ្មែរ និងមានឈាមជ័រជាខ្មែរដូចគ្នា។
លោក ឈុន សារុំ ប្រធានសាខាសម្ព័ន្ធអ្នកសារព័ត៌មានកម្ពុជា ខេត្តព្រះសីហនុ បន្តទៀតថាដើម្បីផ្តល់កម្លាំងចិត្ត និងការអាណិតអាសូរ ក្នុងនាមលោក ជាប្រជាពលរដ្ឋខ្មែរ និងជាមន្ត្រីរាជការជិតចូលនិវត្តន៍មួយរូប នាខេត្តព្រះសីហនុ លោកបានអំពាវនាវដល់សប្បុរសជនទាំងក្នុង និងក្រៅប្រទេស ដែលមានសណ្តានចិត្តចង់ជួយឧបត្ថម្ភ ដល់គ្រួសារលោកគ្រូបង្រៀន ដែលកំពុងមានជំងឺមហារីកធ្ងន់ធ្ងរ ដែលកន្លងមក លោកគ្រូបានចំណាយពេលវេលាកម្លាំងញើសឈាម ជួយបង្ហាត់បង្ក្រៀនដល់កុមារាកុមារី ដែល ជាកុលបុត្រខ្មែរអស់រយៈពេលជាច្រើនឆ្នាំមកហើយនោះ។
បច្ចុប្បន្ន លោក ចាន់ ធឿង គ្រូបង្រៀនសាលាបឋមសិក្សាចំការកៅស៊ូ ដែលមានជម្ងឺមហារីកធ្ងន់ធ្ងរ មានទីលំនៅក្នុងភូមិ១ សង្កាត់លេខ១ ក្រុង-ខេត្តព្រះសីហនុ។
ផ្តើមពីបញ្ហានេះ លោក ឈុន សារុំ ស្នើថា បើមានសប្បុរសជនចង់ផ្តល់ជាថវិកា និងគ្រឿងឧបភោគបរិភោគជូន គ្រូបង្រៀន ដែលកំពុងមានជំងឺមហារីកធ្ងន់ធ្ងរខាងលើនេះ អាចទាក់ទងតាមរយៈទូរស័ព្ទលេខ៖ ០១២ ៨៦៥ ១១៦ និង ០១៦ ២៣៣ ៥៣៥៕ ដែន សីមា