ប្រធានទីភ្នាក់ងារស៊ើបអង្កេតអាមេរិច (CIA) ឈ្មោះ Mike Pompeo បានការពារការសម្រេចចិត្តរបស់ប្រធានាធិបតី ត្រាំ ក្នុងការជួបចរចារដោយផ្ទាល់ជាមួយនឹងមេដឹកនាំកូរ៉េខាងជើង លោក គីម ជុងអ៊ុន ដោយលោកបានលើកឡើងថា ប្រធានាធិបតីយល់ពី គ្រោះថ្នាក់។
ប្រធាន CIA ថ្លែងប្រាប់សារព៌តមាន Fox News កាលពីថ្ងៃអាទិត្យម្សិលមិញនេះថា លោក ត្រាំ “មិនមែនធ្វើវាដើម្បីសម្តែងឲ្យគេមើលទេ គាត់នឹងទៅទីនោះដើម្បីដោះស្រាយបញ្ហា”។
លោក ត្រាំថ្លែងថា កិច្ចប្រជុំកំពូលអាចនឹងបង្កើតបានកិច្ចព្រមព្រៀងដ៏អស្ចារ្យមួយសំរាប់ ពិភពលោក។
ទោះយ៉ាងណា អ្នករិះគន់បានធ្វើការព្រមានថា ប្រសិនបើកិច្ចចរចារមានសភាពអាក្រក់ ប្រទេសទាំងពីរនឹងប្រឈមដាក់គ្នាកាន់តែខ្លាំងជាងមុនទៀត។
លោក Mike Pompeo ថ្លែងថា “មិនធ្លាប់មានពីមុនមកនោះទេ ដែលយើងអាចធ្វើឲ្យសេដ្ឋកិច្ចរបស់កូរ៉េខាងជើងស្ថិតក្នុងសភាពដុនដានបែបនេះ ហើយការដឹកនាំរបស់ពួកគេស្ថិតក្រោមសម្ពាធខ្លាំង”។
សូមបញ្ជាក់ថា មិនធ្លាប់មានប្រធានាធិបតីដែលកំពុងកាន់តំណែងរបស់អាមេរិចណាធ្លាប់ជួបជាមួយនឹងមេដឹកនាំកូរ៉េខាងជើងនោះទេ។ លោក ត្រាំ បានទទួលយកការជួបចរចារជាមួយនឹងមេដឹកនាំកូរ៉េ នៅពេលដែលមន្ត្រីកូរ៉េខាងត្បូងបានប្រាប់សាររបស់លោក គីម ជុងអ៊ុនដល់លោក។
មេដឹកនាំប្រទេសទាំងពីរ ត្រូវគេរំពឹងថា នឹងជួបគ្នានៅក្នុងខែឧសភាខាងមុខ៕ សុភ័ក្ត្រ