ភ្នំពេញ ៖ គ្រោះថ្នាក់ចរាចរណ៍ ក្នុងខែកុម្ភៈ ឆ្នាំ២០១៨ បណ្ដាលឲ្យមនុស្សស្លាប់ ១៥៤នាក់ រងរបួស ៤០១នាក់ បាត់ម៉ូតូ១៨គ្រឿង រថយន្ដ៩គ្រឿង និងសម្ភារៈមាសប្រាក់មួយចំនួនទៀត ។
លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិនៅរសៀលថ្ងៃទី១២ ខែមីនា ឆ្នាំ២០១៨នេះ បានដឹកនាំកិច្ចប្រជុំប្រចាំខែកុម្ភៈ និងបន្តបង្រឹងអនុវត្តន៍ការប្រចាំខែ មីនា ឆ្នាំ២០១៨ នៅអគ្គស្នងការដ្ឋាននគរបាលជាតិ ។
នាយឧត្តមសេនីយ៍ បានធ្វើការអំពាវនាវដល់ស្នងការ រាជធានី-ខេត្ត ទាំងអស់ត្រូវ ពង្រឹងសន្តិសុខ និងសណ្តាប់ធ្នាប់ជូនដល់ប្រជាពលរដ្ឋបន្ថែមទៀត ខណៈបទល្មើសនានាបានកំពុងថយចុះក្នុងខែកុម្ភៈ កន្លងទៅនោះ ប៉ុន្តែបញ្ហាគ្រោះថ្នាក់ចរាចរណ៍នៅតែមានការព្រួយបារម្មណ៍ខ្លាំង ។
យោងតាមរបាយការណ៍ប្រចាំខែរបស់អគ្គស្នងការដ្ឋាននគរបាលជាតិ ដែលបានបង្ហាញនៅក្នុងកិច្ចប្រជុំបានឲ្យដឹងថា គ្រោះថ្នាក់ចរាចរណ៍ ក្នុងខែកុម្ភៈ ឆ្នាំ២០១៨ ធៀបនឹងខែកុម្ភៈ ឆ្នាំ២០១៧ បណ្ដាលឲ្យ មនុស្សស្លាប់ ១៥៤នាក់ កើន ១៤នាក់ ស្មើនឹង៩ភាគរយ រងរបួស ៤០១នាក់ ថយ ១៧នាក់ ស្មើនឹង ៤ភាគរយ បាត់ម៉ូតូ១៨គ្រឿង រថយន្ដ៩គ្រឿង និងសម្ភារៈមាស-ប្រាក់មួយចំនួនទៀត ។ ស្ថានភាពសណ្ដាប់ធ្នាប់ សុវត្ថិភាពសង្គមកាន់តែធូរស្រាល ដោយ បទល្មើសជារួមថយចុះ ២០លើក ស្មើ៨% ក្នុងនោះបទល្មើសឧក្រិដ្ឋ ថយ១៥លើកស្មើ២៥,៤២% និងបទល្មើសមជ្ឈឹមថយ ៥លើកស្មើ ២,៥១% ។
សូមរំលឹកថា គ្រោះថ្នាក់ចរាចរណ៍ នៅខែមករាដើមឆ្នាំ២០១៨នេះ កើតឡើងចំនួន៣០៤លើក និងបណ្ដាលឲ្យមនុស្សស្លាប់បាត់បង់ជីវិត ចំនួន១៦៨នាក់ (កើន៥នាក់) ហើយមនុស្សចំនួន៣៩៥នាក់ផ្សេងទៀត រងរបួសធ្ងន់ស្រាល ខណៈឆ្នាំ២០១៧ ប្រជាពលរដ្ឋបានស្លាប់ដោយសារគ្រោះថ្នាក់ចរាចរណ៍ចំនួន១៧៨០នាក់ បើធៀបទៅនឹង ឆ្នាំ២០១៦ មានចំនួន១៧១៧នាក់ ដែលមានការកើនឡើងគួរឲ្យកត់សំគាល់ ទោះបីឆ្នាំ២០១៧ គ្រោះថ្នាក់ចរាចរណ៍ មានការថយចុះក៏ពិតមែន៕ ដោយ៖បញ្ញាស័ក្តិ
