កាលពីខែកក្កដា ឆ្នាំ ២០១១ សារមន្ទីរជាតិភ្នំពេញបានទទួលនូវចម្លាក់ក្បាលគ្រុឌដ៏ធំមួយ ធ្វើអំពីសំរិត ពីជនជាតិអាមេរិកកាំងម្នាក់ ឈ្មោះ Douglas Latchford។ តើចម្លាក់បុរាណដ៏សំខាន់នេះ ដែលសប្បុរសជនខាងលើនេះ បានបរិច្ចាកជូនចំពោះជាតិខ្មែរ មានអាយុកាលប៉ុន្មានឆ្នាំមកហើយ? ហើយម្យ៉ាងវិញទៀត តើមានសារៈសំខាន់យ៉ាងដូចម្តេចដែរ?។ បើយើងប្រៀបធៀបលក្ខណៈនៃវត្ថុបុរាណដ៏កំរនេះទៅនឹងចម្លាក់បុរាណមួយចំនួននាសម័យបាយ័ន ជាពិសេសក្បាលទូកចម្បាំងនៅលើប្រាសាទបាយ័ន និងប្រាសាទបន្ទាយឆ្មារ យើងអាចសន្និដ្ឋានបានយ៉ាងត្រឹមត្រូវថា ចម្លាក់នេះពិតជាក្បាលទូកចម្បាំង នាសម័យព្រះបាទជ័យវរ្ម័នទី៧ ពោលគឺ ពីចុងស.វទី ១២ និង ដើមទី១៣នៃគ.ស យ៉ាងប្រាកដ។
រូបភាព ១-៣ : ក្បាលទូកចម្បាំង នៅសារមន្ទីរជាតិភ្នំពេញ និង ចម្លាក់នៅលើប្រាសាទបាយ័ន (ម.ត ២០១២)
ខាងលើនេះ គឺជាលទ្ធផលនៃការសិក្សាស្រាវជ្រាវរបស់យើង តែអ្វីដែលសំខាន់ជាងគេនៅទីនេះ គឺយើងចង់កត់សម្គាល់ថា រាល់ស្លាកស្នាមវប្បធម៌បុរាណ ទោះជាតូចក្តី ធំក្តី អាចផ្តល់លទ្ធភាពឲ្យយើងឲ្យឈ្វេងយល់អំពីវប្បធម៌ខ្មែរយ៉ាងត្រឹមត្រូវជាវិជ្ជមានពុំខាន។ សូមជម្រាបថា សព្វថ្ងៃនេះ ក្បាលទូកចម្បាំងតែមួយគត់ ដែលដូនតាខ្មែរបានបន្សល់ទុកជាកេរ្តិ៍ដំណែលនោះ ត្រូវបានរក្សាទុកក្នុងសារមន្ទីរជាតិភ្នំពេញ៕ (ម.ត្រាណេ)
