កំពង់ស្ពឺ៖ នៅព្រឹកថ្ងៃទី១២ ខែមីនា ឆ្នាំ២០១៨ មានរថយន្តដឹកកម្មករមួយគ្រឿង បានក្រឡាប់នៅតាមផ្លូវលេខ៥១ ភូមិស្ដុកស្លាត ឃុំភ្នំតូច ស្រុកឧដុង្គ ខេត្តកំពង់ស្ពឺ បណ្តាលកម្មការិនីម្នាក់បានស្លាប់ និងរបួស១០នាក់ ។រថយន្តនេះដឹក កម្មករជាង៥០នាក់។ ជនរងគ្រោះដែលស្លាប់ឈ្មោះ រុំ សុខឿន ភេទស្រី អាយុ២៣ឆ្នាំ រស់ភូមិស្តុកស្លាត ឃុំមានជ័យ ស្រុកឧដុង្គ។
នគរបាលមូលដ្ឋានបានបញ្ជាក់ថា មូលហេតុដែលបណ្ដាលឲ្យកើតមានគ្រោះថ្នាក់ចរាចរនេះ គឺមកពីអ្នកបើកបរបើកលឿន ខ្វះការប្រុងប្រយ័ត្ន បើករថយន្តទៅបុកកង់រថយន្ដដែលដាច់ ហើយអ្នកបើកបររថយន្ដធំមួយគ្រឿងទៀត កំពុងតែបង្វិលកង់រថយន្តឆ្លងកាត់ថ្នល់ បណ្ដាលឲ្យរថយន្ដដឹកកម្មករបុកហើយក្រឡាប់តែម្តង។
ជនរងគ្រោះចំនួន១០នាក់ ត្រូវបានបញ្ជូនទៅកាន់មន្ទីរពេទ្យ៕ ដោយ៖បញ្ញាស័ក្តិ