សៀមរាប ៖ នគរបាលខេត្តសៀមរាប បង្ហាញមុខជនឆបោកម្នាក់ ដែលបានជួលរថយន្តរបស់បងប្អូនប្រជាពលរដ្ឋក្នុងខេត្តសៀមរាបយកទៅលក់អស់ជាង ៣០ គ្រឿងនិងបានដកហូតបានរថយន្តចំនួន ១០ គ្រឿង ខណៈដែលរថយន្ដ ២០ គ្រឿងទៀតកំពុងបាត់ស្រមោល។
លោក ភឹង ចន្តារ៉េត ស្នងការរងទទួលបន្ទុកកណ្តាលយុត្តិធម៌នៃស្នងការដ្ឋាននគរបាលខេត្តសៀមរាបបានឲ្យដឹងថា កម្លាំងនគរបាលបានឃាត់ខ្លួនជនសង្ស័យម្នាក់ ករណីឆបោករថយន្ដពលរដ្ឋទៅលក់អស់ជាច្រើនគ្រឿង នៅតាមបណ្ដាខេត្ដសផ្សេងៗនិងនៅក្រុងសៀមរាប ។ ការឃាត់ខ្លួននេះ ធ្វើឡើងតាមបណ្តឹងប្រជាពលរដ្ឋច្រើននាក់ បន្ទាប់ពីពួកគេជួលរថយន្ដអោយជនសង្ស័យរូបនោះ ក្នុងតម្លៃខ្ពស់។ លោកបន្តថា ជនសង្ស័យរូបនេះមានឈ្មោះ អៀង វាសនា ភេទប្រុសអាយុ ២៥ឆ្នាំ ទីលំនៅភូមិ ជ្រៃ ឃុំកណ្តែក ស្រុកប្រាសទបាគង ខេត្តសៀមរាប។
លោកបន្តថា បច្ចុប្បន្ននេះមន្ដ្រីជំនាញបានទទួលបានបណ្តឹងរបស់ជនរងគ្រោះបានចំនួន ២៨ នាក់ ដែលមានរថយន្តសរុបចំនួន ៣១ គ្រឿង។ លោកបន្តថា ជនសង្ស័យរូបនេះ បានឆបោកជនរងគ្រោះ ដោយនិយាយថា គាត់ជួលរថយន្តទាំងនេះយកទៅជួលបន្តឲ្យជនជាតិចិនក្នុងតម្លៃចាប់ពី ៤០០ ទៅ ៦០០ ដុល្លារ ក្នុងមួយខែ។ ក្នុងនោះជនសង្ស័យបានប្រើល្បិចលើកទឹកចិត្តបង់លុយពីរខែមុន និងធ្វើកិច្ចសន្យាត្រឹមត្រូវ ប៉ុន្ដែផ្ទុយទៅវិញជនសង្ស័យរូបនោះ គ្រាន់តែជារូបភាពមួយឆបោកប៉ុណ្ណោះ។ លោកបន្តថា រហូតមកទល់ពេលនេះកម្លាំងនគរបាលជំនាញនៃស្នងការដ្ឋានខេត្តសៀមរាបរកឃើញរថយន្តទំនើបៗចំនួន ១០ គ្រឿងនិងបង្កកទុក ៥ គ្រឿង រង់ចាំតុលាការសម្រេច ហើយក៏និងកំពុងបន្តស្រាវជ្រាវស្វែងរកបន្ថែមទៀត។ លោកបានសំណូមពរឲ្យបងប្អូនប្រជាពលរដ្ឋទាំងអស់មេត្តាប្រុងប្រយ័ត្នឲ្យបានខ្ពស់ចំពោះការទិញឬក៏លក់ដូរផ្សេងៗ ក្នុងនោះត្រូវតែពិនិត្យឯកសារឲ្យបានត្រឹមត្រូវផង។ លោកបញ្ជាក់ថា ចំពោះកន្លែងដែលបានទិញរបស់ចោរកម្មនោះគឺសម្រេចលើខាងតុលាការ។ បន្ទាប់ពីនគរបាលជំនាញសាកសួររួច ជនសង្ស័យបានសារភាព ពីទង្វើរបស់ខ្លួន ហើយបច្ចុប្បន្ននេះកម្លាំងនគរបាលកំពុងរៀបចំសំណុំរឿងដើម្បីបញ្ជូនជនសង្ស័យទៅតុលាការចាត់ការតាមផ្លូវច្បាប់។ ប៉ុន្ដែទោះជាយ៉ាងណាសមត្ថកិច្ចមិនបានប្រាប់ទីតាំងដែលជនសង្ស័យឆបោករថយន្ដពលរដ្ឋទៅលក់នៅកន្លែងណានោះទេ ប៉ុន្ដែជនរងគ្រោះ បានឱ្យដឹងថា ជនសង្ស័យនោះ បានឆបោកពួកគេយកទៅល់នៅឃ្លាំងរថយនន្ដម្ដុំផ្លូវ៦០ម ក្រុងសៀមរាប។
គួររំលឹកថា ការឃាត់ខ្លួនជនសង្ស័យរូបនេះធ្វើឡើងនៅថ្ងៃទី០៤ ខែមិនាឆ្នាំ២០១៨ស្ថិត នៅភូមិទ្សិណខាងត្បូងសង្កាត់គោកចក ក្រុងសៀមរាប បន្ទាប់ពីជនរងគ្រោះបានប្រទះឃើញរថយន្តរបស់គាត់ត្រូវបានគេដាក់រាំងលក់នៅម្តុំផ្លូវ៦០ម៉ែត្រ។
ប្រភពមួយបានឲ្យដឹងថា ជនសង្ស័យខាងលើនេះបានទិញឈ្មោះចូលធ្វើប៉េអឹមនៅខេត្តបន្ទាយមានជ័យ រូចហើយបានសុំផ្ទេរមកខេត្តសៀមរាប តែមិនទាន់បានសម្រេចក៏ត្រូវបានគរបាកចាប់ខ្លួនតែម្តង។ ប្រភពបន្តថា ជនស្ស័យបានជួលឡានយកទៅលក់អស់ជាច្រើនគ្រឿងនេះ គឺដើម្បីយកលុយទៅលេងល្បែងនៅកាស៊ីណូប៉ោយប៉ែត៕ ដោយ៖បញ្ញាស័ក្តិ