ឧត្តរមានជ័យ ៖ មានករណីប្រព្រឹត្តអំពើហិង្សាក្នុងគ្រួសារមួយបានកើតឡើង ដោយកូនទំនើងផឹកស្រាស្រវឹង ទាញកាំបិតកាប់ទៅលើឪពុករបស់ខ្លួន បណ្តាលឲ្យរបួសធ្ងន់ កាលពីវេលាម៉ោង១៨ ថ្ងៃទី៩ ខែមីនា ឆ្នាំ២០១៨ នៅចំណុចភូមិឈើក្រំ សង្កាត់កូនគ្រៀល ក្រុងសំរោង ខេត្តឧត្តរមានជ័យ។
សមត្ថកិច្ចបានឲ្យដឹងថា ជនសង្ស័យ ឈ្មោះ សារ៉ាត់ ផែន ភេទប្រុស អាយុ ២៣ឆ្នាំ ត្រូវជាកូនបង្កើត បានយកកាំបិតមកកាប់ ឪពុកខ្លួនឯងត្រូវចំក្បាល ១កាំបិត និងចំដៃខាងស្ដាំ ១កាំបិត បណ្ដាលឲ្យរងរបួសយ៉ាងធ្ងន់ធ្ងរ ។ ចំណែកជនរងគ្រោះ ឈ្មោះ អ៊ុំ សារ៉ាត់ ភេទប្រុស អាយុ៥៧ឆ្នាំ រស់នៅភូមិឈើក្រំ សង្កាត់កូនគ្រៀល ក្រុងសំរោង ខេត្តឧត្តរមានជ័យ ។ សមត្ថកិច្ចបានឲ្យដឹងទៀតថា “ករណីនេះកើងឡើង ដោយមូលហេតុ ជនបង្កស្រវឹងស្រា “។
ក្រោយពេលកើតហេតុភ្លាមៗ កម្លាំងនគរបាលប៉ុស្តិ៍កូនគ្រៀល ទៅដល់កន្លែងកើតហេតុ បានឃាត់ខ្លួនជនសង្ស័យ បញ្ជូនមកអធិការនគរបាលក្រុងសំរោង ដើម្បីចាត់ការតាមនីតិវិធីច្បាប់ ៕ ដោយ៖បញ្ញាស័ក្តិ