បន្ទាយមានជ័យ ៖ គំនរភ្លើងផ្នក់និងពំនូកសម្រាមបានរាលឆាបឆេះផ្ទះមួយខ្នងអស់ទាំងស្រុង ពេលម្ចាស់ទៅផ្សារ។ អគ្គីភ័យកើតឡើងនៅព្រឹក ថ្ងៃទី១២ ខែមីនា ឆ្នាំ ២០១៨ កន្លងមកនៅភូមិសូភីកណ្តាល ឃុំសូភី ស្រុកអូរជ្រៅ ខេត្តបន្ទាយមានជ័យ។
លោកវរៈសេនីយ៍ជា ពិសី មេបញ្ជាការមូលដ្ឋានអាវុធហត្ថស្រុកអូរជ្រៅបានអោយដឹងថា ៖ ថានៅមុនពេលកើតហេតុនោះម្តាយក្មេកជនរងគ្រោះបានបោសម្រាម ហើយបានគរដុតចោល ជាមួយឫសឈើ។ តែពេលភ្លើងឆេះនោះ ម្ចាស់ផ្ទះបានទៅផ្សារទិញម្ហូប ក៏គ្មានអ្នកមើលថែភ្លើង ទើបវារាលដាលឆាបឆេះរាលដាលដល់ផ្ទះយ៉ាងសណ្ធោសណ្ធៅ អស់រលីងតែម្តង។
លោកបន្តថា ៖ ម្ចាស់ផ្ទះរងគ្រោះមានឈ្មោះ នឿត លឹប ភេទប្រុស អាយុ ៣៩ ឆ្នាំ និងប្រពន្ធឈ្មោះ ប៉ិន បាន អាយុ ៤១ ឆ្នាំ មានសមាជិកក្នុងគ្រួសារចំនួន ៤ នាក់ ហើយរស់នៅភូមិសូភីកណ្តាល ឃុំសូភី ស្រុកអូរជ្រៅ។ ចំពោះ ការខូចខាតរួមមាន ៖ ផ្ទះ ១ខ្នង ទំហំ ៨ម៉ែត្រ គុណ ៦ម៉ែត្រ ដំបូលប្រក់ស័ង្កសី ជញ្ជាំងក្តារម្ខាង ស្បូវម្ខាង គ្រែដេក ១ ខោ អាវ ៣កេះ ភួយ មុង កង់ជិះ ១ កង្ហា ០១ ទូដាក់ចានឆ្នាំង ១ ៕ ដោយ ៖ បន្ទាយ
