ភ្នំពេញ ៖ ទាក់ទងនឹងគោលបំណងរបស់ក្រុមហ៊ុន Agro studies ដែលចង់បង្កើតកសិដ្ឋានមួយ សម្រាប់ធ្វើការបង្ហាញ ពីការប្រើប្រព័ន្ធដំណក់ទឹក លើដំណាំស្រូវនៅកម្ពុជា លោករដ្ឋមន្ត្រីកសិកម្ម ថានឹងគាំទ្រ និងផ្តល់កិច្ចសហការយ៉ាងល្អចំពោះគម្រោងនេះ ហើយថាការអនុវត្តបច្ចេកវិទ្យាលើវិស័យកសិកម្ម គឺសមស្របទៅនឹងគោលនយោបាយរបស់រាជរដ្ឋាភិបាលដែលចង់បង្កើ។
នៅថ្ងៃចន្ទ ទី១២ ខែមីនា ឆ្នាំ២០១៨ នៅទីស្តីការក្រសួង លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានអនុញ្ញាតឲ្យលោក Yaron Tamir នាយកក្រុមហ៊ុន Agro-studies (Agriculture Capacity Building) ចូលជួបសម្តែងការគួរសម និងពិភាក្សាការងារជុំវិញប្រធានបទស្តីពីការពង្រឹង និងពង្រីកកិច្ចសហប្រតិបត្តិការលើវិស័យកសិកម្មរវាងប្រទេសកម្ពុជានិងអ៊ីស្រាអែលនាពេលអនាគត។
ឱកាសនេះលោក Yaron Tamir បានថ្លែងថា ក្រុមហ៊ុនមានគោលបំណងបង្កើតកសិដ្ឋានមួយសម្រាប់ធ្វើការបង្ហាញពីការប្រើប្រព័ន្ធដំណក់ទឹកលើដំណាំស្រូវ។
មានមតិស្វាគមន៍នាឱកាសនេះ ឯកឧត្តមរដ្ឋមន្ត្រីសូមកោតសរសើរចំពោះកិច្ចសហប្រតិបត្តិការអន្តរជាតិរវាងក្រុមហ៊ុនជាមួយសាកលវិទ្យាល័យភូមិន្ទកសិកម្មដែលបានផ្តល់អាហារូបករណ៍ដល់និស្សិតឆ្នាំទី៣ ដើម្បីទៅចូលរួមធ្វើកម្មសិក្សានៅប្រទេសអ៊ីស្រាអែលទាំងទ្រឹស្តីនិងការអនុវត្ត គិតមកដល់ពេលបច្ចុប្បន្ននេះមានរយៈពេល១១ឆ្នាំហើយ មាននិស្សិតទទួលបានការបណ្តុះបណ្តាលប្រមាណជិតមួយពាន់នាក់។
លោករដ្ឋមន្ត្រី បានបញ្ជាក់បន្ថែមថា តាមរយៈចំណេះដឹងនិងបទពិសោធន៍ល្អៗដែលទទួលបានពីការបណ្តុះបណ្តាលនេះ ធ្វើឲ្យវិស័យកសិកម្មមានការប្រែប្រួលជារួម និងដោយឡែកវិស័យផលិតកម្មដំណាំបន្លែ ជាក់ស្តែងកសិករបាននិងកំពុងប្រើប្រាស់បច្ចេកវិទ្យាប្រព័ន្ធដំណក់ទឹក ផ្ទះសំណាញ់ និងការប្រើប្លាស្ទិចលើដំណាំបន្លែ។ ជាក់ស្តែង ការប្រើបច្ចេកវិទ្យាទាំងនេះបានត្រឹមត្រូវនោះវានឹងជួយកាត់បន្ថយថ្លៃដើមផលិត ផលិតផលិតផលមានសុវត្ថិភាព និងឈានទៅធ្វើការប្រកួតប្រជែងទីផ្សារជាមួយប្រទេសជិតខាងនាពេលអនាគត។ ទាក់ទងនឹងគោលបំណងរបស់ក្រុមហ៊ុនដែលចង់បង្កើតកសិដ្ឋានមួយសម្រាប់ធ្វើការបង្ហាញពីការប្រើប្រព័ន្ធដំណក់ទឹកលើដំណាំស្រូវ លោករដ្ឋមន្ត្រីមានសុទិដ្ឋិនិយមថានឹងគាំទ្រ និងផ្តល់កិច្ចសហការយ៉ាងល្អចំពោះគម្រោងនេះ ព្រោះហេតុថាការអនុវត្តបច្ចេកវិទ្យាលើវិស័យកសិកម្មគឺសមស្របទៅនឹងគោលនយោបាយរបស់រាជរដ្ឋាភិបាលដែលចង់បង្កើនសមត្ថភាពផលិតទាំងបរិមាណ និងគុណភាពដើម្បីធ្វើការនាំចេញនេះម្យ៉ាង ម្យ៉ាងទៀតការប្រើបច្ចេកវិទ្យាទំនើបៗលើវិស័យកសិកម្មគឺសមស្របទៅនឹងនិន្នាការនៃការធ្លាក់ចុះកម្លាំងពលកម្មក្នុងវិស័យកសិកម្ម។ ដូច្នេះការកាត់បន្ថយទាំងថ្លៃដើម និងកម្លាំងពលកម្មគឺជាជម្រើសមួយយ៉ាងល្អសម្រាប់កសិករដែលមានលទ្ធភាព និងម្ចាស់កសិដ្ឋានក្នុងការបង្កើនផលិតភាពផលិតកម្មដំណាំឈើហូបផ្លែ និងបន្លែ។
ដើម្បីពង្រីកចំណេះដឹង ផ្សព្វផ្សាយបទពិសោធន៍ និងតាមដានពីភាពជោគជ័យរបស់និស្សិតដែលបានត្រឡប់ពីប្រទេសអ៊ីស្រាអែល លោករដ្ឋមន្ត្រីបានស្នើឲ្យក្រុមហ៊ុនសហការជាមួយសាកលវិទ្យាល័យភូមិន្ទកសិកម្មរៀបចំសិក្ខាសាលា ឬបង្កើតព្រឹត្តិការណ៍នៃការជួបជុំនិស្សិតជាមួយក្រុមហ៊ុន ឬម្ចាស់កសិដ្ឋានដើម្បីឲ្យពួកគេបង្ហាញពីអ្វីដែលពួកគេកំពុងធ្វើ និងអ្វីដែលទទួលបានពីចំណេះដឹង និងបទពិសោធន៍ល្អៗទាក់ទងនិងវិស័យកសិកម្មពីប្រទេសអ៊ីស្រាអែល ហើយក៏ជាឱកសដ៏ល្អសម្រាប់ក្រុមហ៊ុននិងនិស្សិតអាចសហការធ្វើគម្រោងស្រាវជ្រាវ ឬឈានទៅធ្វើកិច្ចសន្យាផលិតដើម្បីផ្គត់ផ្គង់ទីផ្សារ ជាពិសេសចង់បង្ហាញពីសក្តានុពលនៃធនធានមនុស្សក្នុងវិស័យកសិកម្មដែលយើងនឹងធ្វើការអភិវឌ្ឍវិស័យមួយនេះនាពេលអនាគតដើម្បីរក្សាកំណើនសេដ្ឋកិច្ចជាតិ និងឈានទៅសម្រេចបានតាមផែនការនាឆ្នាំ២០៣០ គឺប្រទេសមានចំណូលមធ្យមកម្រិតខ្ពស់៕ ដោយ ៖ បញ្ញាស័ក្តិ